日系手機通常俾人嘅印象就係有精美外觀，超幼邊框，同埋防水功能。上個月引入到香港嘅 Sharp 嘅 AQUOS Xx (404SH) 亦都唔例外！除咗以上提及嘅特點，AQUOS Xx 仲有 5.7吋大芒同 Ricoh 認證的 1,310 萬像素鏡頭！實際用落係點就要繼續睇落去啦！
AQUOS Xx 雖然有 5.7吋大芒，仍不失日系手機一向俾人簡約精緻嘅感覺，因為有超幼嘅邊框，單手操作都係無難度。邊框雖幼，但比起 Crystal 系列都係粗左少少，手機支援 IPX5/IPX7 防水防塵規格，只要蓋上SIM 卡卡同 SD 卡槽嘅防水蓋，喺水深 1M 嘅地方浸水 30 分鐘都無問題，而 USB 位嘅防水蓋呢？原來 AQUOS Xx 嘅USB 位用左防水設計嘅，唔洗防水蓋㗎。不過有一點要留意，AQUOS Xx 嘅鏡頭係輕微突出黎嘅，放低手機嘅時候就要小心整花啦！
▲邊框雖幼，但比起 Crystal 系列都係粗左少少
▲AQUOS Xx 嘅鏡頭係輕微突出來嘅，放低手機嘅時候就要小心整花啦
5.7吋嘅 AQUOS Xx 解像度只得 1080 x 1920，數據上好輸蝕，不過實際用落真係唔覺得視覺上有太大問題，原因係 AQUOS Xx 用咗 Sharp 自家研發嘅 IGZO 螢幕，亮度比一般使用 AMOLED 、 IPS 等手機更高，色彩亦好鮮豔。
日系手機喎，唔少得一啲養眼嘅功能。 就如 EDGEST Effect 功能，螢幕解鎖或者有來電打入時 AQUOS Xx 嘅螢幕邊框就會有幻彩效果，真心靚。 加埋 Magic Grip 功能，用家只要手握手機就可以解鎖螢幕。Setting 入面仲有一個功能係只要平放部手機就會 Lock Screen ，但係我籮文試過，喂唔得嘅？！唔通我張枱唔夠平？
▲只要喺 Setting 打開Magic Grip 同 EDGEST Effect 功能，只要手握手機解鎖螢幕或者有來電打入時邊框就會有幻彩效果，真心靚！
有Ricoh 認證的 1310 萬像素鏡頭，影相當然係 AQUOS Xx 嘅一大賣點。AQUOS Xx 有 f/1.9 大光圈加光學防震，最有特色嘅係影相嘅介面，除咗有一般手機必有嘅九宮格格線，仲有好多好得意嘅格線模式幫你攞一個合符比例嘅構圖，不過我籮文就覺得只可以當係輔助，構圖靚唔靚都係靠自己技術啦！
▲f/1.9 大光圈，採光度好多，加上有光學防震，喺暗位影相亦唔會鬆郁矇
▲室內影相，光暗分明
▲影出黎暗位亦不失細節，可見 f/1.9 大光圈發揮提高採光之作用
▲由於有大光圈，不難影出前清後矇嘅景深效果
▲拍照時按下主體（蛋黃哥）對焦，會有指示提你遷就鏡頭，將主體放到格線交叉點，形成三分構圖。
▲Um… 依個構圖係咪靚啲，就見人見智啦。
▲傳說中嘅螺旋式 “Golden Billy”（黃金比例）！
貫徹日本機嘅優良傳統，AQUOS Xx 有簡約時尚嘅外觀（靚芒幼框），好精緻嘅功能（Magic Grip＋EDGEST Effect），相機功能亦不過不失，視覺先決嘅視覺系用家應該會好有興趣，但始終價錢上都係高檔次，鍾意靚機身的人會好易中毒。
$6,780 三禾電氣 23740618 （旺角） 23740718 （銅鑼灣)
