落雞亞谷 N900 行貨谷得咁行，點都會有Ｄ回報o既，聽聞部機o係旺角Ｄ大舖賣得唔錯。但最 Happy 都係先達班老細，因為搭到順風車，Ｄ人留意行機o既同時，又自然諗埋買水機會唔會抵Ｄ，所以令 N900 水機鹹魚翻生。
之前同大家提過，N900 行貨未出之前，水機已o係先達賣左四個幾月，不過一直唔算好好賣，賣賣o下仲謝晒，好多舖頭都冇再入貨，差唔多絕跡先達咁滯。但近排行貨Ｄ宣傳咁勁，真係引到班人去先達搵番水貨。仲要水貨已經跌價到 $3,980 左右，行貨就不論先達定大舖，平極都要 $4,780 左右，爭左成 $800，唔少人計過度過，見水貨反正都有 ROM 轉到中文，結果都係買水貨。冇落雞亞做咁多野，班先達老細可能已經放棄晒部機，做唔到而家Ｄ生意，佢地真係要多謝落雞亞啦！