iPad 推出首日，我串哥覺得佢係一部放大版的 iPod Touch，無乜作為唔會大賣，不過拜讀貴站的”放大版 iPod Touch?非也! 真正分析 Apple iPad 軟件及巿場” 一文後，就覺得幾有道理！點解突然又拿 iPad 黎講呢?事關串哥發覺呢排成日有客走入黎問有冇 iPad賣，我心諗呢度係大型電器連鎖店呀，你估水貨舖呀?買水貨去先達啦。忍住淡氣覆個客話無，佢仲要話睇雜誌講有得賣喎，五千幾丫嘛！嘩果下真係唔得你死，好啦都忍住向佢解釋我地無買水貨，解釋完又再問你行貨幾時有，幾錢等等．．呢個過程如是者日日都有十幾單，你都咪話唔誇張。個個講到 iPad 咁廢，又咁多人買？點解呀?
我有3個朋友買左 iPad ，佢地都係外國託人幫手運番黎，我話你地都唔係成日睇書，唔通買部 iPad 突然變書童?日日坐車睇電子書。佢地話睇書係其次，最重要係用黎做Presentation，比個客睇。呢三個朋友，一個保險佬、一個攝影師、一個個地產。特別係個地產friend ，佢講到 iPad 好似神賜的恩物咁，佢話：你知啦我地帶人睇樓，日日企係樓盤附近搶客睇樓，以前出奇招買過 tablet ，即時播d相同資料比個客睇，點知見到個客行到埋去都未著到機，叫個客等等人地真係唔等你就走左去，有d客好心等你開到機，但係部野好快咁開下關下就無晒電，又重，大拿拿幾千銀買部廢機！iPad 就正啦，一開就到唔使等，手指篤篤轉相快，仲有 keynote 可以播下 Powerpoint，舊電充一次夠我用兩三日！同埋你拎住iPad去搶客，好多客會好奇你部iPad企定定係度比你sell，有幾個行家見到我咁都拿拿林整番部慌死蝕底!
講到呢度，攝影師朋友又搶住喇，係呀以前我帶部macbook pro 出黎 show d 相比 client 睇，又係要等boot機麻煩又重，又要成日叉電 ，而家 iPad 個芒不知幾靚仔，好多暗位都display到，顏色都好準，就算你比幾皮野買部頂班notebook都未必有咁靚的display質素啦。見佢地講到眉飛色舞，我就搶左佢地手上部 iPad 過下手癮，E!真係同想像中差好遠，個芒真係好靚，反應好快，我用佢開 unwire.hk 睇真係舒服過係 iPhone 睇好多，跟手試埋個keyboard，又真係勁好feel，打英文好快，希望佢快d有倉頡啦，玩完之後已經中左毒，我諗 iPad 有行貨我會買番部！iPad 廢?朋友你玩過未?
相關文章:
【教學】iPad / iPhone 運行 Windows XP 實試 PC 模擬器玩《小朋友齊打交 2》 全球平板出貨升 11% iPad 接近零增長市佔率下跌 傳 Apple 推平價 Magic Keyboard 支援 iPad 預計 2025 年面世
分享到 :
最新影片
