如果提起智能手錶，Apple Watch 只能算係風靡「一時」，但講到一直都有支持者，肯定非 Pebble 莫屬。最近他們最新推出的鋼帶加彩色熒幕版本 Pebble：Pebble Time Steel 的 Kickstarter Backer 版終於來到香港，Edward 就找來一位 backer 朋友，為大家揭開呢隻人氣潮錶的真面目！
可能部分喜歡彩色熒幕的 wire 民，之前已經入手了 Pebble Time，不過它的塑膠錶帶及錶身可能令大家覺得似「玩具」。而今次的 Pebble Time Steel，就一如之前的 Pebble Steel 般，走高貴路線：採用金屬錶身及錶帶，令大家帶出街完全似番隻「錶」！另外，鋼帶手感幾好，而且唔會容易夾住手臂幼毛，就算男士們較緊一點錶帶都唔驚。如果大家唔 like 鋼帶，隨錶亦附送真皮錶帶一條，令大家可以用來襯衫。
▲Pebble Time Steel 採用了鋼錶帶，同之前黑白熒幕的 Pebble Steel 一樣都咁高貴見得人，完全無玩具感。
▲Edward 朋友呢隻 Pebble Time Steel 是 Kickstarter 版本，所以錶背會刻有「Kickstarter Backer」字樣，如果大家而家先買係會無咗呢堆字架！另外大家可以見到充電線接口仍然係係錶背。
▲鋼錶帶鋼水幾好，摸上去好滑好舒服，而且唔會夾手毛，抵讚！
▲只要按住扣兩邊的制，就可以除下手錶，超簡單！
▲隨錶仲會附送多條真皮錶帶，不過如果要落水就唔好用啦！
▲Edward 拿來同自己隻 Apple Watch Sport 比較， Apple Watch 即時變得似玩具……
至於換錶帶方面，Pebble Time Steel 亦好容易，只需要拉動錶帶末端的扣，然後向旁邊拉出，就可以取出安裝於錶上的錶帶，再使用相同方法不過相反方向，就可以換上新錶帶，基本上一分鐘唔洗任何人都學得識，超級簡單。
今次的 Pebble Time Steel，其實同之前的 Pebble Time 大致上相同，只係採用金屬錶身及錶帶而已，而錶本身同樣支援於最深 30 米水深內使用，就算大家戴住游水、沖涼、甚至係雨中使用都無問題。不過記住啦，理論上防水功能只限防淡水，如果去海灘游水，還是建議先將 Pebble Time Steel 脫下來才去游水會穩當一點。
最後一點，相信大家都好關心嘅，就係究竟 Pebble Time Steel 原生支援中文未？答案係：未！不過都唔係世界末日嘅，Pebble 嘅好處係可以安裝軟件或 patches 補完它的缺陷，有心人就寫了一個字庫俾 Pebble，令佢可以支援中文。Edward 都測試過，就連廣東話字多數都出得到，而唔會變成方格字，呢一點相信大家都可以放心。
▲採用彩色 e-Ink 熒幕，所以仍然係好慳電架！
▲不過暫時仍然無中文介面。
不過如果要裝到呢個字庫，你首先要有一部 Android 手機！因為只有 Android 手機，先可以從 Dropbox APP 入面下載個字庫並直接裝入去 Pebble 度。如果你得一部 iPhone，咁就做唔到了！做法好簡單，首先係部 Android 手機入面安裝 Dropbox 同埋 Pebble APP，之後將 Pebble Time Steel 同呢部 Android 手機配對，再點按 Dropbox APP 內的連結，然後選擇以 Pebble APP 開啟，字庫就會自動安裝到 Pebble Time Steel 內。完成後取消手錶與呢部 Android 手機嘅配對，再同部 iPhone 配對，就可以了！要留意嘅係，咁做嘅話，本身手錶入面的提示、信息等都會無哂，但字庫同埋錶面都會被保留下來。除非大家 format 了隻錶，否則即使再同 iPhone 配對，都仍然用得到個字庫的。
字庫 Dropbox 連結：http://blog.kuro.ro/pebble-time-chinese-japanese-language-pack/
▲安裝字庫後，基本上大部分中文字都顯示到。
▲就連廣東話字都一樣顯示到，唔會變方格字！
整體來講，Pebble Time Steel 擁有之前 Pebble Steel 的優點：高貴見得人、戴上手手感舒適等優點，加上仲有防水功能，而且雖然它採用彩色熒幕，但由於仍是屬於 e-Ink 熒幕，所以同黑白版一樣咁慳電，用足一個星期先充電都得！總括各項優點，Pebble Time Steel 雖然比較貴（官網連兩條錶帶售價為 US$299.98，約 HK$2,340），但都值得入手！唯一希望係當香港行貨推出時，可以原生支援中文字顯示，唔洗裝字庫，咁就最好了！
Edward 都有即場訪問買了 Pebble Time Steel 的用家 Keith，他表示其實一早都打算支持 Pebble，之前 Pebble Time 嫌佢膠殼太「玩具」無買到，直到今次推出 Pebble Time Steel，佢終於藉口唔支持了。他覺得 Pebble Time Steel 比 Apple Watch 好的地方有三點：第一點係終於唔洗每日一充或者行行下街驚無電；其次係錶身輕身好多，即使戴了鋼帶都比 Apple Watch 輕盈；而最後一點係當有 notification 的時候，Pebble Time Steel 的震動比較強，不像 Apple Watch 般要好留心先感覺到它的震動。
至於 Pebble Time Steel 是否仍有改善空間？Keith 表示它的熒幕仍然較細，解像度亦較低，希望未來可以加強。另外習慣了使用 Apple Watch，初使用 Pebble Time Steel 時，會不自覺覺得它的熒幕具備觸控功能（笑~~）。至於有冇原生中文，Keith 反而表示唔太介意，始終可以自己安裝，仍屬可以解決的問題。
