香港智能手帶品牌 innoWear 係昨天剛帶來新產品 innoBand-D ， smartband 一直未受港人歡迎，因為用途唔多又唔舒服；不過玩左 innoBand-D 短短半日既小編都覺得外表平平無奇既佢，都相當有內涵同實用啵！
戴 smartband 最怕就係敏感，之前某知名牌子就出現過皮膚敏感問題，令人失去信心；所以今次 innoBand-D 用既係德國醫用級矽膠製造既防敏感手帶，唔需要擔心會過敏。而且手帶既鈕扣都係特別設計既，長時間用都唔會輕易鬆脫；加上佢超輕超薄既設計，帶係手舒服之餘又唔會輕到連唔見左都唔知。
其次就緊係個螢幕係室外既光度夠唔夠，始終 smartband 係用黎 track down 返活動既數據。一開始係強光下真係幾難睇得到，但原來可以係 app 入面揀返 LED 既亮度 1-15 ，調到最光就可以啦；而平時係室內就可以揀返暗啲，無咁刺眼同慳電啲。講到慳電，原來 innoBand-D 有高達一星期既續航力，同埋 innoWear 聲稱少開螢幕同較暗啲更可有十二天的續航力，對於成日唔記得充電既小編黎講簡直係喜訊。
小編覺得最開心既係，佢可以自設手帶名，咁就可以輸入返自己個名，夠晒個人化！除左自設名字外，亦都可以用 app 去改亮度﹑ LED Default Display 項目﹑ 左右手裝置模式﹑制訂每日目標同埋睡眠時間，咁就可以因應返每個人唔同既生活習慣去調節返適當既選項。而係監測數據方面， innoBand-D 係用最頂級既美國 3D 加速儀，誤差相對少；而且用藍芽連接 innoBand app 後仲可以記錄步數﹑卡路里﹑距離同埋睡眠質素，以圖表形式匯報，咁就可以好快知道自己既健康狀況。
小編以前「有 Smartwatch 點解仲要玩 Smartband 」既錯覺一掃而空，因為覺得有啲其他品牌既 smartband 可以做到好平，原來最後發現啲數據係亂七八糟作出黎，晒錢又晒時間。雖然 innoBand-D 小編仲用得好少時間，但試過拎佢黎睇計步數準唔準，精準度相當之高；相比起小編手上既 Pebble (雖然兩者不屬同類產品)既 app 去記錄，相對來說準確度更係幾倍之上！小編亦好欣賞佢既設計， module 係 band 後面，隨時可以拆出黎換唔同顏色既 band 襯衫之餘，做運動亦唔需要擔心會輕易刮花整壞個 module ，花都只會係外面既 band 花。更甚者，對於 Android 人黎講，亦唔需要多帶充電線，因為係用 micro-usb 充電，唔似一般 smartband 有獨特充電線，相當方便，而且單單 50 分鐘就可以充滿電，快得驚人！雖然並無一啲好新鮮既功能，但就係應該要有既功能上更完善，夠實用，所以決定佢同 Pebble 都要並存係我左右手。
innoBand-D 建議零售價為 $788 ，有黑﹑橙﹑螢光黃﹑綠﹑藍﹑粉紅色可選。
咁 innoWear 作為香港既 Hardware Start-up ，係香港實屬少數，好多會寧願選擇揀發展中國家，令小編非常好奇，所以小編當然唔放過任何訪問機會啦！
創辦人 Chandan 同 Will 表示，係香港搞 Start-up 皆因香港既 eco-system 相對好，要搵資金容易得多，而且係地理位置上靠近中國，亦都係佢地既主要考慮因素；不過最重要既一點，莫過於兩位都係土生土長既香港人，將總部設係香港因為呢度先係佢地既「家」。係一個比較有歸屬感既城市發展，的確比係陌生城市從零重頭開始來得好。而 innoWear 已經係美國同印度有分公司，係市場既推廣上會努力推至全球市場，不過兩位都表示唔會忘記 innoWear 係「香港品牌」，所以品牌網站係 innowear.hk。
而作為 Wearable Technology 既 innoWear ，係香港設立比係其他地方如美國或者歐洲既優勢在於， Hardware 需要的各種工具都可以係鄰近既中國搵得到，而且價格亦相對地便宜。
最後， Chandan 同 Will 都表示如果年輕人有意搞 Start-up ，就盡力去追夢啦。因為香港係經濟上提供左好好既環境，係其中一個最適合做 Start-up 既城市，無論係 software 定係 hardware 。但值得注意既係，要清晰知道自己行緊既路所踏的每一步，為你達到 Start-up 夢想當中每一步做 research ，更要了解「Timing」，因為再好既產品係錯既時間推出可能只會步向失敗。
