Edward 自細都鐘意戴錶，所以智能手錶興起之後，都曾經諗過想買番隻，令自己個人都智能啲。不過問題係而家市面的智能手錶，隻隻都要一、兩日差一次電，相比以前戴的手錶，最少一、兩年先要換一次電比較，真係好大分別，所以到今日都未有一隻值得令我自掏腰包入手。直至昨日出席 Withings 的 Activité 發佈會，試戴過呢隻真正瑞士製造的智能手錶，終於有興趣入手了。以下有更多資料：
而家的智能手錶，最大問題就係使用時間太短，一兩日就多就要差一次電，而今次呢隻 Withings Activité，內置的是一般手錶用的 CR2025 鈕扣電池，要換都好方便；而且一粒鈕扣電，根據官方表示可以用到 8 個月！雖然未至於好似傳統手錶咁用到一、兩年，但作為智能手錶來講，OK 有餘啦！
大家都知道，名錶一向都係以瑞士製造出名，而今次呢隻 Withings Activité，就正係瑞士製造，相比一般「Made in China」的品牌，始終都係矜貴得多。而且在造工上，它用上了藍寶石凸錶面、316L 鋼錶殼及法國 Haute-Couture House 供應商的小牛皮錶帶，比起塑膠物料的一般智能手錶來講，戴上手無論睇定係用都感覺高貴好多。
採用藍寶石凸錶面，十分耐用耐刮。
從錶身可見 SWISS MADE 字樣，證明是瑞士製造。
每隻 Withings Activité 均有一張證書，證明是瑞士製造。
錶身採用 316L 鋼製造，是比較高貴的鋼金屬。
另外錶身好輕，Edward 之前都試過其他智能手錶，就算最輕的一款，感覺都真係「幾重」，而戴上 Withings Activité，感覺真係好輕，唔似戴咗嘢上手咁，而它的小牛皮錶帶，感覺好柔軟，戴係手真係幾舒服；不過它的錶帶就似乎短咗啲，Edward 手臂都唔算特別粗，但係要戴得舒服都只能扣尾二個格，而且錶身作為男仔錶來講有啲偏細，女仔戴會比較適合。
Withings Activité 戴在手上，感覺其實很輕很舒適。
錶帶採用小牛皮革製造，而且是名廠 Haute-Couture House 製造，十分柔軟舒適。
不過錶帶似乎比較短，Edward 戴在手上，扣在尾三格會稍嫌緊，尾二格會比較舒服，但始終也是比較短，對於女士來說佩戴起來會比較舒服。
此外，Withings Activité 亦支援防水功能，而且可最深達至 50 米，仲咸、淡水都唔驚，就算戴住來潛水都唔擔心。不過要記住，如果要戴住遊水、潛水，記得換番跟機送的塑膠錶帶，好彩要換都唔難，錶帶有個扣，啪一啪就可以拆除同埋裝上，超簡單細路仔都識。
游水的時候，一定要換上膠錶帶，而隔手錶是有附上膠錶帶給用家的。
大家會唔會覺得：到呢一刻為止，Edward 好似都無講過任何其他智能手錶做得到的功能，咁呢隻手錶又點可以叫做智能手錶？其實在手錶內它內置了多個感應器，配合 Health Mate APP，不但可以紀錄用家的活動量，更可以圖表分析睡眠週期，從而改善睡眠質素。此外，它亦當然可以監察用家步數、卡路里消耗量、跑步持續時間及距離等。此外，稍後 Withings 亦會增加游泳監察功能，當大家游水的時候，也可以監察身體狀態。
另外，大家要留意的是，暫時 Health Mate APP 只支援 iOS 平台，至於 Android 用家，Withings 表示會在稍後，亦即是三月左右才推出相關程式。如果你是 Android 用家，就要多等一陣啦。
使用 APPS 可以配對 Withings Activité，或者其他 Withings 其他配件。
Health Mate APP 可以記錄用家的每日步數、體重等。如果配合血壓計，甚至可以記錄血壓。
APP 上方的 widgets 可讓大家清楚看到已行走的步數，亦可以設定大家希望減至 / 增加至的體重。
亦可以設定鬧鐘。
整體來講，Withings Activité 在功能上其實都足夠一般人使用，不過問題在於：一隻看起來好似不太「智能」，但索價高達 $3,800 的智能手錶，究竟是否值得？雖然瑞士製造、藍寶石錶面、316L 鋼外殼、50 米深度防水（5ATM）、法國 Haute-Couture House 供應商的小牛皮錶帶、一枚電池用上 8 個月、換電簡單電池亦容易找到等，這些特點，確實令手錶加分不少，不過其實坊間有些一百幾十、或者幾百元的手帶，亦能做到類似功能，是否值得為了造工、手感，而花上 $3,800 入手 Withings Activité，那就要看大家的價值觀了。
[divider]
如果大家覺得 Withings Activité 比較貴，其實有一個比較便宜，售價只是 $1,288 的選擇，就是 Withings Activité POP，功能與 Withings Activité 完全一樣，只是造工上，它只是用上一般的塑膠錶面，而外殼雖然仍然是鋼，但只是一般的鋼殼。而且錶帶也只是塑膠錶帶，手錶亦只是 Made in China 而唔係瑞士製造。不過如果大家只是睇上 Withings Activité 的功能，但難以負擔它 $3,800 元的售價，Withings Activité POP 確實是不錯的選擇。
平價版的 Withings Activité POP 採用便宜的塑膠凸錶面。
錶殼亦採用一般的鋼金屬。
而錶帶亦只是一般塑膠，不過就比其他品牌的塑膠錶帶柔軟。值得一提的是， Withings Activité POP 是在中國製造。
有不同顏色的錶帶供用家選擇。
售價：$1,280（Withings Activité POP，三月推出）；$3,800（Withings Activité）
查詢：Lava Tech HK（2768 7009）
