採用嶄新 OS o既落雞亞 N900，水貨出左成 4 個月，但行貨遲遲未見影，傳聞係因為搞唔掂個中文介面。不過近排我見先達舖同電器舖，都開始貼晒預訂廣告，又擺住個 Dummy 畀人玩住先，落雞亞亦定o係下星期四搞發布會，睇o黎行貨終於都肯出啦。水貨而家大約賣 $3,980，咁究竟行貨會賣幾錢呢？價位竟然出現羅生門。
首先我去鐘圓問過，Sales 話定價係 $5,088，但走入先達後，見有手機舖貼住個牌大大隻字話係 $4,880，爭左二百蚊。到底邊個價係真？我去落雞亞至尊店求證過，店員都話係 $5,098，按照佢地o既慣例，電器舖會平十蚊，即係 $5,088 先係o岩。
問題係先達果間舖撻埋落雞亞分銷商 HKC 個朵出o黎，我亦知間舖同 HKC o既關係一向密切，按理定價銀碼係唔會收錯風，所以一係間舖諗住一到貨就即劈價 $200 賣機，一係就想用呢個筍價去引人預訂。咁我又唔明啦，既然部機好快會跌價，或者要減價先有人訂o既話，即係佢唔多吸引啦，咁我訂o黎把鬼咩！緊係等部機真係出左，慢慢格個靚價先出手啦！間舖又話訂機送藍牙，到底個藍牙係佢送定本身跟機有，要過左發布會至知，但第時買機可能唔只有藍牙送添，我就覺得訂o黎無謂啦！
o係鐘圓訂機要先俾 $500 訂金，但我覺得除非知道部機少貨勁搶手，一出實俾人炒貴，否則冇需要訂。