之前 Edward 都提過，對於採用金屬物料製造的手機特別情有獨鍾：一來比較高貴，二來手感都比較好，三來感覺好似都比較耐用。不過金屬機一向都係旗艦機的專利，最近 Samsung 就推係中階機 Galaxy A8 上採用了全金屬外殼，究竟用落係點就等 Edward 同大家介紹下。
金屬手感唔錯
首先講講手感，A8 屬於上代 A7 的承繼者，上代機身只做到金屬邊框，今代 A8 就做到全金屬物料機身，設計更同 S6 一樣，採用一體化機身（其實係外形上更似 S6 的放大版，只係機背物料唔同），所以大家都預咗無得換電。不過呢個做法嘅好處就係機身可以做到好纖薄，只有 5.9mm，加上機背邊位採用微弧形設計，邊框又只有 2.5mm 粗度，令雖然 A8 熒幕有成 5.7 吋，但單手操控時都幾舒服。
不過 A8 採用嘅金屬，同 HTC One 系列旗艦的金屬，係手感上有啲唔同，筆者覺得似乎有少少膠感，而且都幾跣手，所以大家使用時要小心啲啦。
▲採用金屬機身 + 一體化設計，睇起來感覺好似比 S6 更 grand。
▲機背邊位採用弧形設計，單手操控感覺幾好，不過機背金屬物料比較「膠」，而且有啲跣手，使用時要留神。
▲單手操控 Edward 表示無難度。
▲機身方面真係做得好薄，只有 5.9mm。
▲同 LG G4（左）相比，可以見到 A8 真係薄得好緊要。
影相都算唔錯放大油畫化
至於影相方面，Samsung Galaxy A8 同 S6 / S6 edge 一樣，採用相同的 1,600 萬像素 OIS F/1.9 光圈鏡頭，成像同 S6 / S6 edge 差唔多，前置鏡頭都一樣有 500 萬像素，基本上 Samsung 係將旗艦機的鏡頭直接移植到 A8 呢部中階機上。大家從下面試相可以睇到，A8 鏡頭影出來嘅效果，都算唔錯（雖然肯定無 S6 / S6 edge 咁好，相片放大 100% 都有明顯油畫化情況）；而以中階機來講，A8 係影相上的表現算係收貨。
▲A8 的鏡頭基本上係 Samsung 直接將 Galaxy S6 的鏡頭移植到此機上，所以質素上差唔多。
▲相機介面都差唔多，一樣有齊咁多種模式俾大家揀。
▲至於自拍方面，都有美顏功能。值得一提嘅係佢嘅美顏唔止可以美膚，仲可以瘦面同埋加大眼，啱哂女士用家。
▲不過較得太誇張（所有設定均調較至最高 8 級）就會變成咁，成個外星人咁……
▲較至 4 級左右會比較自然哩！
試相區（按圖可瀏覽原相）
相關文章:
【評測】Samsung Galaxy A55 外形 手感 屏幕 相機 效能開箱評測 Samsung 獲美國政府 500 億撥款 在德州建半導體生態系統 Galaxy AI 將進一步支援舊機 傳 Galaxy S21 也可獲新功能
熒幕只有 1080p 但無礙使用
至於熒幕方面，Samsung Galaxy A8 同 S6 / S6 edge 一樣，都係採用 Super AMOLED 材質，而且尺寸仲要比呢兩部旗艦機大，去到 5.7 吋。不過係解像度方面，始終 A8 都只係旗艦機，所以就跌至只有 1080p。不過正如筆者以前多次提過，係只有幾吋大熒幕的手機上，1080p 同埋 2K QHD 其實分別唔算好大，真係要好仔細睇先見到字粒、圖片嘅邊位細緻度分別。所以筆者覺得減至 1080p 無乜所謂，反而係佢繼續沿用 Super AMOLED 熒幕，令睇片時黑位真係可以做到真正黑色，而唔係灰黑色，呢樣反而更抵讚。
▲採用 Super AMOLED 熒幕，雖然只有 1080p 解像度，但用來睇網頁清晰度都好高。
▲用來睇片，黑位好實，呢個都係 Super AMOLED 的優點。
▲可視角度方面都好高，同樣係 Super AMOLED 熒幕的長處。
效能不過不失•可插卡加分
最後，就講下效能啦。既然係中階機，Galaxy A8 自然唔會好似旗艦機咁勁。不過講到級數，A8 就真係得中階機表現，雖然都採用咗 Qualcomm Snapdragon 615 處理器，同上代 A7 相同，表現一般般，不過不失。其他就包括：採用 2GB RAM、16GB 內建儲存空間、3,050mAh 容量電池、Android 5.1 Lollipop 作業系統、內建指紋辨識器及支援中港 4G LTE 網絡。不過 Edward 覺得最抵讚嘅反而係呢部機可以當做雙卡雙待手機使用，而 SIM 2 亦同時可以插 microSD 記憶卡進一步擴充容量（最高支援 128GB）。咦？之前傳聞 Note 5 雙卡版都有機會可以插卡，唔通做法就會好似 Galaxy A8 咁？
▲效能方面，用安兔兔評測獲得 29,352 分，以 3 千幾蚊嘅手機來講只算不過不失。
▲介面上同 S6 / S6 edge 基本上無分別。
▲買 A8 同其他 Samsung 手機一樣，都會附送 100GB OneDrive 網上儲存空間俾大家備份手機內的相片或影片。
▲支援雙卡雙待功能，而且中港 4G 都用到。不過要留意嘅係 SIM 1 卡槽用嘅係 Nana SIM，而 SIM 2 卡槽用嘅係 Micro SIM。
▲值得一提嘅係，SIM 2 卡槽同時都係 microSD 記憶卡插槽，可以支援最高效入 128GB microSD 記憶卡擴充儲存空間。不過要留意一用咗 microSD 記憶卡，就只能用單 SIM。
▲另外，Home 鍵同 S6 / S6 edge 一樣，都係指紋辨識器位置所在，用法都同 S6 / S6 edge 的指紋辨識器相同。
總結：不過不失金屬機
整體來講，Samsung Galaxy A8 係表現上唔算特別突出，從安兔兔評測測出來的成績，雖然都叫對得住個售價，但唔算特別令人驚喜。不過 A8 最令 Edward 滿意，反而係個芒同埋鏡頭，前者表現唔錯，後者直頭將旗艦機旗艦移植到中階機，如果大家單純之前為影相靚而考慮入手 S6 / S6 edge，相信呢部 A8 會更合大家心意。況且有得插卡，又可以選擇用雙卡雙待，即使去到中國都可以用到 4G，呢一點都係大加分位。不過缺點就係金屬機身始終手感有點膠，不過佢唔係旗艦機，只係一部中階手機，大家都係唔好要求太多啦。
售價：$3,798
查詢：Samsung（3698 4698）
相關文章:
【評測】Samsung Galaxy A55 外形 手感 屏幕 相機 效能開箱評測 Samsung 獲美國政府 500 億撥款 在德州建半導體生態系統 Galaxy AI 將進一步支援舊機 傳 Galaxy S21 也可獲新功能
分享到 :
最新影片
