《Hala! Madrid》！如果你係西甲勁旅皇家馬德里的 fans，肯定知道佢係咩。今次為大家介紹嘅 Windows 平板， HP 大品牌賣 2 千蚊有 Dual OS 玩都幾唔錯! 而家就等 Edward 同大家介紹下。
【教學】Android 版八達通開通教學 設定比想像中容易 + 使用無難度 + 開通注意事項 【教學】跨平台無線傳送檔案 不在家 Android、iOS 傳相片影片到家中電腦 Google Drive 檔案篩選器功能 終於在 Android 版推出
首先你可能望到條題覺得 $1,998 好抵，同埋 Edward 係截稿時候發覺已經比人搶晒。不過其實係淘寶的中國官方旗艦店只係賣緊 1099 人仔而且免費送貨，計番大約 $1,330 港紙慳成 $668 ，唯一分別係佢預載係簡體 WIN10 同地區設定為中國，買到返黎要大家攪一輪睇下 set 唔 set 得番做䌓體，同埋有無 Google Play （我就唔 sure..） 另外當然係保養問題，佢就寫「全國保用」但正常就唔包香港喇。不過有讀者話之前係香港 online store 買左中晒伏，原來佢地話唔負責包保養，仲比左個大陸電話佢去問
【教學】Android 版八達通開通教學 設定比想像中容易 + 使用無難度 + 開通注意事項 【教學】跨平台無線傳送檔案 不在家 Android、iOS 傳相片影片到家中電腦 Google Drive 檔案篩選器功能 終於在 Android 版推出
其實今次呢部皇馬限量版 Windows 平板，實際上係台電科技的 X98 Air II 平板電腦，只係包裝盒同埋機背貼上皇馬球員的貼紙而已。而係機身設計上，其實同 iPad 真係有幾分相似，尤其是係個頂，真係似似地 iPad LTE 版的機背頂部位置。
當然，賣得 2 千蚊唔洗，用料自然無 iPad 咁好，機背採用軟膠物料設計，摸上去軟淋淋咁，手感都算幾好。另外重量上，作為一部 9.7 吋平板，大家都唔預佢會好輕，官方就表示重量為 498g，不過小編拿係手度，就覺得佢比 iPad Air 2 的 444g 重量「聚手」得多，同埋佢邊框較幼拿起來比較亦比較吃力，單手唔 Hold 得好耐。
▲同 Edward 手中的 iPad mini 比較，從背面睇真係幾相似，唯一係 iPad mini 採用金屬機身，而 X98 Air II 就採用塑膠物料。
▲從正面睇，除咗 iPad 多咗個 Home 制同埋前置鏡頭位置唔同之外，基本上都幾相似。
▲明顯 X98 Air II（下）的厚度比 iPad mini（上）厚得多。
▲機背採用軟塑膠物料，摸上手手感都算唔錯。
▲跟機會附送 USB 細頭轉大頭線同埋用來充電嘅 micro USB 線（其實大家用番手機嘅充電線幫部平板充電都得）。
▲跟機都有送火牛，但令 Edward 不解嘅係既然係香港行貨，點解仲係跟中國嘅雙平腳火牛？！
▲機身都算係有啲「聚手」。
▲如果「直度」拿住，都幾累之餘，由於兩側邊框都比較幼，所以拇指好易誤觸熒幕。
▲「橫度」拿住會舒服好多，不過由於機身都幾重，所以單手拿得一陣都會幾累，建議雙手捧住用會比較舒服。
既然呢部平板稱為「皇家馬德里限量版」Windows 平板，相信唔少 unwire 讀者都好期待入面有冇咩皇馬元素。不過如果大家係咁諗，可能會令你失望了，因為除咗機背同埋包裝盒有皇馬球員相片，以及 Edward 係 Microsoft Store 官網購買時附送，俾大家貼係機身嘅皇馬主題貼紙之外，就無其他皇馬元素了：唔止無牆紙、提示聲，就連針對皇馬的 APP 都一概欠奉。所以簡單啲講，呢部只係一部貼咗皇馬貼紙嘅 Windows 10 平板，而唔算係一部以皇馬球隊為主題而設計的機款。
▲包裝盒上面都印住皇馬球員圖案，一睇就知道係「皇馬限量版」。
▲拿部機出來，見到機背都印住皇馬球隊擁抱的相片，而且都幾新，占士洛迪古斯、C 朗全齊！
▲由於 Edward 係預購時買入，所以會隨機附送皇馬貼紙….
▲不過皇馬元素就僅限於此了，入到去真係一張皇馬牆紙都搵唔到……
相信唔少人都心大心細，究竟係買部 Windows 平板定係 Android 平板好：前者支援軟件更多但較多以工作為主，而且比較耗電，後者就比較省電，而且較多劇集、電影、音樂、免費 games 等 APPS，不過用來工作就唔算理想。X98 Air II 就將兩者結合埋一齊，一機可以 boot 到 Windows 10 同埋 Android 5.0 Lollipop，等大家兩邊 APPS 都可以用得到，Android OS 個邊仲有埋所有 Google 服務（包括：Play Store），同用一般 Android 平板無分別。
▲X98 Air II 預載了 Windows 10 作業系統。
▲各種 Windows 10 新功能全齊，包括語音助理 Cortana。
▲多桌面功能都一樣用得到。
▲同其他 Windows 10 觸控熒幕裝置一樣，都支援 Tablet mode 平板電腦模式。
▲Windows 10 桌面會有個「Boot to Android」的捷徑，點按它再按「Yes」，就可以 boot 到 Android OS。
▲Android 系統基本上功能齊全，就連 Play Store 都有，大家唔洗 root 都可以裝到平時用開嘅 Android APPS。
▲X98 Air II 的 Android 介面是特別定制的，可見下面除了有返回、主頁及程式切換（中央 3 個）按鍵外，還有音量加減按鍵（+ 及 – 按鍵），以及最左邊的擷圖按鍵及最右邊的目錄按鍵，基本上雙手停留係熒幕底部，已經操控到唔少 Android APPS 的主要功能。
▲如果想轉番去用 Windows 10，係 Android 程式目錄入面都有個 APP 叫做「Boot to Windows」，點按它再按「Yes」就可以返去用 Windows 了。
▲採用嘅係 Android 5.0 Lollipop，都算幾新架啦！不過未來有冇更新就要睇廠商了。
而且內建儲存空間都有 64GB，就算扣除兩個 OS 都仲有接近 40GB 可用，再唔夠用都仲可以插 microSD 記憶卡擴充儲存空間，仲連 SDXC 卡都可以支援（即係 64GB 或以上卡種都讀得到），相信應該可以滿足到大部分用家嘅需要啦。
▲支援 microSD 記憶卡，Edward 試過插入 64GB SDXC microSD 記憶卡系統都辨識得到，基本上大家唔洗驚 64GB 內置儲存空間唔夠位。
【教學】Android 版八達通開通教學 設定比想像中容易 + 使用無難度 + 開通注意事項 【教學】跨平台無線傳送檔案 不在家 Android、iOS 傳相片影片到家中電腦 Google Drive 檔案篩選器功能 終於在 Android 版推出
至於要係兩個系統之間切換，又可以點做？其實 Windows 10 同埋 Android 5.0 兩個 OS 入面都有個 shortcut 鍵，雙按它然後確定就可以重新開機並進入另一邊系統，而且 Edward 試過，切換系統只需要 1 分鐘左右，算係可以接受啦。大家可以透過以下影片睇下實際切換效能。
此外，台電 X98 Air II 雖然唔洗 2 千蚊，但都內建咗 9.7 吋 4：3 比例嘅 2,048 x 1,536 2K Retina 熒幕（Retina？！唔係 Apple 限定架咩？！但 Microsoft Store 官網又真係咁寫喎！）。質素方面，色水真係幾好，少許偏黃但屬於自然，對眼睇落幾舒服。而且清晰度好高，就算唔放大都睇到細字。唯一係感到係室外日光下睇時亮度少許不足。
▲採用 9.7 吋 4：3 比例 2K 熒幕，機身唔會過長，而且呢個熒幕比例都方便進行文書處理。
▲熒幕有成 2K 解像度，以一部 2 千蚊唔洗嘅 Windows 10 平板來講真係幾令 Edward 意外。
▲熒幕質素算唔錯，有少許偏黃但唔嚴重，清晰度都好高，唔洗放大都睇到細字。
▲用來睇影片效果都好好，不過要留意 Edward 只係用 4K 片的高解像度展示 X98 Air II 的熒幕質素，實際上以此機的效能，係唔可以流暢播放得到 4K 片的，建議最多都係用來睇 1080p 質素的影片。
▲可視角度都好高，就算係側面睇都唔覺色水有所轉變，唯一係亮度有少許下降。
Edward 就用 Spyder 5 測試 X98 Air II 的熒幕的白色表現，獲得的結果為 5973K，確有偏黃情況但不嚴重，而亮度只有 233.05 cd/m2，亦證實到為何係日光下就算較到最光都睇得唔夠清楚的情況。不過一般係室內使用，基本上問題不大。
至於效能方面，雖然 X98 Air II 只係採用 Intel Atom Z3736F 2.1GHz 四核心處理器，而且此枚處理器並非最新的 Cherry Trail 架構，而只係去年推出，屬於次新的 Bay Trail 架構，但係運作上都好暢順，基本上作為一般文書機，筆者用來打稿 edit 文執執相（唔係去到好複雜個隻），又或者打下機（唔係需要好高圖像處理效能個隻），基本上都無問題。另外，X98 Air II 亦可以用到 Windows 10 兩個模式：桌面電腦模式及平板電腦模式，不過筆者就覺得除非大家係駁住鍵盤滑鼠來用，否則一般情況下，用平板模式會比較容易操控，最少制都大粒啲先啦。
▲X98 Air II 採用的處理器，只係去年推出的 Intel Bay Trail-T Atom 處理器，主頻為 1.33GHz，最高可去到 2.1GHz。至於 RAM 方面，內建只有 2GB。
▲用 Geekbench 3 測試，Single-Core 同埋 Multi-Core 分數分別獲得 869 分及 2,149 分，以呢個硬件規格來講算係咁，不過呢個分數嘅裝置，建議都係用來上下網做下文書算了。
▲就算 boot 去 Android OS 用安兔兔評測測試，都係得 34,751 分，算係中規中矩。
【教學】Android 版八達通開通教學 設定比想像中容易 + 使用無難度 + 開通注意事項 【教學】跨平台無線傳送檔案 不在家 Android、iOS 傳相片影片到家中電腦 Google Drive 檔案篩選器功能 終於在 Android 版推出
除了效能，相信各位 wire 民應該都會好關心電量問題。老實講，Edward 都唔係當佢做主力機，只係出街個時先至拿住佢做嘢，簡單啲講一日用到佢嘅時間都係 3、5 個鐘左右。呢個情況之下，都可以勉強用到 3 日先至要再差電，表現真係好理想，至少比用手提電腦，每日都要差一次電襟用好多。不過 Edward 建議大家如果多數出街個時係室內用部機（例如：食緊飯或者等緊人個時用），熒幕調較至 25% 或 50% 亮度就應該好夠用，呢個情況下電池會更加襟用呢！（根據系統表示，用 25% 亮度基本上可以連續用到 8 小時以上。）
▲內置 8,500mAh 容量電池，即使無開省電模式及熒幕亮度調至 100%，都可以用到超過 6 小時。
▲如果熒幕亮度調至 25%，使用時間更可以超過 10.5 小時（即使唔開省電模式），用一日夠有突了！
另外值得一提嘅係，即使在外面用個時唔夠電又唔記得帶火牛，呢部 X98 Air II 都支援用外置充電器充電，雖然係無用火牛充電咁快，但最少能夠延長使用時間，都算幫得到手呀！
整體來講，X98 Air II 雖然稱為「皇馬限量版」，但實際上只係「得個樣」，內裡基本上係無任何皇馬元素的，Edward 覺得真係「捉到鹿唔識脫角」，因為其實部機如果肯做得有心思同埋皇馬元素再齊全啲，相信就算賣貴多幾舊水，應該都會有皇馬死忠 fans 入手的。所以大家都係當佢係一部貼咗貼紙嘅抵玩 Win 10 + Android 雙 OS 平板啦，真係唔 like 皇馬？貼過另一隊自己愛隊嘅貼紙落去遮住啲機背圖案囉，無壞嘅！
不過又咁講，撇除皇馬元素，呢部 X98 Air II 其實都算幾抵玩，尤其是 Edward 早陣子並非用原價 $1,998，而係用預購價 $1,698 兼附送皇馬貼紙的價格入手的，試諗一部 1,700 蚊唔洗，又預載咗最新 Windows 同埋 Android 嘅平板，仲要有 64GB 俾大家用又可以插卡，仲內置 8,500mAh 容量電池俾大家用足最少一日，熒幕又有番咁上下質素，仲要唔驚買咗山寨貨，係 Microsoft 官方商店就買得到，呢幾個優點加埋加埋，大家就會覺得幾超值，尤其是對於成日要係外面寫稿執稿嘅筆者來講，拿住呢部機，點都比拿住部手提電腦工作方便好多。所以整體來講，Edward 覺得 X98 Air II 買來做下文書工作上下網，間唔時玩下啲小遊戲，即使用原價 $1,998 入手，都真係無得輸！
【教學】Android 版八達通開通教學 設定比想像中容易 + 使用無難度 + 開通注意事項 【教學】跨平台無線傳送檔案 不在家 Android、iOS 傳相片影片到家中電腦 Google Drive 檔案篩選器功能 終於在 Android 版推出
