https://cdn.unwire.hk/wp-content/uploads/2015/08/fbchan.png
我籮文無論返 unwire office 定係自己生活，都揸緊「 玩生活・樂科技」嘅宗旨。講玩，當然唔少得音樂；講科技，當然唔少得電子野。今次就同大家講下電子跳舞音樂 EDM（Electronic Dance Music），而 EDM 只係大分類，常見嘅 Dubstep，House，Electro，Trance 等等都屬於 EDM。 除咗去 Clubbing 去蒲嘅時候會聽到 EDM，近年依種音樂喺國際層面上都愈來愈流行，電視電台等主流媒體以至 YouTube 上亦經常可聽得到 EDM，出名嘅 DJ 有 David Guetta ，Avicii， Steve Aoki，Skrillex 等等，隨住 DJ 們愈來愈多與流行音樂歌手合作， EDM 亦迅速掘起，號稱成長得最快嘅音樂類型。
今次籮文去到 W 酒店參加 Heineken 舉辦嘅 2015 GREEN ROOM 原創電子舞曲派對，GREEN ROOM 係一個跨越八個國家、十七個城市嘅音樂體驗派對，香港站作為今年 GREEN ROOM 全亞洲嘅第一站，DJ 陣容當然十分強勁，包括俄羅斯電子音樂拍檔 HARD ROCK SOFA、荷蘭混音大師 Alvaro 、南韓首席 DJ Scarnite、DJ Rana 。今次我就捉到阿 Sam 李璨琛做個專訪，講下香港嘅 EDM。多數 DJ 都有一個 DJ 代號，就好似藝名咁，而李璨琛嘅 DJ 名係 DJ Becareful，點解改個咁得意嘅名？原來係因為阿 Sam 佢初頭學打碟嘅時候經常都㩒錯制，改依個 DJ 名係用黎提醒自己要小心，唔好再㩒錯制。
▲韓國靚女DJ RANA
▲李璨琛嘅 DJ 名係 DJ Becareful，點解改個咁得意嘅名？原來係因為阿 Sam 佢初頭學打碟嘅時候經常都㩒錯制
到過世界各地好多唔同嘅地方出 Show， Sam 就覺得今次喜力 Green Room 以香港作為亞洲第一站，除咗音響做得好，舞台佈置及燈光等都花咗好多心思，Sam 認為一個出色嘅 EDM 派對，除音樂外，視覺亦都是十分重要，因為視覺同聽覺絕對是相輔相成，可以令參與者更加投入，就有如今次活動，除咗三個 LED Screen 有 VJ（Visual Jockey) 畫面，場地上方有一個巨型互動球幕，觀眾可透過 Green Room 手機 APP 將自拍照 Share 上去個球幕上，亦有兩排識得上下移動嘅球型燈光機關，而每個入場參與嘅觀眾都會獲派一隻手鐲，手鐲會隨住音樂發光，眾多嘅視覺效果正好符合今次活動嘅標語，“Can You See Music?”。
▲場地上方有一個巨型互動球幕，觀眾可透過 Green Room 手機 APP 將自拍照 Share 上去個球幕上
對於阿 Sam 黎講，最必備嘅就係佢部 MacBook， 因為一個 DJ 最重要就係自己揀嘅音樂，用咩容器去裝住啲音樂係唔重要，Sam 就選擇咗用電腦配合 Scratch Live 軟件同 DJ Mixer。依家嘅科技已經發展到插隻 USB 手指落 Mixer 度，電腦都唔使帶，睇住 Mixer 上面嘅顯示屏黎 Mixing 就可以進行演出，但阿 Sam 就冇採用依個方法，佢話因為 Mixer 上面嘅顯示屏太細，而自己又有啲老花，所以需要大啲嘅電腦 Mon。市面上最常見嘅 DJ 軟件不多，就是 Traktor、 Scratch Live 等等，Sam 就表示雖然自己冇用 Traktor，但眼見到好多無論音樂制作或者玩 Live 嘅朋友都會用 Traktor，而自己就用慣咗 Scratch Live。 Scratch Live 都最近出咗好多周邊嘅軟件、Plug-in等，配合埋 CDJ2000 Mixer 內置嘅Effect 已經好夠做，除非玩 Scratching 或者 Mash-up 先至需要其他野配合。
過去幾十年，DJ 都係捽黑膠碟，直到 2000 年前後，CDJ 開始興起，從此 DJ 界分成兩派，一派是黑膠死硬派，另一派就開始捽 CD，Sam 又點睇兩者嘅分別？ 雖然見阿 Sam 今次出 Show 都係用 CDJ，不過原來佢係鍾意用黑膠多啲嘅，雖然 CDJ 同黑膠最後輸出都係 Digital，但始終黑膠嘅質感、Scratching 嘅效果係唔同，捽黑膠零舍有一陣懷舊嘅味道，例如要配合唱盤嘅轉數，唔同型號嘅唱盤出黎效果都係唔一樣，但最主要就係支唱針，唔同品牌嘅唱針， 唔同類型嘅唱針，都有唔同嘅效果，有聽歌用，有啲係 Scratching 用，有啲係 Mixing 用，所以黑膠 DJ 們要考慮到自己嘅用途。雖然心中就喜愛黑膠，但阿 Sam 依家出 Show 都係以 CDJ 為主，因為大部份 Club 或者 Party 都係用 CDJ。CDJ 實在太方便，基本上 CD 都唔使帶，只要將啲歌入晒落電腦度就可以做到所有野。如果係黑膠死硬派，除咗要帶一大袋黑膠碟，每個 DJ 都有自己嘅機器 Setting，唱針、每一隻黑膠碟同黑膠碟底下嘅墊都係要DJ自備，上一手唔會留低俾你，所以玩黑膠係好個人化嘅表演，亦都好需要耐性。
▲DJ Becareful 演出 2015 GREEN ROOM 的裝備
當籮文問到阿 Sam 覺得香港 EDM 音樂發展如何，Sam 二話不說講出一句，「冇！香港係冇EDM！」，香港音樂上，除咗主流音樂同 K 歌之外就好少其他音樂類型，而電子音樂喺香港更加係少之有少。雖然 K 歌都算係音樂，不過只係為迎合大眾口味嘅商業產品。有留意開香港 EDM 發展嘅籮文除咗眼見好多國際級 DJ 黎到香港開 Show 搵錢，就鮮見有香港本土原創嘅 EDM，除咗由 Beatboxer 轉型為 Producer 嘅 Heartgrey 或者早前經常發佈惡搞 Remix 的 JFung 之外，近期就少見有突出的香港 EDM，Sam 就話以前陳慧琳嘅花花世界都算係有電子音樂嘅原素，但純電子音樂喺香港就真係好少。雖然香港流行音樂種類較少，但係 阿 Sam 仍然希望堅持做自己嘅原創音樂，就好似 LMF 之中有 Band Sound、有 DJ Scratching、有 Rap，有好多唔同原素，但合併起黎都係屬於 LMF 自己嘅音樂。
▲雖然香港流行音樂種類較少，但係 阿 Sam 仍然希望堅持做自己的原創音樂
可能喺大家眼中，阿 Sam 係一個好爛玩嘅人，好鍾意去 Clubbing ，戲裡面又經常飾演類似角色，其實阿 Sam 只不過係鍾意去跳舞同享受音樂啫！佢以客串形式加入 LMF 之後就發現自己真係好鍾意同台下觀眾互動，有去過睇 Band Show 嘅人都知，Band 友喺台上嗌一句，台下 Fans 又會回應一句，就好似阿 Sam 佢哋台上唱一句：「X你啦！」，台下幾千人又跟住嗌：「X你啦！」，雖然依句粗口平時聽落好銀耳，但係身為一個音樂人，依啲互動對阿 Sam 黎講係一個好大嘅支持。
到目前為止 LMF 已經夾左十幾年，雖然名義上係散左Band，但大家又會定時定候集結一齊，唔係為錢而又全力地做一啲音樂嘅創作出黎，跟隨左十幾年嘅Fans又好會支持。Sam 希望可以繼續用依個模式去玩音樂，因為喺香港依個市場淨係錢而做音樂係好辛苦嘅事，首先你要有唱片公司支持先有機會可以出到一張碟。現代嘅網絡嘅平台已經好方便好發達，每個地方又有自己嘅平台，中國有 Youku、微訊、微博，百度，香港人常用有 YouTube、Facebook，用網絡平台去發佈音樂，或者用我哋平時嘅人際網絡去做演出，可以將自己嘅音樂帶到唔同嘅地方阿 Sam 就已經心滿意足。一樣米養百樣人，好難迎合到所有人嘅口味，只要有一撮人喜歡就夠，當然，如果有批評阿 Sam 都會接受及改善。因為佢好享受做音樂嘅過程，好享受做一個音樂人。
▲「一開始玩 DJ 其實只係 For Fun，因為我細細個已經鍾意去蒲」
LMF 成員不定期都會集結起黎。最近 Sam 就同 LMF 嘅 Phat 同 Kit 就組左一個組合，名為 猴子幫 MonkeyMen，組合名稱意思就希望依班馬騮係好活躍好機動，每次依班馬騮組合可以好唔同，今次就有 Sam、Phat 同 Kit，可能下次又加入其他人去做一啲野，未必係一個永久性團隊。
▲Sam 同 LMF 嘅 Phat 同 Kit 組合 猴子幫 MonkeyMen
「秘密行動」係 MonkeyMen 第一首歌，音樂由來自北京的 DJ Wordy 製作，係一首 Electro 同 Trap，混合少少 R&B 同 Soul 嘅感覺，Rap 就由 Sam、Phat 同 Kit 三個負責，亦有朋友填下詞，加上 Featuring Project Ace 女主音陳藝之。MV 不久之前拍完，全首歌都係由 MonkeyMen 自費製作，冇唱片公司幫助，純獨立音樂，Sam 表示好開心有 Beats by Dr. Dre 贊助拍依個MV，應該9月左右就會發佈，之後當 MonkeyMen 成員們有時間有靈感時就會陸陸續續再做其他唔同類型嘅音樂。
▲「秘密行動」MV 有 Beats by Dr. Dre 贊助
當然，Sam 亦會繼續做 DJ 嘅工作，但推出歌曲可以令到自己更加與時並進，俾到多啲靈感俾自己，除咗一向玩開嘅速度較快 EDM，經過今次就知道原來「秘密行動」依種速度較慢嘅 Trap 音樂都可以好有令人跳舞嘅感覺。
做 DJ 最緊要係熱誠，依個時代要學做一個 DJ 實在一啲都唔難，只要上 Google Search “How To Be A DJ”，都已經有好多教材，而 DJ 器材由入門級到專業嘅都有，所以最重要係有 Heart，當你好鍾意一件事嘅時候你自然會投放時間同心機去摸索去研究。其次就係節奏感，如果最簡單嘅節奏都捉唔到就好難搞，不過唔怕，坊間亦都好多 DJ 學校，可以提供到短期課程俾啲想做啲 DJ 嘅朋友，我身邊亦有朋友例如 DJ Ming 都有開依類型嘅學校，可以透過訓練去增強節奏感。阿 Sam 一開頭都係由零開始，當時 DJ Frankie Lam 教佢數拍子，Frankie Lam 話：「你唱歌會唔會數4個8拍先入㗎？通常4個8拍就一組，你未自己數下囉。」做DJ都一樣，有時可以4個8拍就入，有啲可以16個8，亦有32個8先入，所以只要熟練，就能夠靈活運用，只要有心，要成為一個DJ並唔難。阿 Sam 覺得自己唔算有天份，又經常㩒錯制，但只要用功練習，㩒錯多幾次，就會記住邊個制係唔可以再㩒錯。
