創新及科技局成立日遙遙無期，但顧問則率先上馬，特首話，「想藉楊偉雄的國際經驗、人脈關係等，向政府提出建議，例如環保、公共交通及電子教學等方面如何利用創新科技。」佢咁樣空降個人落黎有冇問題就輪唔到我俾意見，我比較有興趣的係政府想點利用創新科技，提升香港社會的整體科技水平。
單係睇公共交通，香港交通發達、四通八達，去邊都好方便，基本上冇乜問題丫，但點解當對比起其他國家，總係會俾人一個感覺「差咁啲」或者「冇咁先進」？究竟係差啲咩呢？去左一趟旅行之後，我就知道啦！
新年的時候，小妹同朋友去左一轉中東了解下人地的風土人情，其中包括大力發展創新科技的以色列，同埋幾個鄰近國家。以色列係用希伯來文(עברית)，鄰近地區就主要用阿拉伯文(العربية)，去到見到呢啲神秘文字，即刻變左文盲，千祈唔好老奉以為人地個個兩文三語，一定識英文，Bilingual 呢樣野唔係度度有，不過好在我都叫做係遊客區遊覽，多啲人識英文。所謂路在口邊，諗住唔識路就問人啦，應該冇事嘅。因為朋友已經先行一步，到達以色列，我落機之後唯有自己去目的地會合佢地…
你唔好睇佢個火車站名有英文，車上廣播同顯示板都係得希伯來文架咋，點落車？首先梗係問定人搭幾多個站啦，唔識字都仲識數丫嘛 XD 其次就係開 Google Map 啦～
＊科技小知識＊ 唔使 Network 都定到位架，有 GPS 丫嘛，只要你身處室外，準確度就好高架啦，我次次去旅行都係靠佢。不過如果你好似我咁冇 Network，就要預先搵定你想去的地方，唔係寫粒字出黎咁簡單，因為你根本唔識睇 XD 而係要預先 pin 左係個 Google Map 度，或者下載個 offline map，因為冇網絡係 search 唔到野架。
搭完火車仲要搭幾程巴士…好在以色列都係用阿拉伯數目字編巴士咋，如果唔係乜車都唔使搭。搭幾多號就一定係問人架啦，但又係同一個問題：點落車？梗係開 Google Map 啦，yeah！開著定位跟住行，差唔多到就落車，咪唔會盪失路得太誇張囉！
搭巴士呢度我除左想講 Google Map 可以幫到你，仲有一樣好特別的野。你望返右邊張相，人地個巴士站係用太陽能發電，而個電子站牌有 3 樣資料，而且不停更新：（希伯來文同阿拉伯文都係從右向左讀）
1．巴士編號
2．巴士目的地
3．巴士到達時間
呢個咪就係個先進位！另外，巴士上係有自動報站系統，唔使人手㩒而導致 Miss 站漏報，長途車同火車有 WI-FI，仲可以差電，好貼心的服務（心心眼）。
但其實講真，呢幾樣野都唔係啲咩新技術，近近地台灣、韓國、大陸部分城市都有，但香港暫時只有地鐵做到「到達時間」，巴士仲成日脫班（sosad)。所以如果要改善交通服務，同埋加入創新科技，我諗政府同顧問除左要諗整多幾多隻冇人用的APP出黎搜尋交通路線，最緊要係從根本入手改善基建同整合路線，如果唔係 on top 搞幾多野出黎都冇用。
關於交通，去旅行個陣仲遇到好多驚險刺激的遭遇，下次再講 🙂
附上一張被白雪濃罩的耶路撒冷古城全景照 😀
^耶路撒冷古城一夜之間白雪紛飛，好靚亦都好大鑊 （攝於 2 月 20 日）
酒店預約價格歧視無處不在 善用 VPN 精明消費避免不必要開支 AIRSIM 推出外遊 plan 企業方案 0 卡費 + 無合約 + 無月費 + 先用後付 + 管理易
