本來unwire.hk唔係財經網，係唔應該係度評論股巿，但杜指跌曾一度跌 998 點，你都咪話唔傳奇!渣住蘋果股票的你有冇嚇到一額汗呢？其實串哥玩股都有好一段日子，心得就係………….從來唔相信所有新聞，所有技術圖表同所有股評人。對於我來說，股巿就係一個散戶同大戶對賭的遊戲，大戶就好似打牌睇晒三家牌，散戶永無可能食糊。要搵錢就要捉大戶手影，睇黎好似好荒謬．．但今日串哥有少少抄股心得想同大家分享。
股巿無野係無可能
從來股巿係無野無可能，之前有冇人諗過 #005 匯豐由 150 跌番 30? 越多人講的你就越唔好信，傳媒都係大戶經常利用的手段之一，第二波講左咁耐都唔跌，反為升到痴線，而家突然間唔聲唔聲就跌咁多先黎慢慢搵借口 ？之前唔係升到個個話個巿好番了?所以股評人不停推介你買乜買物，你就注意可能係大戶引人入黎散貨，傳媒越唱好你越要驚，散戶越唔驚你就越要驚?
個個賺錢輸邊個?
大戶唔會咁好死同散戶一齊賺錢，你諗下個個嬴錢，阿豬阿狗都係執錢，個個嬴錢我想問你，輸邊個? 最後咪又係儲夠散戶一次過開刀?！唔通大戶送錢大家洗?所以唔好信所謂小道消息，你諗下傳得到去你隻耳仔度，其實已經等於全世界知道，唔好咁天真啦。要係股巿搵錢，唔使睇任何財經雜誌，唔使識甚麼技術分析，得閒落去銀行／証劵行留意下班散戶諗緊乜，你再諗下如果自己係大戶，點樣搵呢班散戶錢，你諗得到一二，你就執錢了。
Yahoo 金融版 Breaking News，Dow曾跌近千點
Timing 才是重點
可能你覺得，喂串哥你咁講即係個個買牛你買熊，個個走貨你入貨咁就發達?有無咁簡單呀? 原則上係架，大家思想上要係咁，但有一樣好重要的就係 「Timing」，例如 #005 係四周大力唱衰時，你覺得大戶收緊貨，50蚊狂入貨，嘩原來仲有得跌去到30你驚到失晒理性走貨，你咪又係輸錢?喂咁點算呀? 我介紹大家睇交易盤，睇盤又係一門好高深的學問，呢門野要靠自己經驗，睇得耐你就係”feel”到大戶散貨／收貨的手影．．例如儲夠買盤先就一次掟一LOT出去”Long”住個價呀．．或者散戶密密放，大戶低位密密吸，你都可以觀察到一二，不過真係要講日子、經驗同埋功力，無番三五年你都捉唔到路。
多留意散戶投資情緒
咁仲有無更簡單的方法?有．．就係散戶情緒，如果係牛巿中，全民抄股係咪即係走貨? 其實未到! 全民一齊痴線係大戶最愛，一齊抄高個巿，直到一日周圍的人都返工抄股，不停係咁掉錢，去到一個「狂」的狀態，先係危險訊號，大戶要食魚，都要儲到個魚網夠魚先一下拉上水。
當然每個人有每個人的睇巿方式，串哥同大家一樣乜都試過，小道消息又信，乜叔物叔又信過晒，波浪理論、技術分析、最後連江恩定律都玩埋，都係輸多過嬴，直至有一日我個理念改變左，拋低晒所有以前的野，做以上的理念去抄，先開始獲利，跌巿又獲利，升巿又獲利，真係好似滑浪咁!所以大家心態上唔好做散戶，學下大戶的思維方式啦! 除非你識好似巴菲特咁發掘一d好有潛質的公司，然後放佢三五七年執大錢啦! 唔信的朋友，唔使丙我，我只係分享自己的心得，唔等於我串哥講的就係道理呀!
多睇新聞，留意外幣/金/油，留意散戶情緒，學睇盤，唔好再講「無可能」
科網邊隻唔好?
最後，都唔好咁離題講番科網，大家又覺得邊間最有前景? AMD? Intel? Apple? Microsoft ? 我自己就暫時唔會掂 Microsoft ，不過私底下我係幾欣賞 Windows 7 ! 我識有幾位朋友當年買完 iPhone 後就入埋蘋果股，佢地話因為作為一個iPhone用家，對於蘋果係手機呢一步真係充滿信心，所以值得投資。佢地無被金融風暴震走，仲係對 Apple iPhone 充滿信心，小弟真係好欣賞佢的性格，果然由iPhone2G 到而家股價升左唔少！佩服佩服… 不過如果有一日 Steve 兄退居慕後，大家仲會唔會對Apple咁有信心呢?
大家有眼睇…
主圖片來源: 高登討論區(後悔)
