之前同大家分享過 Samsung Galaxy Note 5 及 S6 edge+ 的各項新功能，但基本的熒幕、鏡頭、效能上又表現如何？而家就等 Edward 係最終篇同大家分享一下兩部機係呢幾方面嘅表現啦。
今次 Note 5 及 S6 edge+ 採用了 5.7 吋 2K 解像度 Super AMOLED 熒幕，質素上同 S6 / S6 edge 差唔多，清晰度高之餘，可視角度亦好高，就算從側面睇都可以清楚睇到顯示。不過今代 Note 5 及 S6 edge+ 係顯示上，就一改以往兩代色水較自然的風格，如果選擇「最佳化顯示」選項，顏色就會較濃，亦有少許偏藍情況。之後 Edward 再用 Spyder 5 測試，就發覺係顯示白色畫面時，Note 5 讀數為 8534K（白色讀數應是 6500K），而 S6 edge+ 亦去到 7774K，確證實有偏藍情況。
如果大家想熒幕無咁偏藍，可以係顯示選擇「基本」，效果會較自然。當轉換為「基本」後，Edward 再用 Spyder 5 就白色畫面進行測試，Note 5 的讀數立即降至 6624K，而 S6 edge+ 的讀數亦降至 6299K，非常接近 6500K 的真正白色讀數，出來的效果就會比較自然了。
▲Note 5（左）及 S6 edge+（右）的熒幕採用 2K 解像度，用來睇網頁細緻度好高，唔洗放大都睇到細字。不過就有輕微偏藍情況。
▲用 Spyder 5 測試，Note 5（左）及 S6 edge+（右）白位讀數分別達到 8534K 及 7774K，可見確實有輕微偏藍情況。
▲Note 5 可視角度都好高，從側面睇都無變色，亮度亦無變。
▲由於 S6 edge+ 與 Note 5 一樣都係使用同一塊熒幕，所以可視角度一樣都好高，不過 S6 edge+ 始終擁有同 S6 edge 相同的缺點，就係睇網頁時有啲位會去咗曲面熒幕的位置，睇來來怪怪地。
▲從主頁睇，就更明顯見到 Note 5（左）及 S6 edge+（右）的輕微偏藍情況。
▲不過只要將顯示設定轉為「基本」，就會變成較自然的效果。（效果可見下面兩張圖）
▲左邊位 Note 5，而右邊為 S6 edge+。但如果睇慣原設定嘅用家，可能會覺得顏色較暗啞。
▲再用 Spyder 5 測試，Note 5（左）及 S6 edge+（右）的白位讀數即時分別變為 6624K 及 6299K，可見偏藍情況即獲改善，白色亦較接近真正白色。
▲睇網頁時，Note 5（左）及 S6 edge+（右）亦即時睇到白位無咁偏藍。
▲不過睇戲時用「最佳化顯示」設定，顏色會鮮艷好多。
▲再欣賞另一段 4K 影片，可見黑位真正是黑色，這亦是 Super AMOLED 熒幕的優勢。
至於鏡頭方面，Note 5 看似與 S6 / S6 edge 一樣，採用 1,600 萬像素 OIS 鏡頭，但實際上亦有改進，加入了 VDIS 防震功能，加上 F/1.9 大光圈鏡頭，令大家影夜景或者較暗環境下，即使手持手機而不以外力穩定雙手，亦可以拍攝得到清晰相片。以下就同大家睇睇係較暗環境下影出來的相片係點（以 Note 5 進行測試），同埋分享 S6 edge、Note 5 及 S6 edge+ 係不同環境下的攝力有咩分別？（相片全部採用自動模式，並設定 HDR 為 Auto）
▲以 Note 5 係有自然光環境下的室內拍攝出來的相片，可見色彩上都算自然。
▲係晚上較有情調的德國餐廳，燈光比較昏暗，但都可以手持手機拍出清晰相片。
▲放大 100% 相片大家可以睇到豬手脆皮同埋骨頭上的紋路都清晰可見。
▲而係灣仔碼頭對出的天橋上拍攝維港夜景，可見手持情況下都影到如此清晰的相片（不過射燈射正鏡頭有少許 Flare 問題)
▲放大相片 100% 時可以睇到對岸發光的樓頂廣告牌上所寫的字都隱約可見，可見相片解析力很強。不過影夜景時，雜訊雖然唔嚴重，但似乎有輕微油畫化情況。
▲而加入了 VDIS 防震技術後，就算係較 chok 的行駛中港鐵車箱內，都可以清晰影到路線牌。
▲咁同年頭嘅 S6 / S6 edge 的鏡頭比又有冇改進？
▲放大 100% 來睇，S6 edge 的相片雜訊頗厲害，令相片都變得油畫化。
▲Note 5 表現又如何？乍看似乎無分別。
▲但當放大 100% 相片時，就會見到雜訊控制確比 S6 edge 的鏡頭好好多，油畫化的情況亦被大幅改善，終於去到可以印相的級數了。
【評測】Samsung Galaxy S24 FE 詳細評測 機身輕薄手感佳 + 用色清新迎合年青人 + 熒幕顯示效果出色 + 效能不錯打機都夠 + 定價抵玩 【評測】Samsung Galaxy Tab S10 Ultra 開箱評測 機身較薄但偏重 + 熒幕顯示出色舒服 + 旗艦級效能打機剪片都得 + 定價偏貴入手門檻高 【評測】Samsung Galaxy Buds / Buds3 Pro 開箱評測 外形具時尚感 + 佩戴感舒適 + 音質表現理想 + 夠「長氣」可三日一充
▲Samsung Galaxy S6 edge
▲Samsung Galaxy S6 edge+
▲Samsung Galaxy Note 5
▲Samsung Galaxy S6 edge
▲Samsung Galaxy S6 edge+
▲Samsung Galaxy Note 5
▲Samsung Galaxy S6 edge
▲Samsung Galaxy S6 edge+
▲Samsung Galaxy Note 5
整體來講，S6 edge 與 Note 5 / S6 edge+ 的鏡頭比較，雖然像素相同，但後兩機加入了 VDIS 防震技術，配合 F/1.9 大光圈，確實有助係較暗環境下拍攝出超清晰相片。另外，係日光日白的情況下，三機的攝力其實不相伯仲，但去到較昏暗、甚至拍攝夜景，Note 5 / S6 edge+ 的鏡頭明顯就更為出色，大家可以點按係有蓋停車場拍攝的 3 張相片瀏覽原圖，並留意左上角的白色「Z5058-2」小牌，可以見到係對焦點相同的情況下（均是相片中央位置），S6 edge 的小牌是模糊不清的，但 Note 5 / S6 edge+ 的小牌上的英文字及數字就清晰可見。可見雖然鏡頭看似相同，但分析力卻是有提升的。
除了攝力外，今次 Samsung 係 Note 5 / S6 edge+ 的相機功能上亦加入了兩項新元素：影片拼貼及直播。相信大家都有玩過 InstaMag、拼立得之類，將多張相片拼係一張大相上的 APP 吧？今次 Samsung 加入的影片拼貼，就是呢種 APP 的影片版，大家可以將幾條影片拼入一條影片中，完成後儲存就可以同朋友分享，如果大家想同時展示拍攝現場的多個角度或事件，用呢種模式拍攝並分享就最過癮啦。
▲係影片拼貼模式中，有唔少模式可供用家選擇。
▲每段影片的拍攝秒數都有得選擇，最少 3 秒最多 15 秒。
▲當完成影片拍攝後，就會自動將幾條影片拼貼成之前選擇了的介面中，如果想選擇背景音樂，可點按右下角選擇。
▲當儲存後可以透過不同途徑與朋友分享。
▲這是 Edward 小試牛刀玩玩影片拼貼的實試片，真係幾過癮。
至於直播功能，Samsung 就與 YouTube 合作，令大家可以直接係相機功能入面開啟 YouTube 直播。只要用家先將相機與自己的 YouTube 戶口連結，之後就可以透過呢種方法，與朋友以影片分享現場情況。另外，要邀請朋友欣賞都好簡單，只要點按「邀請」並於連絡人清單中點選希望他們欣賞直播的朋友，之後他們就會收到一個電郵或 SMS，只要點擊當中的 YouTube 連結，就可以欣賞你拍攝中的 YouTube 直播，而且邀請人數基本上無上限。至於解像度方面，最高支援 1080p，雖然未能去到 2K / 4K 解像度，但對於大部分用家來講，應該都夠用了。唔知未來可唔可以用呢種模式，為大家直播 Unwire TV 呢？
▲想進行 YouTube 直播時，係模式中選擇「直播」就可以了。
▲之後會要求存取用家的 YouTube 帳戶。
▲然後就可以隨時開始直播啦，設定超簡單！
▲點按左方的「邀請」即可邀請朋友欣賞。
▲影片解像度最高只有 FHD 1080p，但對於大部分人來講都夠用啦。
▲這就是直播中的畫面，大家可以見到用家可以點選左上角按鍵係後置及前置鏡頭之間切換，亦可以係左下角睇到有幾多人 like 或 dislike。
▲完成後影片會直接上載到 YouTube 帳戶上，所有均自動化。
至於效能方面，今次的 Note 5 / S6 edge+ 是 Samsung 首批採用 4GB LPDDR4 RAM 的手機，加上採用早已係 S6 / S6 edge 上採用的 Exynos 7420 2.1GHz + 1.5GHz 八核心處理器，效能上自然不用懷疑。咁，採用 4GB RAM 的 Note 5 / S6 edge+ 係效能上同採用 3GB RAM 的 S6 / S6 edge 相比，分別又大唔大？可能大家會講：用安兔兔之類的評測軟件比個高低咪知囉！但 Edward 今次唔想咁「離地」，一於用日常生活應用同大家講講。
基本上，首先 Edward 係開機後進入設定睇睇仲剩幾多 RAM 可用，一睇：得番 1.6GB 可用，即係一半都冇！咁大鑊？會唔會好窒呀咁？老實說，筆者用了 3 日，以 Note 5 作為主力機，基本上開 APP、係 APPS 之間切換、雙按 Home 鍵開啟相機、甚至進行指紋辨識，基本上都唔覺窒嘅情況出現，反應亦非常快。就算係切換 APP 介面快速滾動頁面，都無窒嘅情況出現（可睇下面影片）。這應是因為 Samsung 今次採用了 LPDDR4 RAM，加上有 4GB RAM，就算只剩 1.6GB 左右可用，但對於日常應用、甚至針對會同時開啟十幾個 APPS 係背景嘅用家（例如：筆者），都好夠用。所以大家就唔洗太擔心，不過筆者覺得如果 Samsung 未來可以推出 Firmware 更新，進一步釋放更多可用 RAM 供用家使用，咁就更理想啦（最少可用 RAM 都應該要有 2GB 以上吧）！
▲從實試影片大家可以見到無論係開 APP、切換 APPS 都超級暢順，效能上絕對不用懷疑。
▲以內建影片播放程式欣賞 4K 影片，可見就算快速搜畫後都可以立即繼續播放，亦唔見有任何窒的情況出現。
▲用內置影片播放程式播放 4K 的《Star Wars》新一輯電影的預告片，可見超暢順，飛船快速移動亦唔見有漏格的情況，欣賞時都唔覺頭暈。
【評測】Samsung Galaxy S24 FE 詳細評測 機身輕薄手感佳 + 用色清新迎合年青人 + 熒幕顯示效果出色 + 效能不錯打機都夠 + 定價抵玩 【評測】Samsung Galaxy Tab S10 Ultra 開箱評測 機身較薄但偏重 + 熒幕顯示出色舒服 + 旗艦級效能打機剪片都得 + 定價偏貴入手門檻高 【評測】Samsung Galaxy Buds / Buds3 Pro 開箱評測 外形具時尚感 + 佩戴感舒適 + 音質表現理想 + 夠「長氣」可三日一充
最後，相信大家最關心嘅，相信都係電量吧！尤其是今次推出的 Note 5 及 S6 edge+ 均一改以往設計，改用內置電池，電量及充電表現自然比以往 Note 系列可以換電更為重要！基本上 Note 5 及 S6 edge+ 均內建 3,000mAh 容量電池，所以呢幾日筆者都係用 Note 5 作為主力機測試。眾所周知，每部手機的使用時間都要用 3 至 7 日去進行微調，等手機習慣了用家的使用習慣，就會得到較確切的電量。但 Note 5 用第一日，作為高用量用家的筆者（平時會頻密用 WhatsApp、Facebook、LINE，亦會經常玩不同的網絡遊戲，包括：Clash of Clans、SimCity BuildIt，亦會經常將熒幕調至最光，然後用來睇網頁），都可以用到超過 10.5 小時之後仲剩下 9% 電量；去到第二日甚至可以用到超過 12 小時，電量還有 13% 左右剩下來。可見今次 Note 5 / S6 edge+，內置電池要用上一日，其實不難。
至於充電方面，今次 Note 5 / S6 edge+ 就支援最新的無線充電技術，無線充電時間比起 S6 / S6 edge 時更快，充滿電都唔洗 120 分鐘。Edward 亦借來 Samsung 原廠的無線充電板測試，發覺係剩下 10% 的情況下，亦只需要 100 分鐘就可充滿，相信如果由 0% 差起，要係 120 分鐘內差滿手機應該無難度。另外，Samsung 亦十分體貼，會係狀態欄顯示用什麼方法充電中，例如：用傳輸線定係用無線充電，都會寫明，亦會寫明係一般定係高速充電，呢一點亦值得一讚。
今次 Samsung 推出 Galaxy Note 5 及 S6 edge+，可以話係針對過往機款進行針對性改善。首先係外型上，改用一體化機身及底面強化玻璃設計，不但令外型「膠」味盡去，俾用家一種真正高貴旗艦機的感覺，而且亦令機身可以做得更輕薄，自然有助手感提升。其次係功能上，鏡頭均比兩機之前一代好得多，對於鍾意 snapshot 的用家來講，真係好值得升級。最後係效能上，4GB RAM 對於運作暢順度上真係有好大幫助，雖然可用 RAM 不足一半，但已足夠維持系統暢順，呢一點亦算值得一讚（證明系統調較得幾好）。
不過一體化機身的情況下，尤其是係 Note 5 上，就唯有取走以往 Samsung 引以為傲的可換電插卡功能。幸好 Samsung 亦有就呢兩點進行「補救」，首先電池上不只可以用足一日，快速充電亦令大家唔洗「就住就住」用；至於儲存空間方面，Note 5 亦用上擁有更快傳輸速度的 SSD，筆者從手提電腦抄寫 800 幾 MB 的 2 段 4K 影片到 Note 5 內，1 分鐘左右就完成！相比以往有插卡的 Note 4，相信最少要用 3 倍或以上時間先可以抄寫完成。從呢兩項補完，可以見到 Samsung 的誠意。
至於大家問到 Edward：Note 5 及 S6 edge+ 應該點揀？Edward 會覺得如果大家十分重視 S Pen 功能，尤其是需要經常記事或者擷圖，Note 5 會比較適合你入手；如果大家只是想要一部大芒多媒體靚仔旗艦手機，S6 edge+ 可能更適合，畢竟 Note 5 暫時只推出了 32GB 版本，但 S6 edge+ 就有64GB 版本，就算大家要多放幾十首無損格式音樂，又或者放多幾條 4K 片欣賞，都唔驚無位啦！
【評測】Samsung Galaxy S24 FE 詳細評測 機身輕薄手感佳 + 用色清新迎合年青人 + 熒幕顯示效果出色 + 效能不錯打機都夠 + 定價抵玩 【評測】Samsung Galaxy Tab S10 Ultra 開箱評測 機身較薄但偏重 + 熒幕顯示出色舒服 + 旗艦級效能打機剪片都得 + 定價偏貴入手門檻高 【評測】Samsung Galaxy Buds / Buds3 Pro 開箱評測 外形具時尚感 + 佩戴感舒適 + 音質表現理想 + 夠「長氣」可三日一充
