而家資訊科技咁發達，好似多左好多渠道俾大家同親朋戚友聯絡感情，例如最 Common 嘅就有社交平台 Facebook、Instagram、Snapchat 等等；即時通訊軟件有 Whatsapp、LINE、Wechat 等等。如果你想認識新朋友，仲有 Tinder、本地製作的 Worthy（當然 WeChat 都得啦 XD）。但無論渠道幾多都好，都難以掩蓋一個都市現實：人愈大，愈難交到知心好友。
最近，有朋友向我訴苦，話出左黎做野之後，更加難認識到「正常」人（大家對「正常」的定義或略有不同，但我諗係志同道合的意思掛～）。唔奇丫，社會係一個大染缸，「旅途上你增添了經歷」，稜角就自自然然消失了。除左土地問題之外，如果你對工作冇乜熱誠，對人生冇乜憧景，意志就消磨得更加快，慚慚正常人都變得「不正常」了。
我呢個年紀的朋友仔，十個入面有超過一半有穩定對象，甚至開始進入人生另一個階段，也難怪仍然單身的朋友開始有點焦急，怕趕不上「生仔」年齡。所以，佢話我知，佢參加左一個網上相睇計劃，想係入面識啲有緣人。
我就話啦：「點解有咁多 app 唔用，要玩呢個計劃呀？」
朋友：「因為我識得有人真係成功左！而且可以輸入多啲資料，可以睇詳細啲，冇咁盲中中」
我：「咁你成功左未呀？」
朋友：「我中過幾次伏……」
哦。好奇心驅使之下，我試玩左一次XD
▲呢個交友平台叫「緣份配對計劃」，玩法相當簡單，首先連接 Facebook，跟住係報名時段提供個人資料（年齡、興趣、性格…），唔使俾相！
▲然後係配對時段入去，你就可以睇到兩張 lists，一張係男仔，一張係女仔。裡面有齊晒性格興趣年齡身高體重…你就可以按你的要求揀選，男仔可以揀 3 個人，女仔可以揀 6 個人 。
個計劃同現實好唔同，現實中雖然女仔較多，男女比例仍然係接近 1：1，但計劃之中，參加的男士比例高很多，而且很多時候會因為比例失衡導致無法參加，唔知係宣傳對象問題定係其他問題啦～
▲最後到結果啦，系統會話你知有咩人揀左你，你揀的人有冇揀你，同埋俾聯絡資料你。之後就睇參加者的造化啦。
我玩過一次，配對中左一個朋友，另外有十幾個朋友仔揀左我，不過都冇聯絡資料。其實有少少失望，原因係配對左俾我個個人冇搵我，同埋係我後來係討論區見到有「賽後檢討」，有啲人兄話攞到聯絡資料，但始終唔敢聯絡對方，驚自己條件唔夠好。
即係咁，而家有咁多方法俾你認識新朋友，甚至幫你配對埋，但有好多野你唔踏出第一步，就真係永遠都唔會有結果，到時怨真係冇乜意思。好多時你自己睇自己同人地睇你的眼光好唔同，大家心入面把尺係量度唔同嘅野。傾計嘅野，咪開始左先，唔啱傾咪 block 左佢，又唔係話要即刻結婚生仔。
上次我 hea 玩，搞到唔成功，黎緊呢一輪等我又參加多次，睇下會唔會真係識到新朋友先，哈哈！
