對於香港人來講，用幾千蚊買部手機已是司空見慣的事；但幾千蚊部手機，如果拿去旅行公幹個時，萬一俾人搶咗或者唔見咗，咁就唔抵啦。所以買部 2nd phone 旅行公幹個時用，都係一個好辦法。小米最近推出的紅米手機 2 就有水貨抵港，一千蚊度可以用到雙 4G，當做副機都係一個唔錯的選擇。以下有更多資料：
先講講紅米 2 的手感，眾所周知紅米是小米的平價級手機系列，所以機身用料一般都採用塑膠，所以手感較 cheap 是難以避免。但配合 4.7 吋熒幕機身，拿上手的手感算是不錯，不過就有啲跣手，雖然一千蚊的手機就算跌爛都唔太心痛，不過環保啲小編都係建議「帶套」吧啦。至於單手操控方面，因為熒幕都係得 4.7 吋，所以 Edward 手掌雖然無小編 咁大，但要單手玩機基本上都無乜問題。
▲單手操控 Edward 表示無問題。
▲不過塑膠機背有啲跣手……
▲機身佈局基本上同上一代紅米手機分別唔大。
紅米 2 最大的特點，就是繼紅米 Note 後再有小米手機支援香港 4G 網絡，而且是第一部雙卡雙待，而且兩個卡槽都支援 4G 網絡的機款，對於擁有兩張 4G SIM 卡，又或者香港、大陸都想盡用 4G 高速網速的用家來講，係一個幾體貼的選擇。
不過 Edward 發現紅米 2 只屬雙卡雙待單通，例如有一個電話打到紅米 2 的 1 號卡，而同時有另一個電話致電 2 號卡，就只有 1 號卡的電話能打得通，另一個電話就會自然飛至留言信箱。另外， Edward 亦試過將 csl. 及 3HK 的 4G SIM 卡，分別放入紅米 2 的 1 號及 2 號卡槽，發現在香港的 4G 訊號接收不算穩定（可能是因為水貨機的關係吧……），其他手機能收到 4G 的地方，在同一位置使用同一網絡，於紅米 2 上就收不到 4G 訊號（試過 3HK 只能收到 Edge……）。所以如果大家想收到較穩定的 4G 訊號，建議等行貨推出才考慮入手吧。
▲支援雙卡雙待單通功能，而且兩個卡槽都支援 4G 網絡。
▲打電話時可以選擇任一號碼。
▲不過由於只支援單通，所以當講緊電話時如果另一張 SIM 卡有來電，就會打唔入啦。
▲上網都可以指定用哪一張 SIM 卡。
▲使用 SIM 卡槽 1 的 csl. 上網，以 OFCA 軟件測速錄得 12.53Mbps 下載速度及 7.19Mbps 上載速度，只屬一般。
▲至於用 SIM 卡槽 2 的 3HK 上網，以 OFCA 軟件測試亦只有 17.34Mbps 下載速度及 5.34Mbps 上載速度，可見在香港使用 4G 表現只屬一般。
【評測】小米 14 外形 手感 相機 屏幕 效能開箱評測 【評測】小米 14 Ultra 外形 手感 相機套裝 影相拍片 屏幕 效能開箱評測 【評測】Redmi Buds 5 Pro 外形 佩戴感 功能 音質開箱評測
至於熒幕方面，紅米 2 採用了 4.7 吋 720p 解像度 IPS 熒幕，清晰度是足夠的，而且因為採用了 IPS 材質，所以可視角度亦十分高，就算從側面睇熒幕都可以清晰睇到熒幕上的文字及圖片，亦未見有變灰或者清晰度下降的情況。不過熒幕色準方面，就有輕微偏黃情況，Edward 就覺得在使用上不會有太大影響，而且輕微偏黃亦對雙眼較好。但如果大家執著於完美熒幕，就要考慮一下了。
▲用紅米 2 的 4.7 吋 720p 熒幕睇 unwire.hk 網頁，字體及相片都好清晰，不過就有輕微偏黃的情況。
▲用來欣賞 720p 的《Avenger 2》預告片，質素亦算唔錯，清晰度高之餘，顏色亦算自然。
▲由於採用了 IPS 材質面板，所以可視角度都算幾高。
紅米 2 的內建瀏覽器亦設有夜間模式功能。
▲開啟後底色會變黑而字體會反白，最啱夜晚熄燈瞓係床上面睇網頁玩手機時唔易因熒幕太光而傷眼。
至於鏡頭方面，由於紅米 2 屬於入門級手機，所以只採用了 800 萬像素鏡頭，不過仍然採用了 5 片式鏡頭，而且亦支援 HDR 模式及夜景防震功能（雖然並非 OIS）。整體來講，無論日景還是夜景，影相質素都算唔錯，只係有輕微油畫化現象、係唔夠光環境下影光位時會出現紫邊、以及影夜景時較多雜訊。不過以一部 1 千蚊左右的手機來講，算係滿意有餘了。另外值得一提的是，相機介面算是易用，在右方向上、下輕掃就可以呼叫出設定介面，無須按下目錄鍵，習慣使用智能手機的用家，應該可以好快上手。
▲採用 800 萬像素主鏡頭。
▲相機介面都算易用，而且有手動模式，可讓用家自行調較白平衡及感光度，係入門手機來講算少見。
▲亦有美顏、夜景防震等模式俾大家揀。
▲場景模式都有唔少選項。
▲亦可以揀唔同濾鏡，可以影相時玩埋類 Instagram 的特效。
至於效能方面，紅米 2 採用了 Qualcomm Snapdragon 410 1.2GHz 四核處理器，採用了 64-bit 架構，效能都算可以，不過手機記憶體就只得 1GB RAM，一般文書或者玩下 WhatsApp、LINE、Facebook 等都算可以勝任，但如果用來打機嘅話，玩圖像處理需要較高效能的遊戲，就可能會有點吃力了（基本上一開機大家已只有 400MB 或以下的 RAM 可以使用……）。小編試過分別用安兔兔、PCMark 及 3DMark 測試，分別只獲得 20,690 分、2,922 分及 2,646 分，可見一斑。
▲以紅米 2 的規格，只能係安兔兔中獲得 20,690 分，算是低分，比 ASUS 的 ZenFone 5 仲要低，不過始終屬於入門手機，可以理解啦。
▲一開機 1GB RAM 其實都係得番最多 457MB 左右可以用，一半都無。
【評測】小米 14 外形 手感 相機 屏幕 效能開箱評測 【評測】小米 14 Ultra 外形 手感 相機套裝 影相拍片 屏幕 效能開箱評測 【評測】Redmi Buds 5 Pro 外形 佩戴感 功能 音質開箱評測
對於一部一千蚊左右的入門手機來講，相信大家都唔會對佢有太高要求，但使用時間方面，最少都希望可以用到一整日吧。紅米 2 來講，小編使用 PCMark 內的電池測試軟件測試它的 2,200mAh 容量電池，在性能模式下獲得可以使用 4 小時 22 分鐘的結果，可見如果大家使用均衡模式，用上一日應該還算勉強可以吧。不過紅米 2 是可以換電池的，就算真係無電，只要買定多粒後備電，就算再高用量的用家都唔洗驚啦。
▲配備了 2,200mAh 容量電池，而且紅米 2 採用可換電池設計。
▲以 PCMark 內的電池測試功能測試紅米 2 的電池表現，在性能模式下由 100% 到 20% 大約用了 4 小時 22 分鐘，如果在均衡模式下要用上一日，應該都勉強足夠。
整體來講，紅米 2 性能唔算凸出，熒幕亦唔算特別優秀，鏡頭像素亦好難同旗艦機媲美。但以性價比來講，作為一部副機（2nd phone），能有足一日的電量，加上足夠正常使用的效能、不錯的相機質素、以及支援雙 4G 的功能來講，加上亦支援 Google 服務，已經算係唔錯有餘啦！如果大家預算有限，又想買部 2nd phone 出 trip 旅行用，紅米 2 確實可以考慮。
售價：$1,050
查詢：米舖（6997 0808）
【評測】小米 14 外形 手感 相機 屏幕 效能開箱評測 【評測】小米 14 Ultra 外形 手感 相機套裝 影相拍片 屏幕 效能開箱評測 【評測】Redmi Buds 5 Pro 外形 佩戴感 功能 音質開箱評測
