11 月頭的時候，有位雜誌記者上來公司同老細做訪問，想寫下如何做一個成功的管理人員。訪問老細之前，記者訪問左全公司同事，冇錯，即係我地 3 個人，問我地老細有咩好有咩唔好。我地 3 個好齊心，講左好多好野，一要講唔好又兜返轉頭講返好，十足見工個陣人地問你有咩缺點，死都拗返去係優點咁。事後再諗返，我地條 team 無論 size 定年紀都好細，大家都係 90 前後，但我又唔覺得老細搞唔掂我地幾隻化骨龍，反而仲幾好傾。
人少少，但公司平均每個月都最少要搞一次 event，搞親都可以驚動全個行業，所以唔做招財貓都會有好高 exposure，都咪話唔忙。雖然公司唔多人，但我地分工其實都算好清楚，首先，所有非常 technical 的工作都與我絕緣，因為我另外兩個同事都好叻叻豬對科技野好有研究，而且非常有創意，對於流動科技呢個新興行業黎講，非常 match。反觀我自己簡直就係豬一般的隊友，本身已經冇乜科技常識，就連公司啲機s 都睇我唔過眼，公司大大話話有廿幾三十部智能電視、各式平板電腦、觸控電腦等等，每日都要開著晒佢地俾外星 bb 參觀人士試玩，初初做個時我撳佢就冇反應，同事開就聽聽話話，我足足用左成年的時間，日日同啲機s 打交道，了解佢地脾性，最近半年佢地先當我係朋友。
有其他公司的朋友見我成日一頭霧水，於是建議我睇多啲相關新聞，like 多啲科技 page，就算唔識得晒，都叫做聽過，唔使咁呆滯。於是我真係一次過 like 左好多科技 page，包括 unwire 乜乜乜，同事仲教我用隻 App 睇啲科技 blogs（雖然我最後放棄左），有意無意睇到，就算唔知個餡都可以知道個殼。我仲好記得今年 6 月 Apple 個場 WWDC 之後個日，我成個 Facebook Newsfeed，10 個 posts 入面有超過一半都係講緊相關的內容；同一個月 PopVote 網站俾人攻擊，Facebook 跟住又有好多 posts 解釋何謂 Ddos，咁啱公司個排有搞一個關於網絡安全的活動，我個時係可以解釋到俾屋企人同朋友聽：Ddos 即係同時有好多人敲你屋企度門入黎問你攞野，但係大部份都係假嘅，搞到真個啲要搞勁耐先攞到野，網絡服務供應商就要幫手識別真假毃門，唔好亂開門俾野人。哈哈，（戴頭盔）如果類比有唔啱請指正 😛
▲難得同猛人玩自拍神棍！介紹返：莫乃光議員（IT界），PISA 副主席 Eric，IT保安專業顧問楊和生
為左唔好侮辱豬呢種動物，我好努力去理解呢個流動科技世界，周不時 download 一啲 apps 黎試玩，試完跟住 delete…同埋學習下呢個世界的 jargon，例如返工的第一日，我就學識左「串流」係點解嘞，跟住由最初的 UI、UX，到最近我終於搞清楚 api，ipa，apk 同 sdk…仲有好多「新」terms 要學。雖然我做的工作唔係咁 technical，都係寫字、寫字同寫字…但係寫字的目的係溝通，如果你唔明係溝通唔到架嘛，所以學習是必須的… 加上我都唔想自己係條 team 入面嘅豬，因為有好多神對手要應付，我儲緊經驗值，準備升呢進化架啦！
