各大足球聯賽紛紛開鑼，英國機構 Carbon Trust 就進行了一項研究，分別計算以不同方式睇波的二氧化碳排放量。如果你希望過減碳生活，同時又是球迷就要注意了。
當然親身到球場觀賞賽事是碳足跡最高的，如果是作客球迷的話，碳排放更高。以早前英國曼聯對韋根的社區盾為例，Carbon Trust 推算當日約產生了 5,160 噸二氧化碳，當中有 5 千噸是球迷乘搭交通工具到球場產生的，其餘則來自食品、酒精、汽水、球場的電力等，數量等於 1 千個英國家庭每年因能源而產生的二氧化碳。
不少香港球迷都無法到球場，只好在螢幕前觀賞直播賽事，用什麼方法睇波，碳足跡最低呢？Carbon Trust 推算，如果球迷在家中睇直播，以 42 吋 Plasma 電視會產生 0.48kg 二氧化碳、32 吋 LCD 電視為 0.35kg，而 45 吋 LED 電視 則只有 0.31kg，如果能夠跟朋友一同睇波就更加好。
如果使用串流方式睇波的話，以 Desktop 電腦加寬頻串流睇波會產生 0.42 至 0.75kg 二氧化碳、Laptop 加寬頻則為 0.08 至 0.40kg；如果使用智能手機或平板配合寬頻睇波，會產生 0.06 至 0.38kg 二氧化碳。換句話說，以 Smartphone 或 Tablet 睇波最佳。不過當球迷以 3G 方式串流睇波又是另一回事，由於流動數據傳輸消耗大量能源，在智能手機和平板上以 3G 串流睇波，分別會產生 3.6kg 和 3.7kg 二氧化碳，約等於駕車 16 公里。
來源：Carbon Trust