去年 G3 好受歡迎，但佢延伸的 G3 Stylus 及 G3 Beat 就反應麻麻，而今年 G4 推出後 LG 亦發表了 G4 Stylus 賣點都係平機多支筆，而且仲加入了 Laser AF 等配備，唔知今代又玩唔玩得過呢？以下有更多資料：
LG G4 皮革形象深入民心，但 G4 Stylus 賣兩千幾蚊又點會有「皮革機背」呢？佢外觀比較似 G3，機身冇弧面，感覺頗笨重，不過唔講唔知原來 G4 Stylus 屏幕微增至 5.7 吋，難怪感覺大部咗。機背方面，雖然只有仿不鏽鋼板的膠殼，但質感都唔太差，支 Stylus 依舊收藏在機頂，背蓋可拆開，裡面可照常插卡換電，而值得留意係電池竟跟 G4 一樣有 3,000mAh，理論上應該會更耐用。
▲ 由於屏幕增至 5.7 吋，機身較大令單手操作增添難度。
▲ 灰銀膠殼模仿不鏽鋼板，感覺都唔錯。
▲ 機身會比見慣手機厚一點。
▲ 機頂收藏了 Stylus。
▲ 主要功能都係開啟 QMemo 記錄。
▲ 機背依舊設有背鍵設計，但感覺似使用 G Pro 2。
▲ 背蓋可以拆開，除了可插 Micro SIM 及 MicroSD，3,000mAh 電池還可替換。
去年 G3 Stylus 都頗為劣評，因此 G4 Stylus 這次就乾脆升級得切底一點。首先，屏幕除了加大 0.2 吋，解像度亦升級至 720p，規格都比上代 960 x 540 好多了，而且小編 覺得顏色上算很自然，感覺只係比 S6 Edge 藍少少，而細緻上睇細字亦僅僅足夠。其次，G4 Stylus 配備了 1,300 萬像素鏡頭，特別之處係旗艦機嘅 Laser AF 都有，或許大家覺得佢會有 G3 質素，但事實拍出來相片非常「油畫」，即使對焦唔慢，但評價都只能在「純網上分享」。
▲ 雖然 G4 Stylus屏幕只有 720p，但顏色上只是比 S6 Edge 微藍，感覺算很自然。
▲ 平價型號都配備旗艦機的 Laser AF。（心想：咁筍！？）
▲ 拍攝介面跟 G4 大同少異，但就缺少了全手動模式。
▲ 配備 1,300 萬像素 Laser AF 鏡頭，但相片比較「油畫」風格，若不放大都尚可接受，故此評級僅屬「純網上分享」。（按下可收看原圖）
G4 Stylus 規格屬於入門機之列，搭載了 Qualcomm Snapdragon 410 處理器及 1GB RAM，性能唔算特別吸引，但問題在於只有 1GB RAM 及 8GB 儲存空間（ROM）， 閒置時 Free RAM 只有約 400MB，而實際可用空間就有 3GB 左右，今時今日來講真係僅僅夠，幸好我試用時不停使用 Facebook、Messenger 及用 Chrome 瀏覽器睇高登都未有彈 App 情況。最後，此機支持香港 4G LTE 制式，雖然冇雙卡雙待，但就支援 VOLTE 功能。
▲ 搭載 Qualcomm Snapdragon 410 處理器，於 Antutu 測試約錄得 21,000 分。
▲ 閒置時只有約 400 MB Free RAM。
▲ 8GB 儲存空間實際可用大約只有 3.2GB 左右。
▲ 預載 Android 5.0 版本，並且預載極少原身 Apps。（怕冇位…）
▲ 支援香港 4G LTE 制式及 VOLTE 語音通話功能。
試過 2 代 Stylus 機，小編 覺得 G4 Stylus 今代設計明顯有改良，雖然 Stylus 都係冇特別功能，但屏幕更大確係方便寫字記錄，電量強勁，唯一唔夠係 RAM 同 ROM，如果加到 1.5/2GB RAM 16GB ROM 就更吸引！售價方面，G4 Stylus 其實只售 $2,398，當然一講價錢大家又會拿 Zenfone 2、小米 4i 來… 但我覺得大廠入門機來說都算唔錯，尤其係想要支 Stylus「篤下篤下」的用家。
售價：$2,398
查詢：LG（3543 7777）
