從最近一屆電腦節人數回升，可見電競運動始終有一定吸引力。當然如果你要參與電競比賽，正所謂「工欲善其事，必先利其器」，家中電腦自然要配備番部「電競」級別嘅 Gaming 裝置啦。最近 ASUS 就推出了 ROG 系列的新機 GL552JX，究竟用落係咪一部稱職嘅 Desktop Replacement Gaming 手提電腦？而家就等 Edward 同大家分享一下。
既然列得入 ROG（Republic of Gamers）系列，GL552JX 自然十分著重 gaming 上的表現啦。它內建了 NVIDIA 獨立顯示卡，而且視像記憶體仲有 4GB RAM 咁多，基本上玩任何遊戲，就算係對圖像處理要求好高的《GTA 5》都算夠力，如果大家用 default 設定，都可以去到 25fps 至 50fps 左右，整體來講都算流暢。
▲內建 NVIDIA 獨顯擁有 4GB RAM 獨立視像記憶體，用來打機都好順。
▲而電腦本身都採用 Intel Core i7-4750HQ 2GHz 處理器同埋 16GB RAM，基本上可以應付絕大部分遊戲需求。
▲用來玩《GTA 5》，用預設畫面設定都有 30fps 式以上，基本上好夠用。
▲筆者再將畫面圖像設定設為最高，就得番 15fps 甚至更低，玩落都幾窒，唔建議大家咁做。
而家好多新款手提電腦，尤其係旗艦級別，都已經升級去到用 2K、甚至 4K 解像度。但 GL552JX 就停留番係 1080p 解像度，作為一部過萬蚊嘅手提電腦，可能大家會覺得唔太值。不過如果從使用體驗來講，其實支援 2K、甚至 4K 解像度的遊戲，現今都唔算太多，多數都係支援到 1080p 已是極限，唔盲目升解像度，有時未必係壞事。而且係清晰度上，作為一部有 15.6 吋熒幕的 gaming 手提電腦來講，GL552JX 清晰度都算幾高，而且唔太覺有偏色情況，更因為採用磨砂而非光面熒幕，所以唔會出現反光情況，從側面睇熒幕都唔會變色或者變暗，整體來講唔會影響大家打機時的視覺體驗。
▲GL552JX 採用 1080p 解像度熒幕，而唔似好多旗艦手提電腦咁，採用 2K、甚至 4K 解像度熒幕。
▲採用啞面熒幕設計，好處係熒幕唔會反光。
▲熒幕色彩偏向自然，都幾靚。另外值得一提的是，GL552JX 的效能，播放 4K 片都可以好順。
▲用來睇網頁，唔洗放大都睇到細字，清晰度都幾高。
【評測】ASUS ZenFone 11 Ultra 外形 手感 屏幕 相機 效能詳細開箱評測 【評測】ROG Zephyrus G16 (2024) 外形 手感 打機表現 效能 鍵盤 端子開箱評測 【評測】ASUS ZenBook Duo 外形 手感 功能 使用體驗 屏幕 操控 效能開箱評測
之前唔少 ROG 機款都採用紅色背光鍵盤，令大家即使係漆黑的房間打機，都可以睇到鍵盤上每個按鍵係邊。今次呢部 GL552JX，都一樣係採用紅色背光，感覺夠哂型。此外，打機最常用來操控角色前進、後退、移左、移右的 WASD 按鍵，更特別採用紅色物料塗於按鍵邊位，令大家無論開咗燈定關咗燈，都清楚睇到呢 4 個按鍵，對於 gamers 來講，真係幾體貼。
▲採用紅色字體鍵盤。
▲熄燈後睇紅色背光好出，既可以睇得清按鍵之餘，都好有型。
▲WASD 4 個按鍵無論有冇開燈都睇得好清楚，因為採用了紅色按鍵邊，好型。
▲按鍵禁落去鍵深好夠，按鍵表面面積都夠大，打字好舒服。
至於機身設計方面，GL552JX 就採用比較簡約的設計，機面中間採用六角形較長的金屬面板，上面印住 ASUS 同埋 ROG 兩個 logo，而其餘位置就採用有凹凸感的點點設計，整體感覺簡約得來幾型仔，手感都算幾好。而且機身端子好齊全，唔止有齊 USB 3.0、HDMI、VGA、LAN、讀卡器等插槽，仲有埋 Blu-ray / DVD Combo 光碟機，就算大家唔打機，用部機來睇 Blu-ray 電影都一樣無問題。
▲機身設計簡約得來幾有型。
▲中間的係金屬板，而旁邊的點點花紋，手感超好。
▲鍵盤旁都印有 ROG 的標誌，紅色標誌印係黑色機身上面，都真係幾型。
▲不過要留意嘅係，機身內籠都幾易痴指紋，對於有潔癖的用家來講，最好常備抹布好好清潔。
▲端子齊全的程度絕對可以作為一部超夠用的 Desktop Replacement。
▲仲有埋 Blu-ray / DVD Combo 光碟機，用部機來睇 Blu-ray 電影都得。
▲如果打開機底蓋，可以自行更換 HDD、SSD 同埋 RAM，不過筆者唔建議大家咁做，一陣影響到保養就無謂啦。
▲值得一提的是，呢部手提電腦係可以升級去最新的 Windows 10。
以往的 ROG 機款，ASUS 都有附送打機「套裝」，包括：有線打機滑鼠、打機耳機連咪以及背囊，今次呢部 GL552JX 都唔例外，一樣送到足，等大家唔洗出去另買，都可以襯齊一套。
▲GL552JX 同其他 ROG 系列機款一樣，都附送幾樣 gamers 打機必備裝置，當中就包括呢款有線打機滑鼠。
▲操控個時手感都真係幾舒服。
▲用內置軟件可以設定各個係滑鼠上面的按鍵功能。
▲另外都附送呢隻 Gaming 耳機，採用耳罩式設計。
▲線材都採用唔驚打結的設計，唔係一般膠線。
▲耳機有埋線控。
▲耳機可以加埋咪高峰，方便同其他 gamers 語音進行溝通。
▲跟機都送兩條咪高峰延長接線，一條單對單係純用來聽，另一條一開二就可以駁埋咪高峰插孔錄到音講到嘢。
▲而第 3 樣附送的 gaming 裝置就係呢款背囊，不過部機咁重相信都唔會有人拿出街用掛？
今次的 ASUS ROG GL552JX，無論從外型、鍵盤手感、甚至效能上，都真係可以稱得上 Gaming 手提電腦，對於鍾意打機、又或者追求靚仔兼高效手提電腦，方便用來剪片執相睇 Blu-ray 電影的用家來講，GL552JX 肯定可以滿足大家需要。不過 GL552JX 的售價始終仍係偏貴，作為一部只有 1080p 解像度的手提電腦，售價仍然過萬，似乎令吸引力稍減。不過如果大家要追求高效 gaming 體驗，相信大家都唔介意付出多少少掛？
售價：$13,998
查詢：ASUS（3582 4770）
【評測】ASUS ZenFone 11 Ultra 外形 手感 屏幕 相機 效能詳細開箱評測 【評測】ROG Zephyrus G16 (2024) 外形 手感 打機表現 效能 鍵盤 端子開箱評測 【評測】ASUS ZenBook Duo 外形 手感 功能 使用體驗 屏幕 操控 效能開箱評測
