Hej！上個週末筆者原本已經準備去宜家傢俬買些家庭用品，兼去食便宜的 Julbord（聖誕大餐 Buffet），怎知一男子被投擲毛公仔，令我的宜家之旅加插了新「景點」，變成朝聖之旅。朝聖的對象當然是及後在 Facebook 洗版了整整一星期的路姆西。
在大家還未去沙田、銅鑼灣瘋搶之前，筆者原本都諗過花 79 瑞典克朗（約 93 港元）買隻路姆西返屋企「潮」一下，但一想到放隻狼在屋企篤眼篤鼻，又唔可以學香港的朋友用來丟，於是都係算數。幸好冇買到，否則路姆西極大可能會放在我的電腦桌，跟一男子一樣，認真該煨！宜家傢俬賣公仔做慈善不是首次，筆者家中都有一隻可愛小熊 FABLER BJÖRN，大陸譯名為費布勒‧比約，但若果不用音譯而是意譯，FABLER BJÖRN 其實是童話小熊的意思，真不明白路姆西 LUFSIG 明明可以譯作論盡狼，卻硬要音譯。
既然路姆西買不成，於是就將 79 克朗 Budget 買了件筍貨給自己。上星期日聖誕樹造型的 STRÅLA LED 檯燈（上圖）大減價只需 29 克朗，於是大手買入 3 盞。這盞燈被筆者視為筍貨，因為內置了兩粒 AA 充電池，還有一個 USB 火牛，就算將這兩件配件獨立買，相信起碼要 80 克朗，買入 3 盞 STRÅLA 燈後，筆者就將 USB 火牛獨立取出為手機、平板充電，NiCD 充電就用在 Xbox 360 手掣上。
買完燈食完 Julbord，返到屋企將 Buffet 和路姆西相片上傳到 Facebook，點知只有路姆西引來朋友勁 Like。路姆西香港斷貨，還有朋友笑說要瑞典直送呢？你搶到路姆西嗎？會點樣玩佢呢？
Hej då！下週再談！