今日凌晨，Apple 就發佈了全新的一批新產品，當中最吸引肯定是 iPhone 6s 及 6s Plus，因為唔止有 3D Touch 熒幕，仲有埋女士最愛的玫瑰金色。另外 Apple 還推出巨無霸 iPad Pro 同埋其他產品，究竟值唔值得買？Edward 就訪問了 unwire 編輯部同事、城中 IT 名人及在 unwire 讀者群中發起投票。現在就睇睇大家點講，為大家是否應該入手給予些意見吧！
Part 1：unwire 編輯部
天恩：最緊要加 RAM！
玫瑰金靚唔靚要睇過實機至知，暫不下評論。因為我唔打機暫時唔覺得 iPhone 6 甚至係上一代的 5s 慢， A9、A8 晶片對來黎說分別不大，反而新機多 1GB 記憶體才是重點（官方未證實），因為 iPhone + iOS8 最大問題係唔夠 RAM，如果夠 RAM 啲 APP 唔使收埋完再開又重新 Load 一次，例如我係 Safari 載入咗個網站要求我 2 步認證，我跳出去 Load Authenticator Copy 個認證碼後，再入番 Safari 佢又重新 Reload 一次，如是者永遠都登入唔到。呢啲問題係 3GB / 4GB RAM 的 Android 手機上甚少發生。
3D Touch + Taptic Engine 可能在 Demo 上大家感覺唔到，但其實佢係好有效減少左手指離開熒幕的次數。以前可能要去按幾次功能鍵，而家有咗 3D touch 就可以按落去個芒面代替，唔同的力度對應唔同的功能，整個使用者體驗應該會提升唔少。
Edward：究竟係玫瑰金定粉紅先？
其實呢個問題困擾咗筆者成晚：你話係玫瑰金就玫瑰金架啦？我覺得係粉紅喎！點都好，iPhone 6s / 6s Plus 的「玫瑰金」色對於女士來講嘅殺傷力就真係幾大嘅。功能方面，筆者本身用開 Apple Watch，如果用法相同對於我來講上手應該唔難，而且係更大熒幕上面用，應該會比係 Apple Watch 上面用方便。反而筆者最 concern 係個鏡頭，Apple 終於肯升像素啦！雖然像素唔等於一切，但係其他手機都去到二千萬像素嘅時候，你叫拿住 iPhone 5c 得 800 萬像素鏡頭的筆者情何以堪呢？但升咗像素究竟畫質可否保持甚至更好？呢個真係要實機到手先知啦。
至於 iPad Pro？Sorry，唔係我杯茶，作為一個帶住平板出街做嘢或者娛樂嘅人來講，我寧願揀 iPad mini 4 囉！
艾露貓：3D Touch 好唔好用用過先知
iPad Pro 個人來講唔啱用，發佈會令我著眼嘅係 3D Touch。本身唔鍾意用 iOS 主要因為大部份情況下無得好似 Android 咁按緊開 Menu 或者做其他事情，要我出出入入，操作好唔方便。今次有 3D Touch 某程度上係「借啲意」解決以上問題。不過各個介面嘅 3D Touch 選單夠唔夠全面，都要等用過先知。
Jacky：做咩唔送埋個座？
全晚最 like 個 iPhone dock，但最唔 like 係要俾錢囉（笑~~）第一代 iPhone 明明係送埋！！
Ken：終於唔洗單手打字
最中意 iPad Pro 的 Smart Keyboard，終於唔使係平板上面單手打字啦。
艾域：iPad Pro 有利設計用家
雖然可能激翻生 Steve Jobs，但其實我覺得 Apple Pencil 配合 iPad Pro，對做 design 或者畫圖友係幾好，所以我比較喜歡呢款產品。
Bowl：Must buy 玫瑰金！
最 like 玫瑰金 iPhone 6s Plus，有粉紅色 must buy，完！
金D：全部都唔鍾意！
完全無突破，全部都唔鍾意囉！
妍嫣：單純鍾意新色
我淨係鍾意 iPhone 6s 佢有玫瑰金揀，但新版對我黎講冇咩大分別，自己用緊 5s 冇壞冇盛其實覺得都夠，唔需要新功能。
依莉詩：玫瑰金高貴好多
iPhone 出新色係好事，玫瑰金冇之前金色咁土豪，高貴好多。但今次升級唔太多，未必吸引人換機。
Part 2：城中 IT 名人
香港互動市務商會主席 Francis 方保僑：終於可以用 Apple TV 係大電視打機煲劇
成晚最 like 其實係 Apple TV，因為終於可以裝 APPS！呢一步其實 Apple 一早要做，而家叫做「遲到好過無到」。諗番大家唔止可以係大電視上面玩類似 Angry Birds 嘅遊戲，仲可以裝唔同電視或者影片 APP，例如：HKTV 用來煲劇，感覺 Apple TV 會實用好多。至於其他產品其實只係一般般，iPad Pro 無錯係多咗支筆，但係我其實覺得好一般。
香港零售科技商會副會長 Joseph 梁偉峯：
先講 iPhone 啦，硬件上真係升級了好多，尤其是它的 3D Touch 熒幕，從昨晚記者會現場 demo 睇，處理訊息方面做得好好，而且有咗呢項功能，智能手機係用途上會多好多，會比而家更好用。至於影相質素方面確實係大躍進，令大家可以唔洗帶相機出街都影到靚相。外型方面，我會揀番傳統金色來買，但從佢 Apple Watch 推出一系列粉色、甚至與 Hermes 名牌合作推出錶帶，再到 Apple Watch 推出磨砂金錶身，再配合玫瑰金色的 iPhone，擺明是想走玩 fashion 的女性市場，呢方面係近年各大國際手機品牌都無乜點做過的。
至於 iPad Pro，其實感覺係 50-50，欣賞係 Apple 確實擺咗好多心機同資源落去研發，效能上亦應該唔會失禮。不過個鍵盤確實有啲失望，完全無 Apple 風格，同 Surface Pro 的鍵盤好相似，如果設計上有突破會開心啲。另外個支 Apple Pencil 係就似乎係好用，但支筆係機身無地方收藏，要另外擺，真係好易唔見，而且仲要唔平！呢啲位我覺得 Apple 似乎考慮得唔夠周詳。
但最重要的，是從過去幾年數字都知，平板市場的銷售一直跌緊，整個市場都係度萎縮。究竟 Apple 有冇辦法靠 iPad Pro 建立出一個新市場？另外作為一般消費者會覺得，iPad Pro 定位同 New MacBook 12 吋好接近，大家都係主攻輕薄流動市場，只係 iPad Pro 多支筆咁解。究竟點樣係兩部機嘅市場之間拿個平衡？呢兩樣都好睇 Apple 功能。另外從昨晚現場 demo 可見，Apple 明顯想借 iPad Pro 主攻專業市場，例如：設計師、工程師、或者需要成日做 present 的人，但呢班人好多都用緊 MacBook Pro Retina 工作，會唔會另外再買多部 iPad Pro 作輔助使用？呢個亦是我比較擔心的地方。
著名本地插畫家 Cuson：Apple Pencil 夠硬似真畫筆
全晚最鍾意 Apple Pencil + iPad Pro 呢個組合，作為畫嘢嘅人感覺好興奮，因為一直都想有一塊屬於自己又可以拎出街嘅繪圖板，而且支 Apple Pencil 好似好勁，畫粗幼線又得，用來寫美術字更加係好 elegant，加上支筆好似幾硬身，如果係嘅話手感應該同用支真嘅畫筆分別唔大。
效能來講，暫時真係未知 iPad Pro 畫嘅嘢嘅效果夠唔夠 quality 做 job 交嘢，真係要件產品正式推出後先知道。不過如果要係 event 入面畫下嘢做 demo，又或者去旅行突然想畫啲嘢，又或者得閒出街寫下生，應該都好足夠啦！
新傳媒 Chief Digital Officer 亞當：
其實無乜驚喜，因為好多產品功能都係預料之中。當中最鍾意都係 iPad Pro，因為佢唔止係一部真正可以取代手提電腦的平板，仲要將好多 WACOM 專業繪畫板的功能放入去並定一個比較平民化的價錢（相比 WACOM 平板來講 iPad Pro 真係算平），呢樣真係好吸引。另外從 Microsoft Office 同部 iPad Pro 整合度咁高，仲可以一次過用兩個 Office APPS 加埋支筆可以咁順，可以預示 iPad Pro 要打入企業市場應該唔難。至於 iPhone，本人就無咩意見，但玫瑰金色估計都會幾受女士用家歡迎吧？
相關文章:
專為酒店房間影音娛樂而設 iPhone 新 AirPlay 功能正式推出 Apple 批准模擬器上架後另一大作 Provenance 將登陸 iOS 和 Apple TV Apple：因應北京政府要求 中國地區 WhatsApp、Threads、Telegram、Signal 下架
分享到 :
最新影片
