小編本身就唔係一個書迷，但就係每年都會湊熱鬧去下書展。結果每次都係買左一大袋平價書番嚟，買個陣明明好大決心要睇晒佢，最後都係擺到變黃掉晒佢。今日書展一開，小編又再次走入去做半日偽文青。

6 種可能只會在書展先買的書

書展既規範有幾大，相信去過既都知。如果要行晒，可以行你幾日都未睇晒。書既種類又多，無論海外、內地或是本地書都有，不過就真係睇還睇，如果自問無時間、無耐性既人，唔好因為現場個個都一喼二喼，就心郁買一大埋番屋企。以下就係好多人經常因為一時衝動而會買番去既書種。

 

1) 作家簽名書

本來嚟書展買作家簽左名既書係無問題。問題係如果你根本唔知個作者係邊個，本身對個本書又無興趣的話，只係諗住稀有賣左番去，最後本書都只會係用嚟墊煲底。

2) 靚女寫真

排除 D 叔叔買番去有其他用途，如果只係純粹覺得呢排多人討論就買，咁你都係放棄吧啦！一來為推本新書 D 名人會出盡法寶上娛樂版，二來最好睇個幾張一早上網已經有得睇。想同同學、同事有話題，吹兩句呀邊個邊個條腳好長就 OK 啦！唔洗就真買既！

3) 日韓台明星雜誌

D 雜誌係就係幾平， $100 有成 5、6本，但平還平，你要記住已經過晒期。就算你幾鍾意個封面都好啦，娛樂新聞轉得咁快，今日千頌C同邊個傳緋聞，聽日又到第2個了。

 

4) 新版又新版既鬼故

小編曾經都迷過睇一輪靈異故事，甚麼屋村猛鬼實錄、危險人物，但我慢慢發現，原來 D 故事好多都係翻炒又翻炒。無論係 2014年新版同 2015年新版，就同教科書一樣，除左通脹左，內容就無乜大改動。咁不如去圖書館借本舊版仲環保啦。

5) 走輕鬆路線既政治書

政冶書以往都俾人好悶既感覺，但自從一百毛既出現同雨傘運動後，走輕鬆路線既政治書愈來愈多。今次書展就有好多以相似觀點作招來既書。當然，小編既有衝動諗過要買。

 

6) $100 n本既書

當然唔排除係 $100 n本既特價書入面可以搵到好野，不過好多時就係為湊夠 n 呢個數，買多左好多本來唔打算買既書。

 

5大買書以外會做的事

其實去書展唔一定要買書既，仲有好多活動係比小編呢類湊熱鬧既人。

1) 浴衣試著

日本館有得免費試著浴衣，仲有專人教你點著添。每人有 15分鐘俾係著住四圍去，想點影自拍都得啦！

 

2) $38飽魚撈麵

雖然年年書展 D 人都會叫你食定野先好去，入場 D 野食好貴。但小編今日睇過，同出面個價差唔多，仲比我搵到 $5 支牛奶樂 、$25碗叉燒鹵蛋凍拉麵 同 $38飽魚撈麵，份量係就係唔多，不過行到肚餓都係一個好選擇。

 

3) 帶小朋友玩攤位

3/F 兒童天地除左係怪獸家長幫公主、王子買練習既好地方之外，其實都有唔少攤位比小朋友玩同換禮物。

4) 坐定定做勞作

其實 3/F 兒童天地 唔止係俾小朋友去既地方，大人都可以係度坐定定做勞作。呢度除左有近期大熱既皮革銀包、滴膠匙扣、水晶球外，仲可以買一 D 迷你盆景番去自己砌呢！

 

5) Like Page 換禮物

以往書展都會有好多人主動派禮物比你，但依家既情況就完全相反，好似變左西洋菜南街咁，有好多攤位都會為推廣自己本雜誌或者 Apps ，只要你 like 佢既 Facebook Page 或者 裝佢個 Apps 就有份好好既贈品送比你，結果引來大量大排隊出賣自己既個人資料。