Hello，大家好，第一次喺 Unwire 寫文，我係妍嫣呀，一個 流落遠方 喺數碼港返工的偽 OL，每天都懷著山區兒童的心情上班去。今次來到 unwire，就是想同大家分享下我在 IT 界打工的趣事。「喂，數碼港咁遠，車費又貴，點解你揀呢度返呀，搵唔到工咩？」搵工，其實好似搵老公，除左要高富帥（誤），最緊要係你鍾意，同埋開心。
Undergrad 的時候，我曾經幫人補過習，做過 CS，幫人買馬買波，都不及我最後做左兩年的學生導賞員，當時的學生同事一般都只會做大半年至一年，因為他們很搏盡，要做 internSSS、參加交流工作、實習等等，而我作為一個 畢業等揸兜的 文科生難得可以係一個我鍾意又做得開心的地方返 part-time，其實個時我當自己係做左 intern。
個陣我同自己講，要記著對工作的熱誠，找一份自己鍾意又做得開心的 full time。 文科人大概就是有一點點這樣的浪漫，我沒像其他朋友，想著要賺多少錢，升上什麼職位，很傻很天真，對吧？ 所以之後在畢業後的第一份全職工作，我被狠狠地摑了 N 巴。
第一份 Full Time 令我突然驚醒世界如此複雜，（我還記得那些日子，每日靠著尼采過活…）於是決定辭了工作，跟朋友出走，好好反省一下，卻又死好命，俾我遇到而家的老細。
通常朋友問我點解轉工，我都唔會解釋太多，只會答一句，因為 office 冇窗（當然 office 冇窗其實好 common，但你可以簡單一點地想是工作環境問題，或浪漫一點地想，我看不見出路等等）。個時真的想找個環境較舒服的地方工作，機緣巧合之下不知從網上哪裡看到數！碼！港！遠離繁囂的市區，好陌生的地方，心裡有句 OS:「我要係一個冇人識我的地方重頭黎過！」於是碰碰運氣，睇下會唔會有一份唔使識 IT 的工，竟然真係俾我搵到，見到個 job post 的時候覺得，嘩，份工完全係為我而設，who is the better candidate than me? 我好努力咁寫好份 cover letter，仲驚死人地收唔到，send 左兩次 email，cc 俾自己另一個 email。點知真係搵我去 interview，我仲好記得個時我坐係那個冇窗的 office 的心情係開心到彈起，但係又要扮冇野發生，懶認真。
第一次入數碼港就有奇遇，因為怕唔識路，所以早左好多到，周圍行下，由 A 區行到去 D 區，見到有張梳化，就坐低 hea。跟住隔離有個叔叔搭訕，話自己係 xx 公司老闆，而家好等人用，一睇我就知黎見工，問我有冇興趣去見下（其實好似即場 interview 咁，搞到我好緊張）。個時我可能未訓醒（朝早8點幾），我竟然冇懷疑過個叔叔可能係壞人，反而我心入面多謝佢同我 prep interview，仲覺得數碼港風水好好，諗返都覺得自己傻仔。
到真係同老細 interview 個陣，我施展左 公關技倆 渾身解數，推銷自己。未開口個時經驗話俾我知，大鑊啦，女上司＝好麻煩；開口傾落覺得好舒服，如果真係有人夾人緣，我覺得自己搵到啦！完左 interview，老細俾左張卡片我，走的時候，作為高登起底組，我上網查下老細的 background，原來好勁，個一刻我心入面諗，如果真係跟到佢一定學到好多野，早知講多兩句 hard sell 下自己啦。
（下星期繼續）
