每人每日都係得 24 小時，非常公平，但係自己創業的人往往覺得 24 小時太少唔夠用。尤其初創企業一開始的時候，人手唔多，乜都要一腳踢。你以為工作只係度橋、設計、揼 Code、Debug、修正…？仲有交租、交水電煤費、洗廁所，都未計其他搲 Funding、Networking 等等要用的時間。所以，好多時候，真係會忙到飯都唔記得食，覺都冇時間瞓㗎！為左好好善用呢 24 小時，好多人都會捱更抵夜工作，古有懸樑刺股以「提神醒腦」，而家又有咩速效提神法，又有咩要注意呢？一齊睇睇！
想提神醒腦繼續衝或者想要一對翼，好多人都會選擇飲能量飲品（Energy Drinks），呢啲飲品入面通常都含有咖啡因、牛磺酸（Taurine），同埋維他命 B 雜。其中，牛磺酸（以前係奶粉廣告中老是常出現）在維持腦部運作方面扮演重要的角色，加強腦部的機能。Unwire 喺上年世界盃的時候做左個玩命 Energy Drinks 評測，有齊各款能量飲品的試飲效果，不過，留意返能量飲品由於有高濃度咖啡因，不宜多飲，亦不應同時飲酒，唔係會好容易出現心律不正㗎！
除咗能量飲品，亦有人鍾意飲杯咖啡或茶提提神。咖啡入面含有大量的咖啡因，能夠刺激腦下皮質的作用物，呢樣大家應該都有唔少經驗；而有研究則顯示茶含有的茶胺酸有助放鬆精神，及保持警覺和頭腦靈活，而且冇咁容易上癮，所以專家比較推薦飲茶提神。
我係香港就好少聽人講話食維他命 B 雜可以「提神」，不過有聽講過台灣的朋友會咁樣做。但其實維他命 B 雜只是協助及促進身體的新陳代謝，將身體中的糖/蛋白質/脂肪轉化成能量；適當的補充的確可以幫助「更有效的新陳代謝，產生能量」，但如果你身體內的維他命 B 雜充足，過量的補充也是無法再「補充體力」的喔～
好多要食腦的工作人士（例如我哋 :P）都承認，食支煙可以幫助提神及增加思考力。佢哋唔係唔知食煙唔好架喎，只係上了癮… 大家都知煙含有尼古丁，而尼古丁係一種比咖啡因更厲害的刺激物質，雖然同咖啡因一樣刺激腦下皮質，具有醒腦功能，不過，上癮的機會亦大大提高。不過除了醒腦之外，食煙仲有好多對身體有害的副作用，所以最好都係戒左佢啦！
有時對電腦太耐，對眼又攰又乾，又開始有啲頭昏腦脹的感覺，呢個時候要郁一郁手指啦！按摩一下頭頂正中的百會穴、雙眉邊的太陽穴，內眼角的睛明穴，後頸的風池穴、以及肩部中央的肩井穴、是提神的五大穴位。 輕輕用手指按壓穴位，按五至十分鐘左右，有痠、脹、麻的感覺就得了，對於提神、消除疲勞有很好的幫助架。
我地當然唔排除有啲尖子唔使成日 OT 通頂，但耐唔耐要捱一次夜，咁又有咩秘訣呢？呢個時候，平時用黎通鼻塞的薄荷膏就幫到你了。 其實除左薄荷膏，白花油呀，甚至薄荷糖、牙膏味香口膠、薄荷茶，都有提神效果。不過呢種速效劑惟一的缺點是，精神來得快亦去得快，當薄荷的涼意消失、舊膠?到無味，你就知道要再派膠了～
女仔成日話要瞓個啲美容覺，其實人人適用，尤其要用好多腦汁的創業者，一日燃燒咁多腦力，攰也是應該的，唔好忽略呢啲疲勞警告呀！睇完勁多資料，小編發現 23：00 至 03：00 係最適合瞓覺的時候，原因除左係呢個時候瞓覺能夠休息得最好，其實你都要俾啲時間身體停落黎，掃走啲垃圾。唔好好休息，不斷預支精神只會令工作效率降低，咁又點能夠好好實踐你的創業大計呢？所以，覺，還是要瞓的！
來源：綜合網上資料
unwire.hk 作為生活科技網站，一直有報道科技生活之餘，亦有採訪科技創新企業，試透過我們的綿力推動一下香港創業文化的發展，因此推出類似現時流行的 co-working space 概念工作間 – UNWIRE Space。就在我們位於觀塘區的編輯室旁方便我們採訪報導，Co-working space 結合新媒體宣傳力就是我們與眾不同的 unwire.space 了
