今次依部 A9 並唔係 HTC 旗艦嗰部 A9，而係 Samsung Galaxy 系列嘅中階機。採用 6 吋 1080p Super AMOLED 熒幕、Qualcomm Snapdragon 652 八核心處理器 + Adreno 510 圖像處理晶片。擁有1,300 萬像素主鏡頭（採用 S5K3L2 感光元件）、F/1.9 大光圈、支援光學防手震、內建 LED 補光燈，同時有F/1.9 大光圈 800 萬像素前置鏡頭，內建指紋辨識器，而電量擁有 4,000mAh 亦是一大重點，想知有幾抵玩就請繼續閱讀。
外型與 A5 A7 如出一轍
雖然 A9 係中階機，但貫徹 A 系列高性比嘅特點，今次2016版的 A5，A7、A9 機身都用到平時只會於旗艦機（即 Note 5、S6等）上先會見到嘅玻璃、金屬雙工藝機身。邊框用上金屬材質，造工精細，斜邊切割令光線折射更閃亮，而機面及機背都有 2.5D 玻璃面，機身更圓渾，上手感覺絕對有旗艦級的手感。A9 (2016) 有三種顏色，分別為粉色、金色、白色，籮文最欣賞粉紅色，感覺上比 iPhone 6s 嘅玫瑰金更玫瑰。
▲籮文最欣賞粉紅色，感覺上比 iPhone 6s 嘅玫瑰金更玫瑰。
▲機底可以見到 3.5mm 耳機孔、MicroUSB位 及 喇叭位
▲斜邊切割令光線折射更閃亮
▲雖然屏幕有6吋大，但係邊框窄，上手都唔會太大部
6 吋 1080p 屏幕 聞相細緻度無 2K 咁正
雖然有 Note 5 同 S6 嘅影子，但屏幕就由 2K 變成 1080p。A9 擁有 6 吋屏幕，屏幕像素密度有 367 PPI，細緻度當然唔及 2K ，細心「聞芒」文字邊會有小小情況，但係色彩就非常 Sharp，尤其 Samsung 原裝介面顏色運用都好豐富，令屏幕更搶眼，而屏幕都有 2.5D玻璃面，令畫面睇落勁有立體感，好似浮出黎咁，同時支援「螢幕模式」選擇，自動跟據情景優化屏幕飽和度及對比度等，但係就冇得自訂屏幕色溫。蘿文覺得其實 2K 及 1080P一般用分別唔大，但夾住佢自家的 Samsung Gear VR 的話就有分別了。
▲屏幕像素密度只有 367 PPI，細緻度就麻麻，細心睇就可以見到文字邊會有起格情況
▲但係色彩就非常 Sharp，尤其 Samsung 原裝介面顏色運用都好豐富，令屏幕更搶眼，
▲而屏幕都有 2.5D玻璃面，令畫面睇落勁有立體感
相關文章:
【評測】Samsung Galaxy A55 外形 手感 屏幕 相機 效能開箱評測 Samsung 發表全新 LPDDR5X RAM 速度最快對應流動和伺服器 AI 應用 Samsung AI 電視 2024 香港售價、最新 AI 功能詳解
搭載指紋辨識功能
跟新一代的 A5、A7 一樣，A9 於 Home 制上搭載指紋辨識功能。籮文試過，雖然登記指紋需時比其他手機長，需要按壓廿幾次，而且指紋登記數量都比其他手機少，只可以登記三隻手指，但係解鎖速度同準繩度都十分高，可以話係一勞永逸。仲有一個以指紋網站登入功能，可以使瀏覽器記住用家嘅 ID 同 Password，下次只要按一下指紋就登入，但係依個功能就只適用於手機原生瀏覽器。
▲跟新一代的 A5、A7 一樣，A9 於 Home 制上搭載指紋辨識功能
▲籮文試過，雖然登記指紋需時比其他手機長，有時需要按壓廿幾次
▲雖然登記指紋需時比其他手機長，需要按壓廿幾次，而且指紋登記數量都比其他手機少，只可以登記三隻手指
▲仲有一個以指紋網站登入功能，可以使瀏覽器記住用家嘅 ID 同 Password，下次只要按一下指紋就登入，但係依個功能就只適用於手機原生瀏覽器。
主相機有大光圈 ＋ OIS
A9 影相當然唔及大佬 S6 有 1,600 萬像素，但係1,300萬像素鏡頭擁有 f/1.9 大光圈 及 OIS 光學防手震，而前鏡頭都有 800 萬像素，岩晒鍾意 Selfie 嘅朋友。大光圈同 OIS 除咗令吸光度增加，亦讓用家更易拍出前清後朦淺景深效果，但 A9 拍照油畫化頗嚴重，但始終係中階機，都算可以接受。而相機對焦速度都幾快，中階機之中確實難得一見，果然係有旗艦機嘅味道。
▲鏡頭輕微突出，小心整花呀！
▲係1,300萬像素鏡頭擁有 f/1.9 大光圈 及 OIS 光學防手震
▲測試相片：可以見到動態範圍較細，令酒樽爆光。
▲測試相片：放大睇就見到油畫化問題頗嚴重
▲美顏功能可以瘦面、大眼及美妝。想變「蛇精男」？冇難度！
▲睇完蛇精男，睇返靚女中和一下。見到依兩年都食好多新年食品嘅 Angela Yuen。800萬前鏡雖然像素唔算好高，但影出黎質素都唔錯架！
同級手機之中 罕有大電池
A9 用上 3GB RAM， 8核 CPU，用起上黎都好順，未有窒機情況發生，相信都與介面優化有關。儲存空間有32GB，當然亦支援 Micro SD 擴充，但就不能同時享有雙咭雙待功能。電池方面，A9 有 4,000mAh，同級手機中，A9的電池容量是罕有地大，相信真係可以用足一日。
籮文：「影相有大光圈及OIS 中價機 旗艦味 」
A9 雖然係中階機，但機身俾我嘅感覺係非常高級，造工十分精細，用上玻璃、金屬雙工藝機身。而機面及機背都有 2.5D 玻璃面，更加令我眼前一亮。仲加入指紋感應，絕對俾到我一份旗艦級手機嘅味道，賣四千都係抵俾。不過影相方面就有少少失望，雖然主鏡有1,300萬像素，但油畫化問題略為明顯，對相機有高要求的朋友就要注意啦！
售價：$ 3,998 港元
查詢：3698 4698 (Samsung)
相關文章:
【評測】Samsung Galaxy A55 外形 手感 屏幕 相機 效能開箱評測 Samsung 發表全新 LPDDR5X RAM 速度最快對應流動和伺服器 AI 應用 Samsung AI 電視 2024 香港售價、最新 AI 功能詳解
分享到 :
最新影片
