之前 Edward 都提過,對於採用金屬物料製造的手機特別情有獨鍾:一來比較高貴,二來手感都比較好,三來感覺好似都比較耐用。不過金屬機一向都係旗艦機的專利,最近 Samsung 就推係中階機 Galaxy A8 上採用了全金屬外殼,究竟用落係點就等 Edward 同大家介紹下。
首先講講手感,A8 屬於上代 A7 的承繼者,上代機身只做到金屬邊框,今代 A8 就做到全金屬物料機身,設計更同 S6 一樣,採用一體化機身(其實係外形上更似 S6 的放大版,只係機背物料唔同),所以大家都預咗無得換電。不過呢個做法嘅好處就係機身可以做到好纖薄,只有 5.9mm,加上機背邊位採用微弧形設計,邊框又只有 2.5mm 粗度,令雖然 A8 熒幕有成 5.7 吋,但單手操控時都幾舒服。
不過 A8 採用嘅金屬,同 HTC One 系列旗艦的金屬,係手感上有啲唔同,筆者覺得似乎有少少膠感,而且都幾跣手,所以大家使用時要小心啲啦。
▲採用金屬機身 + 一體化設計,睇起來感覺好似比 S6 更 grand。
▲機背邊位採用弧形設計,單手操控感覺幾好,不過機背金屬物料比較「膠」,而且有啲跣手,使用時要留神。
▲單手操控 Edward 表示無難度。
▲機身方面真係做得好薄,只有 5.9mm。
▲同 LG G4(左)相比,可以見到 A8 真係薄得好緊要。
至於影相方面,Samsung Galaxy A8 同 S6 / S6 edge 一樣,採用相同的 1,600 萬像素 OIS F/1.9 光圈鏡頭,成像同 S6 / S6 edge 差唔多,前置鏡頭都一樣有 500 萬像素,基本上 Samsung 係將旗艦機的鏡頭直接移植到 A8 呢部中階機上。大家從下面試相可以睇到,A8 鏡頭影出來嘅效果,都算唔錯(雖然肯定無 S6 / S6 edge 咁好,相片放大 100% 都有明顯油畫化情況);而以中階機來講,A8 係影相上的表現算係收貨。
▲A8 的鏡頭基本上係 Samsung 直接將 Galaxy S6 的鏡頭移植到此機上,所以質素上差唔多。
▲相機介面都差唔多,一樣有齊咁多種模式俾大家揀。
▲至於自拍方面,都有美顏功能。值得一提嘅係佢嘅美顏唔止可以美膚,仲可以瘦面同埋加大眼,啱哂女士用家。
▲不過較得太誇張(所有設定均調較至最高 8 級)就會變成咁,成個外星人咁……
▲較至 4 級左右會比較自然哩!
【評測】Samsung Galaxy Buds / Buds3 Pro 開箱評測 外形具時尚感 + 佩戴感舒適 + 音質表現理想 + 夠「長氣」可三日一充 【評測】Samsung Galaxy Watch Ultra / Watch7 開箱評測 錶身較厚重 + 外形似層相識 + 功能齊全 + 需每日 / 兩日一充 【評測】Samsung Galaxy Z Flip6 開箱評測 外觀變動少 + 外屏更個人化 + 主鏡成像質素提升 + 電量夠用一日以上 + 整體表現中上
至於熒幕方面,Samsung Galaxy A8 同 S6 / S6 edge 一樣,都係採用 Super AMOLED 材質,而且尺寸仲要比呢兩部旗艦機大,去到 5.7 吋。不過係解像度方面,始終 A8 都只係旗艦機,所以就跌至只有 1080p。不過正如筆者以前多次提過,係只有幾吋大熒幕的手機上,1080p 同埋 2K QHD 其實分別唔算好大,真係要好仔細睇先見到字粒、圖片嘅邊位細緻度分別。所以筆者覺得減至 1080p 無乜所謂,反而係佢繼續沿用 Super AMOLED 熒幕,令睇片時黑位真係可以做到真正黑色,而唔係灰黑色,呢樣反而更抵讚。
▲採用 Super AMOLED 熒幕,雖然只有 1080p 解像度,但用來睇網頁清晰度都好高。
▲用來睇片,黑位好實,呢個都係 Super AMOLED 的優點。
▲可視角度方面都好高,同樣係 Super AMOLED 熒幕的長處。
最後,就講下效能啦。既然係中階機,Galaxy A8 自然唔會好似旗艦機咁勁。不過講到級數,A8 就真係得中階機表現,雖然都採用咗 Qualcomm Snapdragon 615 處理器,同上代 A7 相同,表現一般般,不過不失。其他就包括:採用 2GB RAM、16GB 內建儲存空間、3,050mAh 容量電池、Android 5.1 Lollipop 作業系統、內建指紋辨識器及支援中港 4G LTE 網絡。不過 Edward 覺得最抵讚嘅反而係呢部機可以當做雙卡雙待手機使用,而 SIM 2 亦同時可以插 microSD 記憶卡進一步擴充容量(最高支援 128GB)。咦?之前傳聞 Note 5 雙卡版都有機會可以插卡,唔通做法就會好似 Galaxy A8 咁?
▲效能方面,用安兔兔評測獲得 29,352 分,以 3 千幾蚊嘅手機來講只算不過不失。
▲介面上同 S6 / S6 edge 基本上無分別。
▲買 A8 同其他 Samsung 手機一樣,都會附送 100GB OneDrive 網上儲存空間俾大家備份手機內的相片或影片。
▲支援雙卡雙待功能,而且中港 4G 都用到。不過要留意嘅係 SIM 1 卡槽用嘅係 Nana SIM,而 SIM 2 卡槽用嘅係 Micro SIM。
▲值得一提嘅係,SIM 2 卡槽同時都係 microSD 記憶卡插槽,可以支援最高效入 128GB microSD 記憶卡擴充儲存空間。不過要留意一用咗 microSD 記憶卡,就只能用單 SIM。
▲另外,Home 鍵同 S6 / S6 edge 一樣,都係指紋辨識器位置所在,用法都同 S6 / S6 edge 的指紋辨識器相同。
整體來講,Samsung Galaxy A8 係表現上唔算特別突出,從安兔兔評測測出來的成績,雖然都叫對得住個售價,但唔算特別令人驚喜。不過 A8 最令 Edward 滿意,反而係個芒同埋鏡頭,前者表現唔錯,後者直頭將旗艦機旗艦移植到中階機,如果大家單純之前為影相靚而考慮入手 S6 / S6 edge,相信呢部 A8 會更合大家心意。況且有得插卡,又可以選擇用雙卡雙待,即使去到中國都可以用到 4G,呢一點都係大加分位。不過缺點就係金屬機身始終手感有點膠,不過佢唔係旗艦機,只係一部中階手機,大家都係唔好要求太多啦。
售價:$3,798
查詢:Samsung(3698 4698)
【評測】Samsung Galaxy Buds / Buds3 Pro 開箱評測 外形具時尚感 + 佩戴感舒適 + 音質表現理想 + 夠「長氣」可三日一充 【評測】Samsung Galaxy Watch Ultra / Watch7 開箱評測 錶身較厚重 + 外形似層相識 + 功能齊全 + 需每日 / 兩日一充 【評測】Samsung Galaxy Z Flip6 開箱評測 外觀變動少 + 外屏更個人化 + 主鏡成像質素提升 + 電量夠用一日以上 + 整體表現中上