估佢唔到！明明睇住 iPad 個價插唔停，上星期尾終於插到落 $4,980，正當個個諗住入貨果陣，點知呢幾日又黎個 「 V 」型反彈，又再升番上 $5,580，真係要學《大內密探零零發》個羅家英講句：「好難捉摸呀！」
因為多貨，16GB iPad 到左先達唔夠兩個禮拜，就由最高炒價 $6,800 插到 $4,980。只要調番轉頭諗，就會知道點解佢又升番價，冇錯！因為 iPad 到港貨量已開始減少。雖然 Apple 肯定生產左勁大批貨先出機，但係全世界都去美國搶購喎，多多都搶晒啦！所以聽先達班老細講，早幾日落o既 Order 都黎唔足貨，仲要全港都係咁，於是咪一齊 Mark 番高個價囉。
$5,580 係今日 16GB 售價o既中位數，價位大約由$5,380 至 $5,680 不等。至於 32GB 同 64GB，D 舖頭通常都係一千一千咁加上去，即係 32GB $6,380 至 $6,680、64GB $7,380 至 $7,680。但由於 64GB o既貨量更加少，所以有 D 舖頭已經冇貨賣，而家想買除左要捱炒價仲要碰下運氣有冇貨啦~
【教學】iPad / iPhone 運行 Windows XP 實試 PC 模擬器玩《小朋友齊打交 2》 全球平板出貨升 11% iPad 接近零增長市佔率下跌 傳 Apple 推平價 Magic Keyboard 支援 iPad 預計 2025 年面世