早前外界傳出 Huawei 會推出一部有類似 Force Touch 功能的手機迎戰 iPhone 6S，果然係無錯！Huawei 昨日話我哋知的確會推出一部有類似 Force Touch 功能嘅手機，不過就唔係以下講嘅依部，而係 Mate S 極緻版，咁今次籮文試嘅依部 Mate S （非極緻版）有咩特別呢？以下有更多內容：
造工細緻 金色好 Grand
Huawei Mate S 採用一體化金屬機身，造工細緻。機背採用曲面設計，邊緣有斜邊切割而且好薄，根據官方資料最薄嘅位置得 2.65mm。機身用咗噴砂工藝，令金屬表面唔會好似 iPhone 6S 咁跣手，像素密度達 400 ppi 嘅 5.5吋 1920 x 1080 屏幕用上 2.5D 孤面玻璃，更加係錦上添花，整個機身設計俾籮文嘅感覺係好有貴氣，完全無大陸機 feel。
▲一體化金屬機身
▲機背有曲面設計
▲邊緣有斜邊切割而且好薄
▲邊緣有斜邊切割而且好薄
指紋 0.5 秒解鎖 辨識器可以用作 Scrolling
Huawei 就話俾籮文知 Mate S 嘅指紋辨識器比其他機都快好多，我梗係即時登記我個指紋試下啦！登記嘅時候籮文只係掂咗個辨識器 4 下 至 6 下，10 秒都唔使 Mate S 就話我知已經登記好，相比起其他手機（例如：iPhone 6 籮文通常用近半分鐘時間），Mate S 果然係快好多。快不特止，Huawei Mate S 終於將手機嘅指紋辨識器用到盡，當你用手指喺辨識器度向下拉，就可以拉出通知欄，連 Tap 兩下就可以清除通知，睇相嘅時候可以左右翻頁，影相時又可以用黎當快門，單手操作手機時此功能係極之方便！
▲指紋辨識器用到盡，抵讚呀喂
相關文章:
【評測】Huawei Pocket 2 國行 外型 手感 體驗 屏幕 相機 效能開箱評測 【評測】Huawei MatePad Pro 13.2 港行 外形 手感 鍵盤 星閃筆 屏幕 效能深入評測 【評測】Huawei FreeClip 外形 佩戴感 隔聲效果 開箱評測
未有 Force Touch 住 指關節技術頂住先
Huawei 表示幾個月內會推出擁有類似 Force Touch 功能嘅 Mate S 極緻版，放個橙上去榜下有幾重都仲得，不過可惜依部 Mate S 就冇依啲功能，但都有個有趣嘅指關節技術，只要用指關節喺 Screen 上畫 C 字就可以開相機、M 字就可以開 Music，用一隻手指關節雙敲就可以 Cap Screen，兩指手指關節雙敲仲可以錄一條 Screen Capture 嘅影片！其實類似功能喺 Asus Zenfone 2 等手機都有，不過 Zenfone 2 只能夠喺 Lock Screen 嘅時候以手指頭用此功能，而 Mate S 由於可以透過靜電及陀螺儀分別到你用緊手指定係指關節，所以無論 Lock Screen 或是 Unlock 咗都可以用到。
▲講咗咁耐或者你都未知道邊度係「指關節」，其實未姐係依度囉
影相有手動模式 睇黎已經係手機必有功能
Huawei Mate S 主鏡頭有 1,300 萬像素，RGBW 四色傳感器比普通嘅 RGB 傳感器多咗白色，加上 OIS 光學防手震，理論上黑暗環境影相採光度及清晰度都更高。而前置 800 萬鏡頭配以柔光燈，啱晒喜歡自拍嘅人士。Mate S 相機功能中最值錢之處就係有「專業相機模式」，其實即係類似 LG G4 嘅手動模式，可以自訂 ISO、快門、白平衡等，影相更加有彈性。
▲「專業相機模式」，其實姐係類似 LG G4 嘅手動模式，可以自訂 ISO、快門、白平衡等，影相更加有彈性。
▲ 雖然 RGBW 四色傳感器 比普遍嘅 RGB 傳感器多咗白色，但暗攝效果未見好突出，暗位都係黑色一撻
▲前置800萬鏡頭配以柔光燈，岩晒喜歡自拍嘅人士，當然美肌功能唔少得，上圖為美肌功能（關），下圖為美肌功能（五級）
雙卡雙待 Huawei 自家 HiSilicon Kirin 935 處理器
Mate S 採用自家 HiSilicon Kirin 935 八核 64bit 處理器，3GB RAM 及 64GB 內置儲存空間，64GB 都唔夠用仲可以插高達 128GB microSD 卡。中港用家都可以用 Mate S 雙卡雙待，兩邊走都唔使頻頻換卡。2,700 mAh 電池備用時間去到 440小時，通話時間都可以去到 14小時。
籮文：「指關節技術似 Gimmick 野，不過指紋辨識器用到盡，抵讚」
今次 Mate S 雖然未有類似 Force Touch 功能嘅加持，不過主打指關節同指紋，都幾矚目！不過用落，指關節技術就似係 Gimmick 野，試想下你用用下部手機要拎個指關節出黎掃，其實好唔就手囉。反而 Huawei 將 Mate S 嘅指紋辨識器用到盡，用落感覺似係將 Touch Screen 伸延到機背，整個使用體驗係好 User Friendly 而且方便度真係大增，如果各廠商都好似 Huawei 咁叻叻，將指紋辨識器用到盡，世界一定更加美好。
相關文章:
【評測】Huawei Pocket 2 國行 外型 手感 體驗 屏幕 相機 效能開箱評測 【評測】Huawei MatePad Pro 13.2 港行 外形 手感 鍵盤 星閃筆 屏幕 效能深入評測 【評測】Huawei FreeClip 外形 佩戴感 隔聲效果 開箱評測
分享到 :
最新影片
