Fujitsu 之前發表商用型 Lifebook S935，規格及設計都很「超班」，可惜售價真係太貴，但原來它們同期還有一款 Lifebook U745，設計冇輕薄、電量冇咁強，但機身都用了鋁製外殼及配備同級保安功能，唔知實際表現如何呢？（以下有更多資料。）
Lifebook U745 同之前 Lifebook S935 同屬高階型號，雖然設計冇咁輕薄，但重點是外殼及內框都由全鋁製成，金屬感比 MacBook 強烈，而且設計還加了紅線點綴，感覺冇咁沉悶。設計方面，它唔似 S935 會有 DVD-RW 光碟機，但機上都有多組 USB 3.0、Display Port、VGA 輸出、SD 讀卡器及伸縮設計的 LAN 頭，擴充能力同一般 Notebook 冇分別，而且它還有之前 S935 介紹過的 PalmSecure 或指紋辨識等保安功能。
▲ 外殼及內框都由全鋁製成，而且加上紅色感覺冇咁沉悶。
▲ 拿起感覺都唔算好重。
▲ 鍵盤屬標準設計，按鍵手感比較彈，但 Touchpad 空間略嫌太細。
▲ 機旁設有 3 組 USB 3.0、Display Port、VGA 輸出、SD 讀卡器。
▲ 這個伸縮設計的 LAN 頭，睇落好唔穩陣，但其實佢有安全設計，萬一 LAN 線被扯到接口會自動脫出，不會讓 Notebook 跌下。
▲ 跟 LifeBook S935 一樣配備 PalmSecure 保安設計（最低配置不包括）。
Lifebook U745 重點之一是搭載最新 Intel 第 5 代 Core i5 或 i7 處理器，小編 借來屬最低配置的 Core i5-5200U，擁有雙核四線程架構及整合 HD Graphics 5500 內建顯示，性能不弱，但這個配置只有 4GB RAM 及 128GB SSD 吸引力大減，而且 14.1 吋屏幕只備有 1,600 x 900 解像度，畫面亮度充足，而且用了「霧面」不易反光，但缺點是顏色比較偏灰。
▲ 屏幕唔反光，亮度足夠，但缺點是解像度只有 1,600 x 900。
▲ 搭載 Intel Core i5-5200U、4GB RAM 及 128GB SSD。(購買時跟 Windows 8 的….)
▲ 經過 Battery Mark 測試負載大約可運行約 5.5 小時。
▲ 底部還有底蓋可以升級 RAM 及 SSD。
雖說 Lifebook U745 冇之前 Lifebook S935 定位咁高，但作為售價過萬元的新機離說，U745 規格並唔太吸引，主要原因係屏幕冇 1080p 以上級數，而且最低配置只有 4GB RAM，即使可自行升級，但條件都有點太苛刻，相比之下 Lifebook S935 即使更貴都感覺吸引一點。
