日本嘅 Good Design Award 已有近 60 年歷史，每年獲獎嘅產品唔少都係由大牌子生產，唔出奇丫！大公司有人力物力，攞獎非常合理。但係今年嘅 Good Design Award 2015 大獎－BEST 100 入面竟然有來自香港初創企業嘅產品－Air Button ，60 年嚟首次有香港公司攞獎，成績非常令人鼓舞！Air Button 原來係一粒用嚟簡化電話操作嘅按鈕，經小編一查之下，發現原來 Air Button 團隊係數碼港培育計劃成員，小編當然唔會錯過呢個機會同佢哋傾吓計啦！
一按即開簡化程序
Air Button 嘅用法非常簡單，無須用電，亦不佔用電話上任何連接孔。按鈕波浪型設計，有單制或雙制選擇。只要你將佢貼上手機，開啟近場通訊（NFC）將 Air Button 連接電話，然後用 Air Button 專屬 Apps 來設定按鈕嘅功能，例如影相、錄音、縮屏、打電話俾指定聯絡人、飛線轉駁等等，有三十幾個選擇。設定完成後，你就可以隨時喺任何畫面㩒一下個制開啟功能，令電話操作簡單咗好多。
數碼港助研究開發
Air Button 嘅 CEO 黃議德（Oswis）最初嘅諗法係源於「平安鐘」，Oswis 話佢讀大學嘅時候，諗過製作一個移動平安鐘俾老人家使用，後來由於智能電話日漸普及，卻發現冇照顧到老人嘅需要，所以就研究有冇方法更方便佢哋使用智能電話，於是萌生咗加粒制上去簡化操作嘅念頭。喺 2012 年嘅時候，佢已經得到數碼港創意微型基金（CCMF）資助，研發利用近場通訊（NFC）連接按鈕及電話，後來，Oswis 與同屆 CCMF 中研發其他項目嘅成員林世聰（David）及其同事一拍即合，合組公司主力研發 Air Button，2014 年更入選為數碼港培育計劃成員。
相關文章:
私隱公署：數碼港資料外洩涉 5 項違規缺失 逾保留期限仍未刪除
開發硬件比軟件難 10 倍！
當佢哋研究緊嗰陣，發現智能手機愈來愈大部，一隻手根本不夠操作，而且好多人其實來來去去都只係用電話上嘅幾個功能，例如睇 Whatsapp、電筒、影相等，與其於頁面上掃來掃去搵 Apps 搞設定，何不直接㩒快捷鍵一按即用？於是佢哋認定呢個功能係有好大嘅市場空間。
但一講到設計同生產，Oswis 直言「做硬件比軟件難 10 倍，仲要預多起碼 5 倍資金！」，因為做軟件嘅話，你整完一個 Version、做測試，有 Bug 可以隨時搵同事修改，改到啱先出； 但係做硬件就完全唔同，無論係設計、製模具、生產，定係做 RFID 測試，所有過程都牽涉好多錢同時間，整咗出嚟唔靚，又要重新設計，模具又要整過。David 話「淨係手感同按鍵力度，我哋都調整過好幾次，更何況係 Air Button嘅外型！」除咗生產過程嘅問題，最大嘅困難係香港好少人從事工業設計，要搵這個專業嘅人出來本身已經夠難，加上同國內廠房溝通又是另一個難題，因為國內嘅標準同佢哋嘅要求有一定距離，需要一段時間磨合，種種因素加起來令投資成本增大好多。不過因為佢哋加入咗數碼港嘅培育計劃，數碼港為佢哋提供人脈及對外支援，搵人幫手嘅時候更加得心應手。
積極應付 Good Design Award
搵到設計師開工之後，設計師更鼓勵佢哋參加 Good Design Award，Oswis 回想起最後遴選當日嘅情況，各個參賽團隊均要整個 Booth 展示自己嘅產品，眼見對面佔咗成行嘅「小米」枱面放晒啲產品出嚟「晒冷」，佢哋後面係「美的」又係成行產品，隔離左右除咗其他大 brand 之外仲有其他設計大賽嘅得獎者，而佢哋張枱就只係得幾部平板電腦同埋幾粒 Air Button，望落有點寒酸。Oswis 佢哋心諗「唯有盡力啦」，點知 Demo 嗰陣評判好欣賞，有咁好嘅成績令佢哋喜出望外。
山寨抄襲未驚過
Air Button 嘅設計及生產都喺國內進行，小編問佢哋唔怕被抄襲咩？Oswis 氣定神閒，認為「好嘢先會俾人抄，如果冇市場邊有人得閒抄你。」佢就唔擔心會有「山寨貨」喇，因為 Air Button 唔淨止係賣粒制咁簡單，而係整個體驗，嚟緊仲會有更多功能加入去添。而且佢哋仲等緊 Apple 開放 iOS 入面個 NFC 嘅 API，等 iPhone 用家都可以用到 Air Button，開發嘅路還有很長呢！
Air Button 正在 Kickstarter 上開始預售，有興趣嘅朋友不妨上去 Back 返粒玩吓。
相關文章:
私隱公署：數碼港資料外洩涉 5 項違規缺失 逾保留期限仍未刪除
分享到 :
最新影片
