近年不少中國手機品牌，都頻頻推出性價比高、外形無土氣的智能手機，而作為中國品牌 Top 3 之一的中興亦不甘人後，今日在香港發佈最新，只售 $1,999 的高性價比手機 Blade S6。規格上確實見得下人，而且手感都算 OK，不過大家會唔會覺得：「咁熟口熟面嘅？」
無疑，相信就算 Edward 唔講，大家都會有一個感受：真係好似某部手機喎！無錯，呢個都係小編拿到手的第一個感受，雖然 Blade S6 個芒都有 5 吋，但邊框就只有 2mm，所以拿上手手感同某廠的 4.7 吋智能手機差唔多，可以單手操控無問題。另外，某廠手機的機背鏡頭框凸出來，有用家投訴會容易整花，而 Blade S6 的鏡頭位就同機背完全平整，咁就唔洗擔心呢個問題啦。不過機背始終用上塑膠物料，唔似某廠手機咁用哂金屬機殼，手感始終差少少，但售價上都平上一大截，無辦法啦，將貨就價，都抵玩嘅。
唔知大家覺唔覺得部機個樣熟口熟面咁呢？
採用輕觸式按鍵設計。
可以在設定中選擇 Home 鍵旁的兩個輕觸式按鍵的排位，但就唔可以選擇功能。
機頂是 3.5mm 耳機插孔。
開關及音量鍵位於機身右側。
機底就設有 Micro USB 端子。
熒幕邊框只有 2mm，在入門手機來講算係好窄。
不過邊框窄的缺點，就係單手操控時好容易誤觸熒幕。
機背採用塑膠物料製造，而且外殼不能拆除。
設有銀色及粉紅色兩種顏色選擇，男女都啱用。
內置喇叭位於機背右下角。
鏡頭與機背完全平整，唔會凸出來。
5 吋 In-Cell 720p 解像度熒幕，邊緣採用少許弧形設計，亦有助提升單手操控時的手感。
另外，ZTE Blade S6 的一大特點，就係加入咗唔少體感操控功能，例如：搖兩搖機身可以開啟電筒或者計數機、禁住音量增加鍵再向上一揮並將前置鏡頭對著自己，就可以快速開啟自拍相機、橫向機身並按住音量增加鍵，再將機身向上一揮，就可以快速開啟主相機、禁住音量減少鍵再以 V 字形揮動機身就可開始播放音樂、以及禁住音量減少鍵再以圓形圖案揮動機身就可以停止音樂播放等。這些體感操控，Edward 在發佈會中都一一嘗試過，都唔算太難上手，基本上試一兩次都會識用，而且都算幾實用，如果買咗呢部機的讀者，不妨試試。
內置唔少體感操控功能，而且好易上手。
另外，Blade S6 亦支援 4G LTE 網絡，而且支援 1800 / 2600 / 900 / 700 (800) MHz 頻譜，基本上香港使用是完全無問題。此外，它亦支援雙卡功能，不過由於機殼是不能拆除的，所以需要像 iPhone 般用針篤出 SIM 卡槽，這方面是不夠 user-friendly。另外，它只有 SIM 1 卡槽能支援 4G，而 SIM 2 卡槽就只能使用 GSM 2G，亦即是說只能用來打電話（相信今時今日好少人會用 EDGE 網絡來上網啦掛……）。相比其他同價品牌來講，始終競爭力稍嫌不足……
支援雙卡功能，而且同一卡槽可放兩張 SIM（左方，較外邊是 SIM 1 卡槽，較內裡是 SIM 2 卡槽），但只有 SIM 1 卡槽支援 4G 網絡。而右方的是 microSD 記憶卡卡槽，最高支援 64GB。
支援 4G LTE 網絡。
另外，在相機鏡頭來講，它配備了 Sony IMX214 元件的 1,300 萬像素主鏡頭及 500 萬像素前置鏡頭，在入門手機來講，都算係基本配備。另外，它的介面亦設有簡單模式及進階模式，前者基本上係「傻瓜機」設定，只要設定好相機像素，禁個制就影到相或者拍到片；而後者就可以俾大家設定 ISO、白平衡等，適合對攝影有一定認知的用家使用。至於質素方面，Edward 使用佢的自動模式拍攝相片，發覺相片似乎偏紅及偏暗，而且無論前置定後置鏡頭，細緻度都稍嫌不足，而且放大來睇都有油畫化現象，整體表現來講只能說是一般。
相機介面來講，可以選擇呢個 Simple Mode 簡易模式。
亦可以揀呢個進階模式。
用來自拍都幾方便，始終有 500 萬像素，入門機來講 OK 啦。
主鏡頭（1,300 萬像素，全自動）
前置鏡頭（500 萬像素，全自動）
另外，ZTE Blade S6 亦支援入門機少有見到的 Hi-Fi 音效，不過 Edward 手上未有高質素音樂，所以在現象較難作出測試，官方亦未有說明 Hi-Fi 音效所指為何（是否支援 24bit / 192kHz？官方未有說明），所以針對此功能就不作太多評論了。至於效能上，它採用了 Qualcomm Snapdragon 615 八核心處理器，屬於平價版的 Qualcomm 八核機款，加上 Adreno 405 GPU 及 2GB RAM，一般情況下使用其實都幾順暢。Edward 亦以安兔兔測試過，獲得 28,380 分，比分大致與兩年前推出的 HTC One M7，以及紅米 Note 相若。
支援 Hi-Fi 音效，而且無論聽歌定係睇戲都用得到，不過就要用跟機的音樂或者影片播放器。
效能來講，用安兔兔測試都有 28,380 分，入門機來講算過得去。
操作介面都算順暢，而且翻頁時都有立體效果。
據官方表示，ZTE 呢部 Blade S6 是全球首部採用 Qualcomm Snapdragon 615 八核心處理器的 Android-L（即係 Android 5.0 Lollipop）的智能手機。
最後一提電量，據手機內置 meter 可見，77% 電量可以大約用 11 小時，如果計算起來，它的 2,400mAh 容量電池理論上可以用到超過 14 小時，即係用到一日應該問題不大，入門機來講算係咁。
整體來講，ZTE Blade S6 在操控上、效能上、功能上都唔算特別「標青」，但作為一部入門機或者 2nd phone / 後備機來講，都已經足夠有餘（當然，如果你唔 like 佢個樣同某廠 5 千幾蚊的手機太似樣的話另作別論）。不過外形真係同某廠手機有點相似，而且 Blade S6 係無錯支援 4G，又有雙卡，但係佢就唔支援雙 4G，第二 SIM 槽只能用到 2G GSM，對於需要經常中港兩地跑，又想兩地都可以用 4G 高速上網的用家來講，始終都要換卡，真係同用部單 SIM 4G 無乜分別。如果你問 Edward，以呢個功能，可能紅米 2、或者遲啲可能會係香港推出的 Huawei Honor 4X，好似仲「值租」啲喎！
售價：$1,999
查詢：ZTE（3759 0622）
