平時睇人 Instagram、Facebook ,個個都女神上身,尖面、大眼、皮膚亮白,但偏偏自己就…唉。雖然話戴大眼仔、黐假眼睫毛同打陰影粉可以幫到唔少忙,不過萬一好似今日咁,突然被召喚去記招做評測,無點化妝又需要影靚相同大家 share,為保護各位 wire 民嘅眼睛,番到公司真喺有排 PS。幸好今次 ASUS 推出嘅喺主打自拍功能嘅手機 ZenFone Selfie,禁個掣想塊面幾尖就幾尖、隻眼想幾大就幾大,想一秒變蛇精都得,連美圖修修都唔洗。
弧形機背夠好揸,自拍一定唔滑手
ZenFone Selfie 主打女性市場,機穀以糖果色系為主,分別有純白、甜粉紅同清新藍三色選擇。而外型就同上一部 ZenFone 2 差唔多,弧形機背加上音量背鍵,仍然有著 LG G4 嘅影子,不過就無咁「墜手」更加好揸。自拍時只要用食指按一按音量鍵就可以拍攝,非常順手。另外,「ZenMotion (黑屏手勢)」功能就可以喺單手嘅情況下快速進入相機功能,例如:畫個 「S」字就可以開前置拍攝,畫「C」字就可以開後置拍攝,唔洗入到桌面先慢慢搵個 icon。
▲ ZenFone Selfie 螢幕有 5.5 吋,擁有 178度寬廣可視面積,無論高抄低抄都知自己影緊咩。
▲ 弧形機背加埋中間嘅音量鍵同鏡頭,也太似 LG G4 嘛!
▲ ZenFone Selfie 側邊黑藍分明,非常簡潔。
▲ 純白、甜粉紅同清新藍三色都非常甜美,令人想起馬卡龍。
前後鏡頭影相拍片一樣勁
叫得做 ZenFone Selfie,顧名思義梗喺主力用嚟自拍,所以佢前後置鏡頭都採用 1300萬像素 PixelMaster 相機,無論自拍定影風景一樣拍到高質素,而且畫質比起 ZenFone 2 更清晰,少咗份油畫感。同時佢前後都配備 Real Tone 雙色溫閃光燈同支援自動雷射對焦,喺黑嘅環境都可以準確,影到靚相。
▲ 後置鏡頭左邊喺雷射對焦燈,而右邊喺 LED雙色溫補光燈,相當對稱。
▲ 咁高像素嘅前置鏡頭已經好少見,仲有埋雙色溫閃光燈就更難得,可惜閃光燈唔會長著,夜晚想玩美拍就唔得啦。
▲ 雖然天色唔太好,陰陰沈沈,不過後置鏡頭影出嚟雜訊都唔算多。
▲ 由 The One 19樓 Zoom去對面大厦,每橦樓線條仍然好清晰。
▲ 前置鏡頭有 1300萬畫素,用嚟自拍輪廓特別清晰。
▲ 前置鏡頭預設喺美肌模式,轉去 Auto 模式就可以用前置鏡頭拍片,咁拍片上 Instagram 就方便得多。
相關文章:
【評測】ASUS ZenFone 11 Ultra 外形 手感 屏幕 相機 效能詳細開箱評測 【評測】ROG Zephyrus G16 (2024) 外形 手感 打機表現 效能 鍵盤 端子開箱評測 【評測】ASUS ZenBook Duo 外形 手感 功能 使用體驗 屏幕 操控 效能開箱評測
美肌模式設定多,想變蛇精話咁易
做得自拍手機,美肌功能好重要。ZenFone Selfie 可以喺拍攝前自己選擇 10個唔同級數嘅瘦面、大眼、美白、柔膚,同埋 6種唇色,比起幾個月推出嘅自拍手機 SUGAR 2 有更多選擇,而且修圖程度亦利害得多,甚至可以去到蛇精級數。
▲ 美白功能顧及到頸部,膚色亦算自然。(雖然唔喺好明點解正面影會搞到塊面圓咗,成隻青蛙咁)
▲ ZenFone Selfie 嘅美肌功能可以做到非常誇張,整容都無咁誇!(呢張真喺差 D 唔認得自己)
▲ 好啦,睇完惡搞啦!化咗淡妝(只用咗 BB cream 同 眉gel)嘅我認為 2級美白、3級瘦面、 3級大眼、4級柔膚嘅效果就最自然。
雙卡雙待 +可換電 + 可插卡
依家好多旗艦機都無得換電、無得插卡,幸好 ZenFone Selfie 作為 ASUS 嘅旗艦機有得換電之餘,仲支援最高 128GB Micro SD,已經方便過好多機了。另外,佢有兩個 SIM 卡槽,而且兩個都可以插 4G 卡,可以隨時選擇使用 SIM 1 定 SIM2 嘅數據上網服務,岩晒好似我呢 D 經常用要用手機做公事嘅人。
▲ ZenFone Selfie 電池喺可以隨時更換,非常方便。
▲ 兩個卡槽都可以插 4G 卡,不過用緊一張卡上網 ,另一張卡只能用 2G 通話。
▲ 喺記招上除咗 ZenFone Selfie,同時亦推出了 4GB RAM嘅怪獸 Asus Zenfone 2 Deluxe。
▲ 仲有入門級嘅 Asus Zenfone 2 Laser。
依莉詩:「相信喺蛇精最愛嘅手機!」
以自拍手機嚟講二千蚊都唔洗就可以有咁嘅質素算喺唔錯。設計方便對自拍用家都好貼心,特別喺 1300萬像素前置鏡頭真喺好稀有,估唔到用手機自拍都可以影得咁清。不過佢美肌模式有 D 誇張,雖然喺有得自己揀等級,不過修圖就好似整容咁,好易「中毒」,好易會因為追求尖面、大眼、美白而變得唔自然自己都唔知啦,所以用家要小心啊!至於性能方面,ZenFone Selfie 作為一部中階機,搭載 64位元 8核 CPU 、3GB RAM、32GB 內儲,仲有得插卡,換電,其實已經無得輸。
售價:
Asus Zenfone Selfie :HK$1,999
查詢:ASUS(3582 4770)
相關文章:
【評測】ASUS ZenFone 11 Ultra 外形 手感 屏幕 相機 效能詳細開箱評測 【評測】ROG Zephyrus G16 (2024) 外形 手感 打機表現 效能 鍵盤 端子開箱評測 【評測】ASUS ZenBook Duo 外形 手感 功能 使用體驗 屏幕 操控 效能開箱評測