讀者們當做嘢做到悶悶哋，要提神醒腦你會做啲乜？去廁所洗個面？飲杯齋啡？美國一間大學的研究報告指睇貓咪短片可以為人們打打氣醒醒神，添加正能量之餘，還可以減少負面情緒。事實上不少研究經已證實，養貓能夠舒緩神經，睇片原來都有類似功效。
印第安那大學傳播學院訪問了近 7,000 名有睇貓片網民，看看習慣如何影響他們情緒。負責研究的 Jessica Gall Myrick 表示觀看貓咪短片是最常見的網上活動之一，研究有助了解互聯網對個人和社會的影響。而數據亦顯示，去年 YouTube 上就有超過 200 萬條貓片，觀看次數接近 260 億次，每條片的平均觀看次數比起其他類別短片高。
研究發現人們睇完貓片後會更精神，感覺更正面；而憂慮、煩惱和憂傷等負面情緒會隨之減少。多數人會在工作或學習時觀看，然而睇片的快感會蓋過躲懶的罪疚感。Myrick 認為，縱使他們在辦公時上 YouTube 睇貓片浪費了時間，但情緒上的補償則可以幫助他們迎接更困難的工作。
究竟有幾多老闆接受員工在工作時間上網睇片，相信打工仔心中有數。不過要睇片，貓咪短片應該會比有性感美女瞓喺波檯嘅花式士碌架更好，起碼有美國大學的研究數據支持。