近年智能手機市場愈來愈多中國品牌加入，就連之前推出智能電視的樂視，早前亦請了各地傳媒（包括 unwire）參加他們的樂視超級手機發佈會，而它們的「入門」型號「樂 1」早前在中國開售，最近亦有水貨舖引入到香港。究竟用落係點？就等 Edward 同大家介紹一下。
「樂 1」跟好多中國品牌手機一樣都用了幼邊框屏幕，雖然未至於無邊框，但外觀跟貴機差唔多，旁邊有有金屬邊框，機背用了似玻璃的塑膠物料，微弧曲線令手感更貼手，單手操作尚算輕鬆。另外大家可能會問：佢機面除了上底同埋下底，其餘部分均係被玻璃覆蓋的熒幕，咁單手操控個時會唔會容易誤觸熒幕？Edward 試用過一排，答案係：唔會。因為佢熒幕左、右側仍然留有一條約 3mm 的黑邊，會係大家單手操控個時作為緩衝作用，以防手掌多肉的位置誤觸熒幕邊緣位置。不過有一點覺得唔慣的，就係熒幕同機邊交接的位置都幾 90 度 sharp-cut 落去，變成有少少界手，用落要啲時間適應。
▲ 5.5 吋屏幕拿起單手操作都算輕鬆，而且感覺亦非常貼手。
▲金屬邊框，而機背用了微弧形設計。
▲ 機背雖屬塑膠，但反光表面令它有種玻璃感覺。
▲ SIM 卡槽可放 2 張 Micro SIM 卡，但卻不支持 MicroSD 擴充。
▲ 有靜音鍵設計真令人意外…
▲ 率先採用 USB-C 連接介面，好處係兩邊插調轉插都冇問題。
▲ 雖然 USB-C 連 Macbook 都充到，但「樂 1」跟來的只屬 5V / 2A 火牛，充電時大約有 1.5A，而且亦不支持 9V 充電。
「樂 1」配備 5.5 吋 1080p Sharp 屏幕，解像度唔係特別高，但賣點係官方指佢有 85% NTSC 色域，因此小編找來 iPhone 6 Plus 及 S6 Edge 來比較，感覺上「樂 1」比 iPhone 6 Plus 偏藍少許，但都還算自然；與 S6 Edge 比較就明顯冇咁黃，感覺都算唔錯。不過，缺點係屏幕唔算好光，正面睇開到最光都係僅僅夠，更莫講話打側睇，令小編不禁懷疑：如果係烈日當空下睇「樂 1」的熒幕，就算較到最光都睇唔睇得清？
▲ 「樂 1」對比 iPhone 6 Plus (左) 屏幕只係微偏藍，表現算唔錯。
▲ 屏幕亮度唔高，打側睇更是非常暗。
「樂 1」雖屬「入門」型號，但機內搭載 MediaTek Helio X10 八核 64-bit 處理器、3GB RAM、以及支援 4G 雙卡雙待（沒有雙通），規格跟 HTC One E9+ 接近，實際用落如何？先講效能，一般操作、睇高清片完全唔覺有咩問題，但於 Antutu 測試佢錄得 50,000 – 52,000 分，成績拍得住 Snapdragon 810，以 2 千頭的手機就有呢個級數，真係幾「恐怖」。網絡方面，Edward 都測試過可以兼容香港 4G，小編插入 csl. 的 4G 卡係 SIM 卡槽 2，都有 12Mbps 下載 / 41Mbps 上載效果。
▲ 搭載 MediaTek MT6795 八核處理器及 3GB RAM，於 Antutu 可錄得約 50,000-52,000 分，成績跟 Snapdragon 810 接近。
▲ 支援香港 4G 制式網絡。
另外，作為主打「內容供應商」的樂視，當然係手機度加入了唔同的自家平台內容，早前「樂 1」發佈時已為大家介紹過，詳情大家可按此。至於用落的感受，樂見主要都係提醒大家有咩新 video 好睇，對於鍾意追新的用家來講，都算方便；至於樂視 LIVE，相比記者會個時，就終於可以同步睇到 3 個頻道的直播，不過啱唔啱睇，就好視乎大家的喜好，事實上入面都有唔少嘢睇（畢竟係中國版），除了必有的最新中國劇、電影，仲有荷里活電影、日韓劇集等，仲要有埋《House of Cards》睇，啱哂鍾意煲劇睇戲的大家。另外，當睇直播時如果覺得唔啱睇，仲可以係熒幕底部向上一劃，就可以睇到播出時間表，要預先睇幾個鐘後的節目，又或者重溫一日前的節目都可以。不過如果有得俾大家按劇集去選播，感覺會仲正。
至於畫質方面，佢可以俾大家按網絡質素而決定用咩畫質來睇，最盡可以去到超清，理論上可以有 2K 質素，不過係 1080p 熒幕上面睇，感覺唔差得遠。另外提提大家，因為睇直播時都幾耗 data，所以建議大家係有 WiFi 環境的地方先好睇。
「樂 1」有其他中國水貨手機的通病：無得裝 Google Play，所有 APP 只能夠透過預載的「應用程式商店」或者其他中國 APP 商店下載，對於用家來講，確實有啲麻煩 （因為唔知個人資料會唔會被竊聽）。當然，大家可以選擇自行透過類似「谷歌安裝器」的平台，係「樂 1」上面裝番所有 Google 服務，不過首先你要先 Root 咗部機，對於初階用家或者唔慣 Root 機的用家來講，真係唔夠用其他港行品牌手機方便。此外，
「樂 1」既然係樂視出品，當然唔會同電視毫無互動，其實手機已預載遙控 App，可透過 WiFi 搜尋網絡內的樂視電視。連接後，大家就可以唔洗再用電視遙控，直接用手機負責兩款遙控的功能，從此轉台、切換來源甚至查看節目表都很方便輕鬆。
▲ 可透過 WiFi 搜尋網絡中的樂視電視，並且同時有 2 款（按鍵 + TouchPad）遙控的功能。
▲ 手機當遙控非常方便，一般要貴價手機才有遙控功能。
「樂 1」配備 1,300 萬像素 F2.0 大光圈鏡頭，備有 OIS 光學防震，規格拍得住貴價機。況且小編 「話齋」中國手機相機隨時都有有意外驚喜。首先，Edward 覺得佢個介面跟 iPhone 好似，對焦都算幾快（約 0.5 秒），按實仲焦點及測光點分開，令曝光可以更準確，而令我驚訝係佢竟然支援 4K 影片拍攝。相片方面，我會覺得佢質素普通
，主要問題係「油畫」，相片解像力一般，但反而我更鍾意佢個 HDR 效果，因此一睇就覺得「假」，平時拍攝我都覺得長開 HDR 相片會更好睇。（反正影相都唔係求真…）不過，「樂 1」最大問題係夜間對焦有點困難，特別夜景經常出現對錯焦情況，要來影夜景就可能要對焦對多幾次。
▲ 拍攝介面勁似 iPhone，但佢最厲害係支持 4K 影片拍攝。
▲ 正常日間拍攝效果還可接受，曝光準確，但相片細節「油畫」。
▲ HDR 效果非常誇張，但我就鍾意夠「假」！
▲ 夜景拍攝多光源時就經常對唔到焦。
從手機角度評價，Edward 真係覺得「樂 1」「超晒班」，規格性能拍得住 $4,000 機種，外觀有金屬框及幼邊框，有 USB-C 介面，加上仲可以睇埋「樂視」節目，呢個價錢已經「機已屈」。價錢方面，這次借來的屬「水貨」，價錢為 $2,050，同官網售價人民幣 $1,499（約 HK$1,850）相差約 HK$200 左右，水貨最麻煩係冇 Google Service，但反而我更擔心到港版推出個時會唔會冇晒野睇…
售價：$2,050
查詢：米舖（69970808）
