講起 Toy Story ，可能只會想到巴斯光年同胡迪，但係最近配角當道既潮流下，薯蛋頭先生（Mr. Potato Head）今次竟然擔大旗，同薯蛋頭太太一齊係屯門 V City 同 尖沙咀 Mira Mall 開餐廳。我依莉詩今日就率先到屯門店品嚐一下佢地既愛心料理，睇下薯仔同咖哩夾唔夾先！
▲ 薯蛋頭先生換上大廚 look ，介紹緊佢既限定餐牌呢！
今次 Mr. Potato Head Café 其實由 Izumi Curry 變成而成。因為會為持半年咁耐，所以係裝修方便都心左唔少心思。除左牆上裝飾，就連餐墊同杯墊都有薯蛋頭夫婦既樣。而且幾乎每一張枱都有一隻薯蛋頭公仔陪你食飯，就算要自拍都唔洗輪住影，非常貼心呢！
▲ 全間 Café 都有薯蛋頭夫婦既蹤影。
▲ 卡位同卡位之間都有一篇彩色既掛住相隔，令啡色既餐廳主調變得生動起來。
▲ 4款唔同既餐墊都好打耳啊！粉絲們唔好係食飯前偷偷拎走啊！
▲ 杯墊同樣都有 4款，係咪好想即刻叫 4杯凍飲呢？
雖然薯蛋頭先生本身就係一個薯仔，不過主菜並非由薯仔做成，反而係以薯蛋頭先生家鄉既美國地道美食做主打，將漢堡包、熱狗、薯角等引入 Cafe。而當中最特別既就係大部份主菜都會以紫菜等食材拼貼出薯蛋頭既眼耳口鼻，個個都有薯蛋頭先生既嘜頭，好有心思。
▲ 迷你漢堡薯角套餐 $89
三個迷你漢堡既材料都唔同，好適合多心既女仔，想一次過試晒唔同既口味。
▲ 巨型漢堡薯角套餐 $99
想食漢堡既男仔就可以想呢個，大大塊漢堡係入面，夠晒飽肚。不過唔知係味掛住影相，放凍左，小編食既時候漢堡既質感有 D 實，而且無晒肉汁了，所以各位讀者記得襯熱食啊！
▲自家製芝士牛肉薯餅飯 $129
Izumi Curry 本身就係一間主打日式咖哩既餐廳，今次為迎合小朋友既口味，減低左辣度既同時增加左甜度，再加埋薯蛋頭先生既嘜頭，真係睇得又食得！
▲ 吉列豬扒飯 $129
薯蛋頭先生既身體係由加入特別香料既飯拼成，味道相當特別，口感煙韌，加埋招牌咖哩同口厚適中既豬扒，值得一試！
▲ 日本進口煙燻蛋糕 $69
嚟得 Pop-up Cafe 當然唔少得甜品，呢個煙燻蛋糕非常軟熟，而且賣相吸引，相機食先就最岩！
▲ 朱古力醬熱香餅配橙汁 $69
熱香餅會附送枝裝朱古力醬，任你點畫都得，一於設計番個屬於自己既薯蛋頭吧！
▲ 自家製原味蛋糕 $69
薯蛋頭先生既蛋糕咁好有趣，又點捨得食呢！所以小編都無試到呢個既味道呢！
▲奶泡咖啡配曲奇 $49
呢杯咖啡都幾濃，而且偏苦，食完甜品就可以岩岩好中和番。
▲ 士多啤梨特飲配雪糕及曲奇 $55
夏天飲番杯冰凍既士多啤梨特飲，唔單止可以消暑，仲可以增加食欲添！記得塊曲奇要快 D 食啊！唔係就會沉左落杯野度淋晒架啦！
薯蛋頭先生平時都係做配角，只係得佢既精品都算幾稀有，而今次餐廳外就有一間細細地既 Pop-up Store，售賣多款由日本直送到港，首次係香港出售既薯蛋頭精品、玩具同文具，自問係薯蛋頭既 Fans 一定唔可以錯過啦！
▲ 一次過見到咁多薯蛋頭精品，真係好難得呢！
▲ 估唔到薯蛋頭先生既形象可以咁百變，一時變身蜘蛛俠，一時又化身百兵，唔係睇到佢對眼，真係認唔出呢！
▲ 如果用緊 iPhone 6 既薯蛋頭 Fans 有福啦，呢求有好幾款七彩繽紛既手機穀，印花既 $198 一個，樣既就 $298。
▲ 唔係用 iPhone 都唔緊要， 薯蛋頭防塵塞都係 $68 一個。
▲ 公仔可能覺得太大，而呢 D 得雞蛋咁細既細細笠公仔就好岩收藏，一隻 $68。
▲ 想實用既，可以諗下薯蛋頭收納袋，放咩都得，一個 $128。
除左食物同精品，當然唔少得贈品啦！今次 Mr. Potato Head Café 準備左兩份限定贈品俾 Fans 換，唔好錯過呀！
▲ 只要食滿 $200 就有一個印仔，儲夠 10個印花就可以換一隻薯蛋頭夫婦既公仔。 睇嚟 Fans 們要準備餐餐食咖哩啦！哇～
▲ 只要係開幕頭兩個月 Like 佢地 Facebook Page 既顧客就可以換到一個薯蛋頭鎖匙扣，呢個可能易D換 啊！
小編對薯蛋頭其實興趣不大，不過眼見平時灰沈沈既 Izumi Curry 加入左薯蛋頭佈置之後變得好有生氣。至於食物方面，咖哩飯同漢堡都相當有份量，裝飾亦十分有心思，而甜品既賣相都好吸引，不過價錢略貴一點。雖然餐廳既影相位唔多，不過幾乎每枱都有一隻薯蛋頭公仔陪你食飯，加上多款特色餐墊同杯墊，應該都吸引到 Fans 既光臨幾次。
山長水遠去到屯門，當然唔止為食薯蛋頭 Cafe 咁簡單啦！7月19日 到 8月31日 屯門市廣場二期更加有全港首個《反斗奇兵》3D體驗區及互動遊戲區，到時會展出逾200件《反斗奇兵》珍藏品，當中包括反斗奇兵菲林片及胡迪、巴斯光年配音員的簽名相及動畫設計師的手繪簽名手稿等。食飽飯記得順便探埋薯蛋頭既好朋友啦！
除左 Toy Story，隔離既屯門時代廣場一期都有 Domo 展覽。唔單止有 3米高既巨型毛毛 Domo 坐係樹林中等緊大家同佢影相，仲有由日本直送的官方極罕限定精品如 DOMO不同經典造型、絕版公仔。同時更展出過百件 Domokun 既手稿，有興趣既不妨去睇埋啊！
