KF900 重新江湖，價位冇乜點跌，企穩o係 $2,780。
先達真係有好多野估佢唔到！上年 2 月出o既第二代 PRADA 手機 LG KF900，第一批水貨到港時俾人炒到 $6,000，遲少少出o既行貨，定價亦係 $6,200。不過，過o左冇耐水貨就插到唔清唔楚，最後跌到三千幾，跟手仲失埋蹤，冇舖再賣。本來以為佢會就此 Bye Bye，點知過o左幾個月，連行貨都已經消失埋，近排水貨居然重出江湖！更估唔到係佢個價冇乜點跌，竟然仲賣緊 $2,780，只係左幾百，唔通 PRADA 個名真係咁值錢？
同 KF900 一齊出o既藍牙手錶 PRADA Link 水貨，最近一樣翻生，但佢就冇 KF900 咁好彩，個價唔多撐得。佢o係上年 4 月到港時賣成 $3,200，過o左一陣就冇o左影，今鋪出現番個價已插到 $1,680 左右，冇o左一半！冇計啦，隻野實用性唔大，又的確冇乜人買o既！
其實唔止 KF900，就連 07 年出o既第一代 LG PRADA KE850，先達到而家都仲有少量水貨貨尾賣，售價都大約係 $1,680，呢個系列手機o既生命力真係頑強過小強！之但係，班友係咪真係o係外國搵到咁多舊機水貨呀？可能有好多係鬼機o黎，老老實實，我就唔建議大家買喇！
PRADA Link 就削 D，已經插到$1,680。
