擁有 66年歷史，曾經陪伴一代香港人成長的荔園將會係聽日晚上 6點重開，今日我依莉詩就率先去左試玩。現在就得我同大家介紹下有咩好玩啦！
因為今次係免費入場，加上荔園主打懷舊，相信會有唔少成年人去懷緬過去，加上除左攤位同機動遊戲外，園內亦有 6個免費景點，包括「荔園城堡」、「電子哈哈鏡」、「好時光收集箱」、「Xbox One 激 Fun 遊園地」、「小露寶蛋糕」同「卡通大尋寶」，包保你就算唔俾錢都可以消磨半日時間。而小編現在就帶大家用最低的消費，去齊荔園必影既地方啦！
係中環犘天輪旁邊，見到一座以昔日荔園城堡設計，塔頂紅、藍、綠三色，上面有紅色霓虹燈寫住「荔園」兩個字，左右兩邊大門有老虎標記的，就係荔園的大門口，嚟到當然要影番張相啦！不過記住呀！今次的路線係唔會行番轉頭，所以唔好諗住走先影呀！
聽媽媽講過，以前荔園有隻大笨象叫 TINO，不過後尾死左。現在係入口就有一隻同樣叫 TINO 的機械大笨象歡迎你。當然就要同佢影番張相啦！其實呢隻象仲識張開口食蕉同噴水，吃完蕉仲會痾 popo 添。如果你有興趣既可以俾一個代幣去餵下架！但小編掟左 4籃蕉，得兩隻中咋！
荔園今次除左重現好多經典遊戲，仲加入左 6個經典卡通人物既元素係會場。其中一個就係 80後個個都識既小露寶，係淘氣小木馬後面就係小露寶蛋糕啦。為慶祝荔園 66歲生日，4層的蛋糕上，放左 66隻小露寶公仔，快 D 同佢地影番張靚相啦！
呢隻 Bling Bling 眼既恐龍相信唔少 Wire 民都見過，俾起以前個隻就係可愛好多。原來佢條尾係瀡滑梯，只要俾 5個代幣就可以係 5米高既恐龍尾巴瀡落嚟，不過今日落雨，而且小編覺得唔太抵玩，所以無試到。
好時光收集箱係一個都算幾大，又有冷氣嘆既好地方，行到熱就可以去參觀下。當中分為 4部分：「露天活動區」擺放左昔日荔園既木馬；「光影展覽區」展出左昔日香港的相片；「藝術區」就展覽左本地藝術家作品；「科技區」設有 Xbox One 同電子哈哈鏡。
▲ 「露天活動區」擺放左兩隻昔日荔園既木馬，可以睇到木馬既顏色已經脫落，變得好脆弱咁。
▲「科技區」有一部遊戲機玩，小朋友可以係度玩下馬仔！
▲ 電子哈哈鏡用左 AR 技術，只要企係鏡前就會有動物頭飾帶係頭啦！
▲ 「光影展覽區」展出左好多昔日香港的相片，當中唔少係小朋友係昔日荔園玩的開心相片，唔知有無一張係你呢？
嘆完冷氣可以去對面既荔園大舞台，舞台佔地 1,540平方米，可容納高達1,000人，而且大部份的活動都係免費，包括工作坊、分享會、歌舞表演等，日日唔同，小編呢度唔多講，要知道有咩就留意荔園 Facebook 啦！
如果行行下免費景點，想玩下機動遊戲同攤位，除左可以散買 $10 個代幣，亦都可以買快證。一套兩人快證 $680，包兩條快證手帶、兩份紀念品同 40個代幣(總值$400)。有快證唔洗排咁長龍去玩 12個遊戲景點，包括：「魔靈小學」、「盞鬼碰碰車」、「百厭滑梯」、「新巴城巴(開心列車)」、「吹漲動物園」、「佻皮城堡」、「鬼馬飛天椅」、「夏日溜冰場」、「翠華咖啡杯」、「滑稽恐龍屋」、「淘氣小木馬」、「快樂叮叮船」。小編就同大家揀左 5個最值得玩既遊戲，一於用手上有限的代幣去玩盡佢啦！
快樂叮叮船同昔日荔園的叮叮船 size 同顏色都一模一樣，可以讓成年人重拾童真，為小朋友創造回憶。一次得 6架船，而每隻船只係可以坐兩位成人或 4個小朋友，最結無快證，隨時要等到 2046 先有得玩呢！
收費：成人 4個代幣 / 小童(6 歲以下) 2個代幣
成日聽人講荔園鬼屋好恐怕，今次魔靈小學以香港鬼校的故事為主題，保留了昔日荔園鬼屋的驚嚇元素之外，仲加入左 AR技術、LED影像同投影技術，非常驚嚇。
收費：8個代幣(你懂的)
雖然話碰碰車之嘛，海洋公園都有得玩啦。但係次次去海洋公園都要排長龍先玩到，今次你有快證波，又點可以唔玩呀？
收費：成人 6個代幣 / 小童 (8至12歲) 3個代幣
新巴城巴係一架迷你火車，全長 196米，沿途可以飽覽「鬼馬飛天椅」、「快樂叮叮船」同「經典掟階磚」，小朋友坐上去一定玩得開心！
收費：2個代幣
以前荔園有個動物園，依家就有個吹脹動物園。獅子、老虎、大象、長頸鹿、猩猩等通通變成氣球等緊你！
收費：成人 4個代幣 / 小童 (6歲以下) 2個代幣
▲ 咪以為氣球動物易照顧，要維持每隻動物都造型神似，原來要兩星期大修一次呢！
如果厭機動遊戲太小朋友，又想係女神面前大展身手，呢度有 22個攤位遊戲，每局 1-3個代幣不等，而每個遊戲都設有細、中、大、特獎，當中包括 6個經典卡通人物的公仔。
玩法：講到荔園最經典的攤位遊戲，當然係掟階磚啦！只要將代幣拋向階磚，唔擲界，就可以獲得綠箭香口膠及香口膠紀念品。
Tips：呢個係靠少少技術加少少運氣，對準一格階磚，將代幣向上拋，唔好咁大力，就有機會中。不過要小心唔好拋錯中間個大洞啊！
收費：一個代幣掟兩次
公仔吸引度：3/5
遊戲難度：3/5
▲ 掟中最多既白色就有香口膠一排，黃色就有鐵盒，橙色就係咕臣。
▲ 睇泥我今日既運氣唔太好，掟左十幾次都無個中。
玩法：將雞毛掃投入唔同顏色既花瓶。
Tips：花瓶好輕，而雞毛掃好重，如果將雞毛掃打斜投，花瓶好容易企唔穩。所以最好係將雞毛掃輕輕垂直向上拋。
收費：2個代幣 4支雞毛掃
公仔吸引度：2/5
遊戲難度：4/5
▲ 成支雞毛掃飛埋去，真係好好笑。
玩法：用捧球棍打出漢堡包指定既層數，並令頭、尾站穩地上就有獎品。
Tips：就係要對準，之後大大力打！
收費：2個代幣 打 4次
公仔吸引度：2/5
遊戲難度：3/5
玩法：成功踢中指定方格或成一直線。
Tips：踢最低個行最簡單，一於先踏最下三格吧！
收費：3個代幣 踢 6球
公仔吸引度：4/5
遊戲難度：2/5
▲ 踢波記住要著番對波鞋呀！
玩法：掟出星星木碟﹛成功掟入洞口。
Tips：借拋物線的原理掟出出去，對準同自己視線水平下少少既洞掟出。
收費：3個代幣 6塊星星木碟﹛
公仔吸引度：3/5
遊戲難度：3/5
玩法：成功將圈套係小露寶，而令圈圈全放係枱上。
Tips：呢個 AIA 嘉年華個陣都有，不過就易玩好多，算係禮物最靚，又最易中既一個攤位。拋既時間盡量令圈垂直落就 OK。
收費：3個代幣 6個圈
公仔吸引度：4/5
遊戲難度：2/5
今次荔園係中環海濱重開，地方一定無以前咁大，好多刺激既機動遊戲，例如過山車都無左，大多都係俾小朋友玩，應該令唔少年青人失望。而另外一樣失望既就係 D 攤位遊戲既禮物，除左小露寶公仔比較吸引之外，我係小忌廉同足球小將的獎品都唔太特別，其他個D就更加唔洗講。如果要用同 AIA 嘉年華一樣價錢去玩，吸引力真係唔大。值得讚既係，佢免費入場同埋有免費景點，而且主打懷舊，入去一家大細行下都唔錯。
