被喻為擁有劃時代設計、代表未來科技發展的 Google Glass 開發者版本至今已經推出幾個月，由剛剛登場人人叫 WOW，到近期度度都被禁止進入，究竟點解一款咁創新的產品會被變成「過街老鼠」？唔通最後只可戴住去公園打雀！？
罪狀一：侵犯私隱
外國已經出現禁止 Google Glass 進入的標誌。
今時今日人人都講私隱，最怕比人指指點點。另一方面又越黎越多人鍾意做網絡判官，事無大小都要拍片放上網討公道，係咁嘅時勢下仲有邊個想比部隨時可拍低你放上網的 Google Glass 影住你？萬一唔小心比其他人睇到出現係唔應該出現嘅地方，後果隨時可大可小，因此美國唔少賭場、餐廳都以「防止出老千」、私隱為由禁止配戴 Google Glass 人士內進。其實由 Google 及開發商的部署亦可見到，廠方初步把所有和面容識辨技術有關的 App 全部禁止，就係為咗降低人們對私隱保護的敏感度，不過正所謂「道高一尺、魔高一丈」，只要 Google Glass 一被 ROOT，安全和私隱便變得毫無保障。
罪狀二：機能不足
雖然現時的 Google Glass 只是處於開發者版本階段，不過它的功能簡單來說和智能手機、平板電腦一模一樣，最大的不同就係可以戴係頭上面。筆者認為 Google Glass 欠缺了一些獨特、與別不同的功能，暫時講來講去，最大的賣點就係可以拍攝第一身的短片和相片，而網絡功能又需要依賴藍牙連接手機才可使用，單獨使用功能難阮大打折扣。
罪狀三：陽春規格
成本只值 $150 美金!?當佢要 $300 都仲賺緊幾個 Double!
經過近期各大網站拆解 Google Glass 之後大家可以發現，佢其實只係一部規格十分普通的 Android 平板 / 手機。初代的 TI OMAP 雙核處理器、1GB RAM、12GB 儲存空間和自稱可達 1 天的電池，不過不少試用後的開發者指出，若果用 Google Glass 連續拍片大可只可維持 1 個鐘左右，而且鏡頭解像度又只得不過不失的 500 萬，整體規格實在沒有太大的吸引力。
罪狀四：天價發售
稍後時間會推出近視版的 Google Glass，不過售價肯定會更貴
以 $1500 美金發售（約港幣: $11,700）的 Google Glass 是否抵買實在係見人見志，相比起並他電腦產品例如： 256GB 的 13 吋 MacBook Air（港幣 $9,988）、星星星 S4 (港幣 $5,898)、全球最輕 11 吋 NB Sony VAIO Pro 11（$9,988），相比起比手機更易唔見、更容易跌爛的 Google Glass，感覺實在有點不實在。另一方面，有拆解過 Google Glass 的網站估計佢既成本只值 $150 美金左右($1,170 港幣)，明知道要比人賺 90%，相信一個正常的消費者都會等 Google Glass 跌至合理水平先會入手，現階段的吸引力實在十分之低。
Google Glass 比人改圖改到傻。
「吃不到的葡萄」係咩味大家都知，正所謂人冇我有又或者人有我都有咁先至夠威、但係當大家發現人人都有，而唔知幾時先黎到香港嘅時候，大家仲願唔願意比咁多錢去買又係另一個問題。最起碼香港要成為 Google Glass 最早發售的地方之一，相信先有機會吸引到香港玩家，不過神州有錢人多的是，隨時有興趣的準買家又要捱炒價呢！
當可以把眼鏡電腦造到好似電視劇 Continuum (超越時間線) 女主角所配戴的 Cellular memory review/recall (CMR) 未來科技隱形眼鏡，若果要配合放在腦內面的晶片來運作，唔知大家又點睇呢? 筆者就對於呢種科技非常有興趣了!
