unwire.hk 讀者呢期晚晚捱夜睇波，日抖返工尤其係 IT 人個個都變晒 Walking Dead 行屍走肉都要死頂，唔想咁樣，可以點樣？飲番啲能量飲品叉吓電啦！但係市面上有咁多款 Energy Drink，邊款最有效？味道如何？又會唔會有副作用？小編身為能量飲品重度用家，一於為大家「玩命」喪試！
小編有自信係全行飲得最多能量飲品嘅腦記 (編按：拜託，有咩好值得驕傲呢？)，基本上超市買到嘅能量飲品我都試過，甚至飲過外地嘅能量飲品。但其實我都知能量飲品真係唔適宜飲太多，更加唔可以依賴，就以 Red Bull 做例，佢都有提示人一日唔好飲超過兩罐，因為確實會有副作用，所以以下咁多種能量飲品嘅測試，唔係喺同一日入面進行。而且每個人體質同疲勞狀況都會唔同，所以今次純粹係個人體驗嘅分享。同埋值得留意嘅係，小編期望飲完嘅效果係提神醒腦，而唔係為咗進行體力活動。
1．紅牛
個人感受：小編第一次飲紅牛係喺毅行者上山一段，當時超疲勞嘅我飲完之後，終於明白 Red Bull 嘅口號「贈你一對翼」喇，因為我「感覺」體力同精神狀態都完全回復咗，結果可以用小跑步嘅方式下山。不過，完成比賽之後，小編就因體力透支而瞓咗差唔多 18 粒鐘。
價錢：HK$17.9
效力：飲完 15 分鐘內已唔再感到疲勞
持久力：個人覺得可維持 4 個鐘左右
味道：第一次飲覺得唔好飲，感覺同咳藥水差不多，但多飲一兩次之後，就覺得還可以。
總評分：***
2．紅牛 (無糖版)
個人感受：因為無糖關係，感覺較元祖版健康，但飲過一次之後就冇下次，因為係小編生平飲過嘅第二樣難飲飲品，絕對係一試難忘！！！
價錢：HK$17.9
效力：同元祖版一樣，都係 15 分鐘內已唔覺攰。
持久力：同樣係 4 個鐘左右
味道：小編覺得健康飲品通常都唔好飲，無糖版 Red Bull 都走唔甩，堅難飲！
總評分：***
備註：小編亦喺內地試過兩款 Red Bull 產品（短身金罐同印上簡體字嘅元祖版），兩款味道同香港買到嘅 Red Bull 有啲唔同，而且對小編嚟講係 0 提神醒腦效用，伏已中！
3．Shark
個人感受：作為 Red Bull嘅「死敵」，小編當然都要試一試，不過感覺效力同 Red Bull 好唔同。佢對我嚟講係比較「慢熱」，但係持久力更強，較可惜係冇乜醒腦功用，飲完後只係眼光光，但同飲之前一樣咩都諗唔到。
價錢：HK$16.9
效力：飲後 30 分鐘內開始有眼光光嘅感覺，勁過豬肉湯。
持久力：個人覺得係 4 至 6 個鐘左右
味道：味道同大部份能量飲品差唔多，唔算好飲都唔算難飲。
總評分：**
4．Monster Energy
個人感受：近年佢終於打入香港市場，味道亦由兩款加到 3 款，容量又比較多，而且係屬於比較多氣嘅飲品，建議不要一口氣飲完。
價錢：HK$14.9
效力：飲後 15 分鐘內
持久力：個人覺得都係 4 至 6 個鐘左右
味道：算係比較易入口嘅能量飲品，但都唔可以叫做好飲，亦比較多氣。綠色呢隻因為係少甜版，所以比較淡味。
總評分：****
5．力保健
個人感受：可能係紅牛之後最多港人熟悉嘅能量飲品，容量比 Red Bull 更少，屬於一手可以掌握嗰隻，但係味道就同 Red Bull 完全唔同。
價錢：HK$13.5
效力：對小編嚟講冇提神醒腦之用！
持久力：同上
味道：冇氣，亦比較甘……
總評分：*
6．葡萄適 Extra (暫無供貨)
個人感受：對小編嚟講，佢係隻性價比奇高嘅能量飲品，亦都係我最常飲嘅能量飲品，畢竟 10 蚊樓下有咁大支，仲要效力算唔錯。要留意佢亦屬於有氣飲品，但就冇 Monster Energy 咁多，而味道同傳統能量飲品好唔同，亦算係比較易入口嗰隻。
價錢：HK$9.5
效力：10 分鐘內見效
持久力：2 至 3 個鐘左右
味道：有氣，偏甜，味道同主流能量飲品唔同。
總評分：***
備註：葡萄適 Extra 早排因樽蓋有霉問題，而家正處於全港回收狀態，未知幾時會再有得賣。
就小編個人感覺，6 隻能量飲品之中，Monster Energy 嘅特性比較平均，而且整體效力算係最好一隻。不過葡萄適 Extra 先係小編最常飲嘅，因佢以較平價嘅方式提供提神醒腦嘅效果，我只係嫌佢持久力唔算特別強，而且偏甜。值得留意係所有能量飲品對小編多多少少都有啲副作用，好似心跳加速、手震、煩躁、易怒、噁心、胃部不適之類，同埋大家千祈唔好將佢哋溝埋咖啡、酒精同藥物一齊飲，大忌！（雖然小編試過都死唔去，但係身體明顯感覺唔舒服！）
[divider]
能量飲品 =/= 運動飲品
由於超市經常將能量飲品同運動飲品擺埋一齊，令好多人分唔清佢哋嘅分別，其實前者最經典嘅例子就係 Red Bull，而後者就係寶礦力之類，兩樣嘢嘅成份同用途都唔同。能量飲品係透過刺激神經系統而起提神作用，佢哋唔含酒精，主要有咖啡因同多種維他命 B 等提升能量嘅成份。運動飲品就通常含電解質、礦物質（如鈉、鉀）同糖份等，可以補充人體水份，但係唔會含有咖啡因。
最值得注意嘅係，有啲人進行劇烈運動期間諗住飲能量飲品嚟維持能量，或者運動後飲嚟止渴，其實咁做係錯晒，因為能量飲品不但唔會為人體補充水份，實際上仲會導致脫水添，記住呀！
▲ 能量飲品含有咖啡因，呢點係同運動飲品嘅最大分別，買嗰陣要留意罐身印嘅成份。
出嚟行遲早要還
其實你覺得攰或者虛脫，係由於身體提你休息，畀佢回復番原來狀態，靠飲能量飲品提神或者止渴，實情係唔好嘅，最好真係冇得休息、但又一定要保持精神嗰陣先至飲。因為能量飲品嘅成份（例如咖啡因）會畀大腦一個錯誤訊息，就係以為身體仲充滿精力，根本其實係透支緊體力，之後要休息番更多。
「會上癮，飲得多對身體唔好」
淨係得我講，大家可能覺得唔夠專業，等小編再問埋萬事通嘅關嘉美醫生，請佢對能量飲品畀啲專業意見。關醫生話能量飲品因含有高濃度咖啡因，所以會令人出現心跳加速、手震、尿頻、脾氣暴躁、輕微脫水等後遺症，喺空肚嗰陣飲就更加之「傷」。她仲講笑話：「如果你睇波呀，慶過頭可能仲會打交添。」
當小編再問能量飲品如果飲太多，會唔會有生命危險，關醫生即時好大反應：「有㗎！睇吓你身體狀況係點啦，如果本身已經有心臟病，或者心率不正，係可以突然間猝死㗎！如果血壓高，或者有躁狂症，飲得多亦有機會出事。」而且睇波時大家都可能會飲酒，關醫生再提醒大家，能量飲品千祈唔好同酒一齊飲，因為更易出現心律不正。小編奉勸各位球迷，都係聽吓關醫生嘅忠告，睇波唔好睇得太盡，留番少少時間瞓覺，真係極度頂唔順先啪一罐能量飲品好喇。
