剛剛星期日港島西延線正式通車，原來又關數碼港事，因為有新方法返工啦！其實我等佢通車等到頸都長啦，點解咁期待？搭開巴士入數碼港的朋友就知啦，朝早九龍搭970，飛站，仲要飛 3 架先上到，上到又冇咁快有位坐，又塞車，又要兜落華富先入數碼港，熬到嘔都未到… 如果搭 30X，脫班，嚴重程度係試過朝早等 9 個字先等到一班車，如果唔係交易廣場上，下一站中環站的朋友，拜拜你條尾～又飛站。
仲有最大一個問題係咩呀？係要同啲薄大的學生哥逼丫嘛，佢地明明好多選擇，4，4X，970X，971，973，仲有小巴，偏偏要同我爭巴士。有一次我八卦問下一齊等左好耐車的同學仔，點解唔搭其他交通工具，佢竟然答：「快啲丫嘛～」吓，你都等左半個鐘架啦喎，車都走左好幾架，乜都到左啦…所以我好期待地鐵快啲通車，學生搭地鐵有半價，分薄人流，唔好同我爭巴士，等我舒舒服服訓坐到總站。黎緊一月開 SEM，到時就知成效啦！
不過咁，人總是貪新鮮的，我就趁大學仲放緊 SEM Break，係佢通車第二日就即刻試搭返工，因為我除左知道架地鐵去遠左之外，仲俾我收到風，開左架新小巴58M由堅尼地城站入數碼港，我梗係要試下咁樣搭抵唔抵同快唔快啦。
▲我好認真架，由屋企出門口個刻開始計時，如果唔使影相，個日咁順利，唔使一個鐘就返到公司！
作為一個時刻與時間競賽的典型香港人，識搭一定係咁搭地鐵：
上環站：左邊車門開
西營盤站：右邊車門暫時唔開
香港大學站：右邊車門開
堅尼地城站：左邊車門開
堅尼地城站月台扶手電梯位置：2, 3 車廂交界及 6, 7 車廂交界
堅尼地城站月台樓梯位置：5, 6 車廂交界
唔明？咁你一定唔係成日搭地鐵嘞，問下啲成日搭個啲就知上面嘅資訊有幾重要啦～
上返大堂之後，如果有需要，可以去廁所或者係個部好似太陽能電筒的新型購票機增值，冇需要就去 A 出口：士美菲路
▲指示牌上面有的士同小巴的公仔，但其實係Ａ出口先啱
▲上呢條電梯就係啦，冇咁多 A12345 出口嘅，上到去已經係地面
▲地面冇鋪頭架啦，對面就係街市，轉右就係小巴站
▲本來想試搭58M的，但總站見到有 58 號小巴車等人，都殺啦，上左先講。
小巴車程 15 分鐘左右，上滿開車，58 同 58M 一樣都係 $6.5，仲有五毛雙向轉乘優惠，減左即係 $6。
其實如果順順利利，冇壞車冇故障冇塞車，好似呢日咁真係好快，同埋都唔算貴反正都係廿幾蚊，而且係中環上就一定有位坐，因為八成人已落車，到堅尼地城站只剩 1% 人。而中環去堅尼地城站都只係 7 分鐘到，堅係快。不過由於我屋企咁樣轉過黎就要轉成３條線，再轉小巴的時候人已經醒晒，想訓覺的話，好似我咁都係搭巴士啦。
私隱公署：數碼港資料外洩涉 5 項違規缺失 逾保留期限仍未刪除
