做左四季既 Heroes 係開季既時候可以話係收視之最﹑ 話題之作，可惜既係 keep 唔住個勢，結果因為收視大跌而製作預算過高最後無再被續訂，製作人一直有意以另一形式繼續故事，不過唔經唔覺已經六年啦。今年秋季， Heroes 即將得到重生，以迷你劇一季 13 集播出，不過無論係故事情節定人物設定其實都好唔同了。
今次迷你劇個故事會定位原系列既一年後，故事仍然講述一班普通人突然發現擁有超能力。故事會由一年前既德州既奧德薩市講起，一場恐怖襲擊發生後，城市受到嚴重摧毀，政府同人民開始怪責起超能力者，佢地被迫四處躲避，但係個啲意圖報復佢地既人並無放棄，當中包括警員 Luke 同 Joanne 。不過去到最後，即使受到報復逼害，超能力者們最終都係一同拯救世界同人類。
拿，故事同人物其實好早就已經有小道消息，咁點解小編都仲要講？皆因岩岩終於出左角色海報（重點來了），讀者可以睇下人物個樣又岩唔岩你心水，角色設定又會係點：
上邊呢兩個就係 Luke 同 Joanne ，佢地兩個受到超能力者造成既慘痛損失之後決定報復。佢地亦係今次迷你劇既主角。
Quentin Frady ，佢係一個陰謀論家。當佢搵到 Noah 之後，話左比佢知奧德薩市襲擊事件既背後秘密。
Tommy 佢只係一個普通既青少年，只想同自己暗戀已久既女仔 Emily 一齊，但自從發現在超能力之後，令佢變得個個都驚左佢。
Malina 同 Tommy 一樣係擁有非凡超能力者，佢自小就被告知佢既前途將會無可限量。
Carlos 係退伍兵，佢有著與別不同既超能力。
Erica 係高科技企業集團 Renautas 既神秘首腦。
Miko 係一個住係東京既年輕女子，佢試圖搵返自己失蹤既父親，與此同時收起自己超能力既秘密，以免遭到橫禍。
Molly 係劇中一個不具備任何超能力既角色。
當然仲有之前一直由奸變忠，時奸時忠既重要角色 Noah Bennet，話時話筆者好鐘意佢個不死女兒 Claire Bennet。
除左以上一Ｄ新角色之外，今次迷你劇亦有用返前作既演員，當中包括：由 Cristine Rose 飾演既 Nathan 同 Peter 既媽媽 Angela Petrelli ；Greg Grunberg 飾演既 LAPD Matt Parkman；Noah gray-cabey 做既 Niki 同 DL 個仔 Micah Sanders (不過已經大個仔左，角色設定可能會有變)；海地人 – Jimmy Sean Louis；Sendhil Ramamurthy 演既醫生 Mohinder Suresh ；最後仲有好突出既 Masi Oka 繼續客串時間旅行者 Hiro Nakamura。
暫時消息只有咁多，有興趣既可以睇住以下既預告止止癮先：
來源： TV Guide
