每部 smartphone，相信大家每日用得最多，接觸得最多嘅，肯定係個熒幕。究竟全新嘅 iPhone 6s 同 6s Plus 係熒幕質素上又邊部好啲？如果同已經用咗一年嘅上代 iPhone 6 Plus 比較又有冇進步？而家就等 Edward 同大家試真啲啦！
iPhone 6s Plus vs iPhone 6 Plus
等我先拿 iPhone 6s Plus 同上代 iPhone 6 Plus 比一比啦。係今次測試，我會用來瀏覽 unwire.hk 網站同埋網站上面嘅圖片，而光線方面會係正常開白光管嘅室內環境進行，而兩部機熒幕亮度都調至最光。
▲用來睇 unwire 流動版網站主頁，大家可以睇到右方嘅 iPhone 6 Plus 明顯有少少偏冷情況，而左方嘅 iPhone 6s Plus 就色溫表現好正常。
▲至於睇細節方面，大家可以睇到兩部機都可以唔洗放大都睇到細節，spec 一樣當然理論上清晰度兩部機都應該一樣。不過呢個比較多白位嘅版面就更容易睇到右方嘅 iPhone 6 Plus 明顯比左方嘅 iPhone 6s Plus 藍少許。
▲至於睇相方面，大家可以睇到上方嘅 iPhone 6s Plus 同下方嘅 iPhone 6 Plus 其實差唔多，只係 iPhone 6s Plus 色水明顯較深較實淨，iPhone 6 Plus 相比之下就比較淡。但整體來講，兩個熒幕係顯示上都係水平幾高。
▲小篇再用 Spyder 5 測試熒幕白平衡指數，可見 iPhone 6s Plus 係讀數上，白色讀數為 6958K，同真正白色嘅 6500K 好接近。至於亮度方面，就為 575.83 cd/m2。
▲至於已經用咗一年嘅 iPhone 6 Plus，用 Spyder 5 測試到白色讀數為 7272K，比 iPhone 6s Plus 明顯偏冷少許，呢樣亦印證到之前睇網頁個時嘅結果係正確。至於亮度方面就為 542.28 cd/m2，可見 iPhone 6s Plus 係最光情況下，再比上代 iPhone 6 Plus 光啲啲。
相關文章:
iGBA 模擬器下架原因涉抄襲 Apple：複製其他開發者的模仿品 彭博：iOS 18 將推出 AI 功能 手機上直接運行不依賴雲端 iPhone 生產靠攏印度 數量加倍佔總產量 14%
總結：iPhone 6s Plus 熒幕無跌 watt
如果單從上面結果來睇，新機 iPhone 6s Plus 係熒幕質素上，似乎真係比上代 iPhone 6 Plus 出色得多。不過要留意嘅係，筆者嘅 iPhone 6 Plus 已經用咗成年，而熒幕用咗成年點都會有損耗，色水準確度點都會有所下降，所以如果以用咗一年嘅 iPhone 6 Plus 來同新機比，實在唔算好公平。所以整體來講，Edward 只能話新嘅 iPhone 6s Plus 同舊機相比，水準依然 keep 得住無跌 watt，都仲係咁清咁準色，大家唔洗擔心啦。
iPhone 6s vs iPhone 6s Plus
至於兩部新機 iPhone 6s 同埋 iPhone 6s Plus，究竟邊部機嘅熒幕表現好啲？而家就等 Edward 再同大家試一試。
▲瀏覽 unwire.hk 流動版主頁，可見兩部機白色都好準，而且都好清晰，我覺得 iPhone 6s 係清晰度上甚至比 iPhone 6s Plus 高少少。
▲至於睇細字，亦可以見到 iPhone 6s 係字體顯示上真係比 iPhone 6s Plus sharp 丁點。不過筆者翻查數據，iPhone 6s 嘅 750 x 1334 解像度熒幕，點距為約 326ppi，同解像度為 1080p，點距為約 401ppi 嘅 iPhone 6s Plus 熒幕相比，後者理應更清晰。但為何會有此結果？筆者仲要啲時間查證。
▲至於睇相方面，上面嘅 iPhone 6s 同下面嘅 iPhone 6s Plus 係顯示顏色方面都好出色，所以基本上表現都係差唔多。
▲我再用 Spyder 5 測試兩部機嘅熒幕白平衡讀數，可以見到 iPhone 6s 嘅白色讀數為 6844K，而亮度就係 554.62 cd/m2。
▲同埋之前呢個 iPhone 6s Plus 嘅結果比較，可以見到 iPhone 6s 係白色準確度上更勝一籌，但實際上相差只係極微，一般人用肉眼真係睇唔出分別。至於亮度方面，明顯 iPhone 6s Plus 係光少少，但個 20 cd/m2 左右嘅分別，同樣係一般人好難用肉眼睇得出嘅。
總結：iPhone 6s 細字顯示更清原因未明……
至於兩部新機熒幕比較，從結果可以見到真係好難比，因為根本係表現上兩部機係無乜分別，水準都係係同一水平。不過 Edward 發現到熒幕較細嘅 iPhone 6s，係顯示細字上似乎比大機 iPhone 6s Plus 更加 sharp，但明明細機嘅熒幕點距係比大機細。呢一點，筆者仲係諗唔明。但實際睇起來，確實係有呢個情況。
相關文章:
iGBA 模擬器下架原因涉抄襲 Apple：複製其他開發者的模仿品 彭博：iOS 18 將推出 AI 功能 手機上直接運行不依賴雲端 iPhone 生產靠攏印度 數量加倍佔總產量 14%
分享到 :
最新影片
