香港地出名居住環境窄，放部電腦如果機箱太大部，始終太佔空間；但如果用手提電腦，芒又嫌唔夠大。點算？最近 ASUS 就推出了迷你桌面電腦 VivoMini UN62，機仔細細只有手掌般大，而且效果超勁，放係床頭加個靚芒，用來睇 4K 串流都無問題啦！以下有更多資料：
香港地地方細，但窗台往往就好大，而張床好多時就係窗台隔離，所以唔少人都會放部電腦係睡房床頭，方便瞓住係床度睇高清、甚至 4K 片。ASUS VivoMini UN62 機仔細細，只有 131 x 131 x 42mm 大，簡單啲講一個手掌咁大左右，放係窗台再加個 2K、甚至 4K 靚芒，咁無論係夏天開住冷氣，定係冬天凍冰冰的假日，都可以縮係被竇度睇片打機哩。
▲VivoMini UN62 主機細細，一個手掌捧得起之餘都唔覺累。
▲加埋個靚芒真係幾時想睇正片都無問題。
年青人，尤其是新婚夫婦，都會花上唔少心機，設計屬於自己的潮流部屋。但唔少人往往忽略了電腦機箱不夠美觀，破壞了整間房間的設計。ASUS VivoMini UN62 就採用了禪風同心圓外觀，低調得來不失時尚風格，完全唔似設計呆板的傳統「大牛龜」機箱。用上它，就唔驚破壞整個房間的設計啦。
▲機面採用禪風同心圓設計，低調之餘設計都幾時尚。
▲有黑、白兩色選擇，用家可按個人喜好同房間用色及設計選擇較適合的款式。
大專手提電腦優惠計劃 2024 各電腦品牌學界獨家優惠
可能大家會擔心：ASUS VivoMini UN62 機仔咁細，會唔會效能唔太夠架？其實呢一點大家又唔洗太擔心，皆因它採用了第四代 Intel Core i3 或 i5 處理器，不但 multi-tasking 效能不錯，而且配合它內建的 Intel HD Graphic 4400 圖像處理晶片，就算大家想欣賞 4K 超高清影片都無問題。此外，Wi-Fi 方面它亦支援最新的 801.11ac 制式，唔驚咁多干擾之餘，又比一般 N 或更舊制式更為穩定。就算要以無線串流模式欣賞駁住 router 的 NAS 內的 4K 影片，都一樣流暢無問題。
▲配備 Intel Core i3 / i5 處理器，基本上用來上網、執相、打機都唔會有咩問題。
▲Wi-Fi 支援 ac 制式，用串流模式來睇 NAS 內的 4K 影片都 no problem！
而家嘅電腦，其實好多人都會瞓咗覺都長開，方便下載唔同嘅影音內容，又或者純粹係「懶得關」。既然講放得床頭，最驚就係電腦太嘈，有時真係嘈到會瞓唔著個隻。但大家如果用上 ASUS VivoMini UN62 就唔會有呢個問題，事關就算係 full-load 個時，都只係會發出 26.3dB 的聲浪，而閒置時發出聲音更低至只有 18.5dB！相比在圖書館平均為 30dB、傾計時平均為 60dB 的音量，實在係超靜！所以有了它，大家就算瞓覺唔熄機，都唔驚會嘈到瞓唔到。
▲小編試過玩 Cities：Skyline 時開盡 graphic full-load 部機，電腦都係發出 43dB 的聲浪，真係好靜。
▲至於睇 4K YouTube 片時，由於系統並非處於 full-load 狀態，所以發出聲浪會較低，只是 34dB 左右。
▲至於閒置個時，聲浪更進一步降至 28dB（始終四周點靜都會有環境聲，實際運作分貝應該更低），大家就唔洗擔心會嘈到訓覺啦。
▲相比分體冷氣機發出的聲浪都達到 58dB，相信大家都可以安心。
其實而家香港真係乜都貴，唔止租貴樓價貴，電費都愈來愈貴！尤其是最近夏天，開冷氣都已經用咗一大筆電費，如果長開電腦會進一步拉高電費，對於一般倆口子家庭真係負擔幾重。所以 ASUS VivoMini UN62 除咗靜之外，另一特別就係夠慳家！皆因無論大家是選擇 i3 還是 i5 CPU 的版本，它也是採用一般手提電腦所採用的低電壓 CPU，在閒置時最低只會耗用 6.95W 電力，與一盞 LED 燈膽的耗電差不多！有了它，大家就唔洗驚電費高到嚇死人啦。
▲VivoMini UN62 所採用的 CPU 是一般手提電腦採用的低電壓處理器，耗電極少，就算長開都唔驚電費上會收到「震撼帳單」。
此外，對於平時用慣 Dual 芒、甚至三個芒的用家來講，ASUS VivoMini UN62 雖然機仔細細，但一樣滿足得到，因為它除了有 HDMI 輸出外，亦設有 DisplayPort++ 輸出，透過特別接線，最多可以同時接駁 3 個熒幕，咁樣大家就算要同時 display 好多嘢，都唔驚部電腦唔夠力啦。
▲除了 HDMI 外，還內建 DisplayPort++ 插頭，配合 daisy-chain 串接式接駁技術，最多可以同時接駁 3 個芒一齊用哩！
大專手提電腦優惠計劃 2024 各電腦品牌學界獨家優惠
此外，ASUS VivoMini UN62 端子亦十分足夠，基本上同一般桌面電腦分別唔大，機身合共有 4 個 USB 3.0 插頭，其中位於機側的兩個更支援快速差電功能，接駁手機差電後，比使用一般 USB 插頭差電會快上一倍。咁樣大家就唔需要再靠手機火牛，夜晚手機駁住部電腦差電就得啦。
▲VivoMini UN62 雖然機仔細細，但插頭好足，唔止機背已有兩個 USB 3.0 插頭，仲有一般桌面電腦都具備的 3.5mm 耳機插孔及 10/100/1000 GigaLAN。
▲至於機側，除了設有防盜 Kensington Lock 及 4 合一讀卡器（MMC / SD / SDHC / SDXC）外，還有兩個 USB 3.0 插頭，它更支援 Battery Charging 1.2 技術，可為手機提供快速差電功能，比用一般 USB 插頭充電快上一倍時間呢！
其實今時今日什麼都講求雲端，而且對著手機、平板的時間，隨時仲多過對住屋企部電腦，如果想隨時隨地 access 到家中電腦的檔案，雲端應用就更重要。ASUS 係 VivoMini UN62 入面就預載了 ASUS Home Cloud 家居雲端方案，唔止可以隨時隨地透過手機或者平板讀取家中電腦的檔案，而且亦設有 Media Streamer 服務，可以透過 DLNA 無線功能，將電影、音樂等多媒體檔案無線傳送到家中電視或其他電腦欣賞，方便一家大細係廳睇正片。
另外，相信唔少人都手擁多個雲端儲存帳戶，要逐個管理其實都幾麻煩，ASUS Cloud 就設有 Wi-Fi Go! 功能，可以登入一個 ASUS Cloud 平台，就可以管理 Google Drive、OneDrive、Dropbox 等等多個第三方雲端平台，從此就唔洗記住咁多密碼。此外，它亦可以讓用家遙距用手機或平板操作家中的電腦，就算係公司要拿番屋企電腦的檔案，或者即時登入家中電腦編輯相關檔案再 email 給別人，都好方便哩！
此外，ASUS 更向每位 VivoMini UN62 的用家贈送 100GB 的 ASUS Cloud 雲端儲存空間，相信應該都可以滿足大部分用家的需要吧。
整體來講，Edward 試過唔少迷你電腦，靚仔嘅一般都唔平，而平嘅一般又唔夠靚仔，尤其是襯埋潮流部屋裝修，真係會令整體觀感失色不少。而 ASUS VivoMini UN62 的設計低調而漂亮，加上效能強勁，更難得是機仔細細，十分適合窩居設計，對於居住環境不大的香港人來講，真係不可多得的恩物！最後提一提大家，其實每部 ASUS VivoMini UN62 機背都有兩個小洞，亦支援傳統的 VESA Mount，如果想再進一步慳位，將它放在設有 VESA 備的 LCD 芒背處，也不失為一個進一步節省桌面空間的好方案哩！
▲機背設有 2 個小洞（紅圈標示），只要配合合適 VESA Mount，就可以將它 mount 到 LCD 芒機背，可進一步騰空桌面空間添！
售價：$4,699（Intel Core i3 CPU / 4GB RAM / 128GB SSD儲存空間）；$6,399（Intel Core i5 CPU / 8GB RAM / 256GB SSD儲存空間）
查詢：ASUS（3582 4770）
大專手提電腦優惠計劃 2024 各電腦品牌學界獨家優惠
