踏入二月，亦即係意味著新年同情人節嘅來臨；如果仲未諗到買咩禮去拜年，或者送咩比女朋友的話，不妨考慮下蛋糕同 Cupcakes 。今次小編嚟到 Twinkle Baker Decor ，發現佢地已經為新年同情人節做好準備，更大玩中西 fusion 添。而且不單止好食，賣相仲好得，啱晒俾你同一班親朋好友或者女朋友影相擺 Facebook 同 Instagram 大肆炫耀啦！
新年新口味！ 當西式嘅 Cupcakes 碰上中式嘅材料
Cupcakes 大家平時可能都食唔少，可能係雲呢拿，可能係紅絲絨。不過你又有無諗過一啲中式材料好似蓮子同桔柑都可以用嚟做 cupcakes 呢？今次 Twinkle Baker Decor 特地為新年推出三款中式口味：蓮蓮有餘 ﹑ 桔祥如意以及桃運當頭。另外，更推出咗一款限定嘅大桔柑造型柚子味海綿蛋糕：金柚報喜。
蓮蓮有餘
「蓮蓮有餘」內含蓮子蓉同蓮子粒，清甜而不膩。而且配以糖銅錢裝飾，加埋蓮子嘅寓意「連年有餘」作名，送比長輩就最適合不過！
桔祥如意
用橙味蛋糕底配上柑桔口味 Butter Cream ，一個字： Fresh ！蛋糕面加上可食用『吉』字揮春，用嚟拜年送禮就最 perfect 池啦！
桃運當頭
用蜜桃果肉粒粒作餡料嘅「桃運當頭」，加上蜜桃口味 Butter Cream 同埋桃花裝飾，相信俘虜到唔少女性想試試呢！
金柚報喜
大桔造型海綿蛋糕嘅「金柚報喜」，配上柚子口味餡料同柚子口味果醬，充滿果香嘅鬆軟口感，就連小編都試上癮！而且寓意著祝福新一年大吉大利，非常應景。（P.S. 此為期間限定，由現在起至年初七均可於尖沙咀專門店購買）
情人節將至 經典口味顯愛意
除咗一啲比較新奇嘅口味，亦都有專為情人節而設嘅經典口味：士多啤梨同朱古力。
Berry Love Cupcake
Berry Love Cupcake 結合士多啤梨果茸同紅莓果肉，微酸同微甜嘅結合非常夾，賣相亦十分討好，用嚟表白或者送俾女朋友實加分！
Choco Romance Cupcake
朱古力蛋糕底配上朱古力 Butter cream ，而蛋糕底裡面亦含有朱古力碎粒同 Ganacher ，多重朱古力口味係每個 Chocolate Lovers 必試嘅 cupcake 之一啊！
Heart to Heart
佢唔係 Cupcake ，但小編尤愛佢有啲似啫喱有啲似慕絲嘅口感，較 Cupcake 濕潤嘅 Heart to Heart 都係小編嘅至愛。紅桑子配上朱古力，酸中帶甜，難以形容嘅好味啊！
Billy 點評
香港買到嘅 Cupcakes 一般比小編感覺太甜太膩，食幾啖其實就已經非常「滯」；但今次係 Twinkle Baker Decor 食到嘅幾款新年同情人節口味都比較 fresh ，香港人亦容易接受。而小編特別想推薦嘅係金柚報喜，因為佢個外型真係似足一個桔，而更強勁嘅係連皮嘅質感都模仿得到，柑桔加埋橙皮所製成更令味道提升一個層次！
蓮蓮有餘 ﹑ 桔祥如意以及桃運當頭： $38 / 件
金柚報喜： $268 / 個
Berry Love Cupcake 及 Choco Romance Cupcake ： $38 / 件
Heart to Heart ： $55 / 件 （ $100 兩件，更可獲贈手工糖）
Twinkle Store ：九龍尖沙咀東麽地道 63 號好時中心 2 樓 282 室
查詢：2114 0052
同場加映： 蛋糕裝飾工作坊
除咗可以買現成 Cupcakes 外，鍾意自己落手製作嘅朋友亦可留意下 Twinkle 定期舉辦嘅工作坊。小編係過去活動參加過 Twinkle 所舉辦嘅工作坊，簡單而又不失趣味性，對於毫無經驗嘅小編都唔怕會失敗。而 Twinkle 導師定期會係 Towngas 煤氣烹飪中心教授蛋糕裝飾技巧。係今個二月將會以 Teddy Bear 同 Love Roses 為題，教授點樣可以裝飾出精緻嘅 Teddy Bear 同 Rose Cupcakes ，不失為情人節同另一半參加嘅一個好節目！
詳情可於煤氣烹飪中心網站（請按此）查詢，於關鍵字搜尋 Twinkle 。
分享到 :
最新影片
