講起旺角，相信唔洗我串哥提起，大家第一時間都會諗起旺電，星際以前就係嘅，不過近年都係集中賣手機、相機產品，電腦野最多都係賣二手機，都唔算係腦場架啦。個日落開去旺電搵班行家傾下計，點知佢地話江湖傳聞旺角會出現翻第二腦場，我當然即刻問係邊度啦，佢就顧左右而言他死都唔肯講個商場名，只係肯話個商場係菜街（即係西洋菜南街）。
事實上，單係菜街已經有唔少商場，究竟邊個商場有潛力取代星際，變番做旺角第二腦場？容許我串哥猜一猜：銀城？荷里活？Chic 之堡？定係兆萬？我自己都無乜頭緒，不過如果你問到我，銀城或者兆萬都係唔錯嘅選擇，舖位多之餘，又可以行到累係商場入面醫肚，樓上或者附近又有唔少手機或者電腦品牌嘅維修中心，真係天時地利人和啦！
有人可能話：旺角本身已經有旺電，再多個腦場，會唔會驚分薄客源呀？其實串哥覺得，深水埗夠黃金高登兩個腦場共存咗咁多年啦，咪又係可以做到互惠互利？如果旺角真係可以有番兩個腦場，其實可以互補不足（可能一個腦場做大舖，一個就做散戶或專賣散件配件），咁對於消費者者來講，就更加 perfect 池啦！所以，無野係無可能嘅！
當然，有人一直記掛住之前 keep 住傳旺電會變身波鞋城嘅傳聞，係咪真就唔知勒，就算退一萬步係堅，有另一個旺角區嘅商場肯接手做腦場，起碼旺角區嘅朋友唔洗買親電腦野都要去深水埗，大家應該都安心 D 啦！