可能Smartone 太串惹來很多人不滿。傳媒更好似抽水成癮咁，只要佢一出招就出手寫臭佢，引埋讀者一齊「圍威喂」圍插。上次我串哥笑 Smartone 推出個咩急乜援服務無鬼用，但今次我又覺得，佢地個新 Plan 咁被人抽水其實幾陰公。
事源今日 Smartone 推出一個 $51 蚊的 3G 計劃，明顯係主打 whatsapp 客，所以一律whatsapp 流量都係免費，不過其他數據就只得 10MB ，再用多就計費了。此 Plan一出，有人即刻抽水話佢陰濕收費，話而家D電話背後多野背景工作，隨時爆流量，又話人慢得 384KB 攪到回whatsapp 慢等等匪夷所思的指控。
大佬呀，人地個 Plan 收 $51 你想點呢?如果自己真係咁多野背景同步， 咪 JOIN 佢地個 HSPA Plan 囉，無人指住支槍叫你 Join 呢個Whatsapp Plan，仲話人陰濕收費真係唔係幾合理。
唔講其他人，就講我身邊的朋友，好多仲係用緊普通手機唔會點上網，但係佢班 friend 仲有 D 仔仔女女全部 whatsapp 唔願再 send sms ，攪到斷絕來往咁，而家呢個 Plan 有個機會比呢班人，平價買入門 android 機，乜都唔裝只裝 whatsapp，每個月俾五十蚊就有千分鐘 air time ，仲有得上 whatsapp 保持聯絡，其實幾好！再者呢d機乜都無裝， d widget 咪又係 get 下天氣資訊同股票咁，10MB 其實都夠啦。如果講到明你仲去用黎上網玩 facebook，開晒d野係咁同步，咁係抵收你 extra 錢喎!
見到有人話呢個 Plan 得 384KB，攪到 whatsapp變慢，其實一個 msg 佔得幾多流量，384KB條大水喉唔夠你送出去? 點會慢呢?難道你嚮whatsapp 入面打晒成本聖經出黎 send 比人 ? 成件事等同人地話明架車三歲小朋友免費，但你又話人地個小朋友上車後可能會籟屎陰濕收多你清潔費一樣。
參考:
http://www.smartone.com/jsp/mobile/prices/3G_plan/tchinese/index.jsp
