上星期 Nikon 於 CES 2015 發佈全新 D5500 數碼單鏡反光相機，想唔到佢哋轉個頭就將佢帶來香港。有睇之前報導都知它是最輕便的型號，除了機身重新設計，這次還在屏幕加入觸控功能，唔知用起來會唔會似無反呢？（以下有更多資料。）
中低階 DSLR 越出越細部，就好似 D5500 雖然叫「大機」，但體積同重量其實完全唔成比例，就連小編 拿過實物都覺得非常輕，淨機身重量拍得住「無反」，而且手柄在「偷薄」機身情況下反而造得更深，手握時手指完全「Fit」進手柄與接環之間的罅隙，手感甚至比高階型號更舒服。不過「輕」前提係必須配備輕嘅鏡頭，正如小編 現場配了 18-140 f/3.5-5.6 G VR II 就已經感覺有少少「頭重尾輕」，這個要怪就怪 Nikon 鏡頭太真材實料了…
▲ 機身薄了，但手柄設計反而更深，手握時手指感覺非常貼同舒服。
▲ 同 D5300 一樣配備 3.2吋「鈕芒」，但 D5500 就多了輕觸功能。
▲ 機身按鈕位置都有所改動，而值得留意是 ViewFinder 頂部加了感應器。
▲ 使用 EN-EL14A 電池，可拍攝多達 820 相片，續航力比上代強。
老實說 DSLR 咁多年都係賣規格、賣速度，但意外地 D5500 這次加入輕觸屏幕。當然觸控唔係咩新事物，但除了一般人想到的放大縮細、拉動 Menu 及一按即拍，令小編 感到驚喜係機內提供一個「屏幕 Fn 鍵」功能。假設「屏幕 Fn 鍵」設定為對焦點，只要眼靠到 ViewFinder，取景時想改變對焦點只須掃動屏幕就得，而非好似以前要按十字制。雖然臉放在 DSLR 時再搵手指「篤芒」好似怪怪地，但小編 玩過一陣感覺都唔太惡劣，反而有得 Set 唔同功能用起來更順手，簡單說即係多o左個「自訂熱鍵」。
▲ 這個透過觸屏操作的 Fn 鍵，除了對焦點，其實還有更多功能可選。（可參考短片第 2 部分）
Nikon 正式完成收購 RED 現有產品系列將維持不變 Nikon 全面收購 RED 冀擴大及快速增長電影攝影機市場 Nikon 與 NASA 簽訂合作協議 將在未來登月計劃採用其相機
D5500 比較失望是規格欠驚喜，像素依舊為 2,430 萬（APS-C）、內建同款 Expeed 4 影像處理器，連拍速度保持 5fps 及支持 1080p 60p 影片拍攝，而且跟 D5300 一樣內置 WiFi，可跟手機連接或遙控操作，簡單說除了輕觸屏幕，兩機九成相同，而剩下一成就係 D5500 原來刪了內建 GPS，相反 D5300 就有（少用唔等於可刪！）。除此之外，D5500 都有一些新的「軟功能」，其中拍攝效果新增了「普普風」、「超級鮮艷」及「插畫相片」，另外影想選項亦加入「扁平」設定，讓相片可以更適合後期製作。
▲ 可拍攝 1080p 60p 短片。
▲ 機內設內建 WiFi 功能。
D5500 作為中價 DSLR 上述規格已經好夠用，對焦反應夠快，而且測光亦很準確，在現場複雜光源都未見出問題。至於相片，搭載 18-140 f/3.5-5.6 G VR II 拍出感覺略欠一點銳利度（高倍變焦死症），但相片細節依然很清楚，而 ISO基本上用了 Expeed 4 效果都唔會太差，粗略試過小編 認為極限都是 ISO 6400，打後質素已經嚴重下滑。
▲ 相片略欠銳利，但細節清晰。
▲ ISO 測試原圖。
▲ ISO 3200
▲ ISO 6400
▲ ISO 12800
▲ ISO 25600
這次 Nikon D5500 重量是「輕量化」及加入觸屏，雖然聽落有新意，但小編 覺得「中階 DSLR」 太多「玩味」功能感覺始終有點怪，因為考慮得 DSLR 無非都係為了速度同相質，不然可能早就選了「無反」或半專業 DC。因此從「器材角度」我認為 D5500 近乎冇驚喜，只是淨機定價 $6,180 比 D5300 推出時便宜一點；相反當作「休閒機」，多咗個觸屏都叫多樣野玩，但換轉是小編 這個價錢會偏向考慮「無反」多一點。
售價：
$6,180 （淨機）
$6,980 （跟 18-55 f/3.5-5.6G ED VR）o
$8,580 （跟 18-140 f/3.5-5.6 G VR II）
Nikon 正式完成收購 RED 現有產品系列將維持不變 Nikon 全面收購 RED 冀擴大及快速增長電影攝影機市場 Nikon 與 NASA 簽訂合作協議 將在未來登月計劃採用其相機
