上月底，Microsoft 正式推出了 Windows 10，而預載了呢個新作業系統的機款亦隨即一部接住一部推出。早排就有代理引入中國品牌 Chuwi 馳為的 Win 10 平板 Hi8，仲要平到 1 千蚊有找連實體鍵盤！究竟用落係點？而家 Edward 就同大家介紹一下。
相信有了解過 Windows 10 的 wire 民都知道，Microsoft 從今代 Windows 開始係作業系統上就無再分平板或電腦版本、或者 ARM 或 x86 / x64 版本，只是分為家用版同埋專業版兩個版本，而兩個都係採用 x86 / x64 架構。另外 Windows 10 亦作出了適量「纖體」，所以係比較低規格的機款中都可以暢順運作。所以在 Hi8 上，雖然只係採用 Intel Atom Z3736F 1.33GHz 四核心處理器，但運作上反應都算 OK，基本上轉換介面、平板或桌面電腦模式、或者開 APP 切換 APP 時都唔算好窒，作為一部跟身處理簡單文書或上上網的平板來講，合格有餘。
▲作為一部 1 千蚊唔洗嘅 Win 10 平板，Hi8 算係表現唔錯。
另外，Hi8 機身亦算幾輕，只有 352g，加上熒幕只有 8 吋，拿出街用都好輕便，即使單手拿住用一段時間都唔會覺得好重好辛苦。
▲呢個價位仍肯用上 Intel Atom 處理器算係唔錯了。
至於機身設計方面，Hi8 就採用了全塑膠物料，基本上摸上手機身都幾「膠」。不過作為一部一千蚊都唔洗，又可以裝到大部分 Windows 軟件的平板電腦，係設計上不能苛求太多是常識吧？就算係規格上，雖然它設有鏡頭，不過 Edward 試過質素只能用「好差」來形容，影出來嘅相唔止雜訊多，效果同當年 30 萬像素的手機影出來的相質差唔多，所以大家就當無呢個功能算啦。
▲機身設計只係一般中國品牌平價平板的級數。
▲機背採用全塑膠物料，手感都幾「膠」。
▲機身正面下方的 Windows 圖示，係 APP 中一按就可以回到主頁。
▲開關及音量鍵位於機身右側。
▲Micro USB 及 3.5mm 耳機插孔位於機身頂部。
▲機前及機背均設有鏡頭，不過質素嘛……可以無視吧。
▲可以插 microSD 記憶卡擴充儲存空間，而機身內建儲存空間為 32GB。
至於熒幕方面，Hi8 採用了 8 吋 1,920 x 1,200 解像度 TFT LCD 熒幕，用起來觸控靈敏度都幾高，基本上筆者唔覺有按上去反應遲鈍或無反應的情況出現。至於質素方面，色彩偏向自然但有少許淡，亦有少許偏黃情況但可以接受，清晰度都幾高，用來睇片或網頁綽綽有餘。
▲估唔到 1 千蚊唔洗嘅 Win 10 平板，熒幕都有 1,920 x 1,200 解像度。
▲用來睇網頁都幾清晰，不過顏色自然得來有啲淡。
▲用來睇 1080p 60fps 片都夠力，算順之餘色水都幾唔錯。
▲可視角度都算唔錯。
另外，Hi8 購買時用家仲會送埋專用鍵盤保護套，唔止可以保護機身，仲可以接駁鍵盤，座係檯面用來打字。不過既然係一千蚊唔洗的平板，仲要送埋鍵盤，大家就唔好苛求係藍牙了，要使用時就要接駁 USB 線使用，雖然係麻煩啲，但至少唔會咁哂電。至於鍵盤方面，按下去手感一般，按鍵面積同鍵深都比一般手提電腦鍵盤差好遠，但都係個句：打到就算啦。
▲用家有需要可套上鍵盤保護套。
▲不過將 Hi8 放入呢個鍵盤保護套後其實有啲厚同重。
▲拉開呢個扣就可以將 Hi8 放入保護套內或從中取出。
▲鍵盤需要接駁機身的 Micro USB 插槽先可以使用，電源自然係從 Hi8 的內置電池取電。
▲保護套背有個支架，俾大家將 Hi8 穩定坐係檯面。
▲鍵盤上面有個「ZZZ」按鍵，同時按住「Fn」鍵及它就可以令 Hi8 進入休眠（保護套無任何磁石感應功能，合起保護蓋係唔識令電腦熒幕關閉的）。
▲按鍵面積比較細，而且鍵深較淺，打字感覺嘛……打到而已的級數吧。
整體來講，Chuwi Hi8 平板試用後，Edward 覺得表現算得住佢 1 千蚊唔洗嘅機價。俗語講：「平嘢無好！」，但呢部 Hi8 筆者就覺得係物超所值，至少拿起來輕便易攜，用落又唔覺好窒，瀏覽網頁翻頁時都好暢順，仲要送埋實體鍵盤！如果大家想平平地試玩下 Windows 10，體驗過先決定係咪為家中電腦升級，呢個都係一個幾抵玩的方案。
售價：$999
查詢：正都電腦（2361 3268）
