上個月係 Kickstarter 開始集資的 Lomo’Instant Automat 短短6 小時內已成功衝破 10 萬美元的目標集資金額，到底呢部即影即有咩特別，吸引到咁多人搶購呢？等我依莉詩話俾大家知啦！
全自動模式融入「細相紙」即影即有相機
Lomo’Instant Automat 同 Lomography 早前兩部即影即有相機嘅外型近似，備有經典別緻的黑色、極簡主義嘅白色、成熟棗紅色皮革同 Kickstarter 獨家限量設計色系 4 個款式。而獨特之處在於 Lomo’Instant Automat 將 Lomo’Instant Wide 嘅全自動功能融入「細相紙」即影即有相機中，會自動因環境亮度而決定快門速度。咁就算唔識光圈、快門都可以影到靚相。另外，呢部機可以自行選擇是否開閃光燈，而閃光燈強度亦會因應焦距自動增減，所以唔怕因為無得熄閃光燈，導致出現過曝的情況。如果都係覺得光度不足，仲可以使用曝光補償功能，將 EV值 +1 或 -1 度。比起同樣使用「細相紙」的 Lomo’Instant 更易上手，唔會大量浪費相紙，先影到張滿意作品。
▲ Lomo’Instant Automat (右) 機身比起 Lomo’Instant (左) 略細，不過重量差唔多。
▲ 兩的的機身厚度相約，但 Lomo’Instant Automat 厚度比較凸出。
▲ 無論背光或是昏暗的環境，只要隨意按下快門，就可以拍到清晰的影像，比 Lomo’Instant 更易上手。
設計改良更易掌握
除了自動測光，Lomo’Instant Automat 亦改良了幾個設計，用起手上嚟更易掌握。與上一代一樣，Lomo’Instant Automat 採用三段對焦，但以住每次轉焦都需要用肉眼睇清楚鏡頭上的標記，而今次每轉換對焦距離有卡住上鎖的感覺，令對焦變得更輕易快速。另外，Lomo’Instant Automat 改用 LED 提示燈顯示餘下的底片數目，比起之前用數字顯示更易明白。最特別是快門鍵與自拍鏡合併，變得更加簡約。鏡頭同樣使用三段式對焦，分別係用於拍攝大頭的最近的對焦距離 (0.6m)、保持 1 – 2 米的距離拍攝、或拍攝風景的無限遠拍攝。雖然從觀景器無法睇到對焦是否準確，不過轉換焦距會有卡住上鎖的感覺，令對焦變得更輕易快速。
▲ 鏡頭同樣使用三段式對焦。
▲ LED 提示燈顯示餘下的底片數目，比起之前用數字顯示更易明白。
▲ 快門鍵與自拍鏡合併，變得更加簡約。
▲ 改用按鈕轉換拍攝模式，比起啪掣更易轉換。
▲ 背後的符號十分特別，很難解讀呢！
▲ 一如以往，鏡頭蓋唔止用嚟保護相機鏡頭，更同時扮演遙控快門。無論自拍、團體照、無限時長曝都唔駛再假手於人！
3鏡頭更換
玩得 Lomography 的即影即有當然唔會留於自動模式。Lomo’Instant Automat 如時配備多個配件，如外置廣角鏡、近攝鏡、照片拍攝分割器等，令即影即有攝影的可能性跳升至另一層次。
▲ 不過外置鏡頭都是黑色，裝上其他顏色的機身變得格格不入。
▲ 換上廣角鏡可以拍下更廣闊影像，不過 Automat 沒有好似 Wide 配上廣角鏡專用的觀景器，所以闊咗幾多要估估下。
▲ 裝魚眼鏡後，同樣因為唔可以係觀景器知道拍攝效果，所以要影完先知係咩樣呢！
▲ 裝上近攝鏡後，最近對焦距離可近至 0.1m。因為所拍的物件太近，而觀景器同鏡頭有一定距離，所以未必對得啱位。呢個時候最好唔用觀景器，用目測會比較好。
多功能跳出攝影框框
同其他牌子的即影即有相機最大的分別就係 Lomo’Instant 系列具備不同的創意功能， B 快門、多種曝光等令攝影變得更好玩。今次呢部 Lomo’Instant Automat 當然唔少得呢 D 功能啦！
▲ 只要拍攝前按下機身上的 MX 切換鍵，之前按下拍攝就可以係同一張菲林上重覆進行曝光，拍攝出特別效果。
▲ 既然有多重曝光，就一定唔少得鏡頭分割器。利用分割器，每次拍下上下或左右其中一邊的影像，然後再拍另一邊就可以將兩次拍下的影像拼貼成一張相片。如果利用腳架固定拍攝背景，仲可以拍出兩個我添！
▲ 如果想為相片加點藝術氣息，可以利用顏色濾片放於閃光燈上拍攝，咁就可以令相片有五彩繽紛嘅效果。
依莉詩：「更易控制！唔再浪費相紙」
Lomo’Instant Automat 已經係我試過的第 3部 Lomo’Instant系列即影即有相機，相比起之前兩部，我覺得更加易上手，自動測光同轉焦時的上鎖感覺都令拍攝更容易控制，就算玩多重曝光都唔算燒得太多相紙，無之前咁肉痛。加上 Automat 的體積比較細，旅行帶出街影都方便。
Lomo’Instant Automat
Kickstarter 優惠價：USD112-149 （約 HKD895 – 1190）
預計零售價：USD149-199 （約 HKD1190 – 1590）
分享到 :
最新影片
