收到一封讀者的來信，內容不是投訴或測試了甚麼新產品，是分享他及身邊朋友最近炒燶 iPad2 的經驗，還要欠下一大筆卡數。想提醒大家，炒賣 Apple 產品也是有風險的，越遲入場風險越大。以下是該名讀者的來信原文：
大家好，我叫做仁仔，看 unwire 已經一段時間，見到有部分讀者有玩 Apple 產品炒賣，所以我打算用我自己中途加入慘敗的血生生經歷同大家分享，勸勉各位炒機一定要看清自己能力。
事情由自己見到身邊好多朋友係 iphone 同 ipad2 度賺唔少開始，我亦諗住搵返少少外快，咁就係4-5月開始炒供應較少的 iPad 2，每日朝早就係留意有冇開賣同當日的收機價，自己 Set 個目標價 +$200 以上都走。我地玩開的朋友間同收機佬，都已經將 iPad 2 改晒花名，Wi-Fi 版叫做細 Y(16GB)、中Y(32GB) 同大Y(64GB)；同樣道理，3G 版叫作細豬、中豬同大豬。因為內地冇 3G 版，所以都係以炒豬為主，而初期因為個個一窩蜂走去入細豬，所以好正常供過於求。所以有見及此，我地圍內人都會轉向大手入中豬同大豬，每部個價執多一兩百。
玩左幾轉都叫有錢賺，雖然唔係好多，不過都可以食返餐自助餐架。點知快樂的日子真係唔長，係 6 月 27 日果陣 apple store 又突然開左，咁我就即刻買左 10 部大豬同 5 部中豬，諗住呢次冇死啦，當時個莊仲開緊盤口大豬每部 +$462 ， 中豬 +$260 左右，諗住每部執幾百都唔錯啦。
點知，我識咁諗時人人都識諗，到貨之後大量供應令 iPad 2 個價係咁跌，只係剩低 +$100 左右，根據以往慣例應該好快回升，咁我同班friend梗係死都唔放住啦，諗住放多陣等佢升返。相信大家都知個故事點發展啦，Apple Store 一路斷斷續續開賣，有時又隔幾分鐘開一開，好似 Apple 同炒家鬥多貨咁，一跌就跌到而家。所以，呢輪大豬最高減過 -$280，而且呢幾日 Apple Store 仲要玩長開長賣唔 CUT 單，擺明玩殘散戶啦，叫我地點頂呀!? 我身邊都有唔少朋友係咁，而家個個都苦口苦面， 而家D信用卡卡數到期，如果信用卡比 min pay D 息都唔少野，究竟應該忍痛止蝕定係繼續坐貨呢?
我自己雖然入晒肉，但都叫情況最好的一個。身邊有朋友入親都跌，又有朋友用十個戶口，十幾張信用卡係咁入。所以，最近大家應該都見唔少 Facebook 有唔少人原價放 iPad 2，希望套得幾多得幾多。在此奉勸大家，Apple 炒賣已經去到飽和，只適合可能初期滾大了本有大量 Cash Flow O係手的半專業炒家。我唔敢講個回收價會唔會回升，我都希望有呢一日，但大家在此情況下都係要入貨的話。在入貨時，記得留意自己風險承擔能力….唔係隨時破產！血汗錢、積蓄等就咁玩完。
圖片來自 TVB 電視劇《大時代》
